مساكم الله بالخير

ترددت كثيراً أني انزل هالموضوع لكن صدق أبي الشور وماخاب من أستشار ..

كل شخص منا بدون أستثناء يمتلك قدرات وهوايات قد تكون ظاهره وجليه للكل وقد تكون مدفونه
وقد تجد هذه القدرات والهوايات بيئه مناسبه لها لكي تنمو وتترعرع وتصل لمرحة الأبداع وقد تدفن قبل أن تولد اصلا منذ صغري ظهرت لدي بعض الهوايات ومن ابرزها الرسم وليس غريب ان تكون لدي هذه الهوايه فاغلب أفراد اسرتي مبدعين في الرسم وكنت استمتع بالرسم ووتفنتت به واصبحت ارسم على الجلد وعلى خامات اخرى ..كبرت واصبحت بالمرحله الثانويه وكأي فتاه بهذا السن بدات أهتم بالمكياج والازياء وبما ان لدي هواية الرسم فاصبحت أتفنن بالرسم ولكن هذا المره ليس على الورق والجلد ولكن على الوجوه.. في المرحله الجامعيه ظهرت لدي هوايه جديده وهي تصميم الديكور والأهتمام بكل مايخص المنزل من ديكورات وغيرها ..
بعد المرحله الجامعيه انتسبت لدوره برمجة الحاسب الآلي ودرست تصميم المواقع عن طريق ال (html)وعن طريق الفرونت بيج وصممت موقعين للتخرج وبشهادة الجميع أبدعت فيها ولله الحمد وبهذه الدوره ايضا درست الفتوشوب واستطعت أن اتقنه ..وبما اني اتقن الاعمال اليدويه نوعا ما جذبني تغليف الهديا فأصبحت أغلف الهدايا الخاصه بي وبعائلتي..وكل هوايه من هواياتي كنت استمتع وانا اقوم بها لنفسي و لمن حولي فكنت بالابتدائي ارسم للمدرسه واتنازل عن وقت الفسحه لكي استمتع بهوايتي .. واما المكياج فأنا احبه واستمتع به اكثر من أي شي آخر وكنت استمتع وانا ازين نساء عائلتي .. ونفس الشي بالنسبه للتصميم بالفتوشوب ولتغليف الهديا فكل من لديه هديه ..بليز روعه غلفي لي الهديه ..وكان ردي دوما أبشر أو أبشري … ولم اكن انتظر مقابل وتكفيني ابتسامه أوأطراء…
هذه المقدمه الطويله العريضه ليست بدون سبب ولكن قبل كم سنه اقترح علي زوج أختي أن يفتح لي صالون لكن خفت من المسؤوليه ورفضت .
.وقبل أكثر من شهر تقريبا عندما نزلت موضوع عن البخور أقترح علي اخوي( مضارب مغامر) فكرة التغليف ..
تصدقين أختي .. لما كنت أقرا كلامك يت في بالي فكره يمكن تعيبج …
انا لما رحت العمره لاحظت في محلات للعود والبخور عندكم في السعوديه مب موجوده عندنا في الإمارات .. وانتي تقولين في هالموضوع ان العود اللي شميتيه ريحته وايد حلوه ومب شايفتنه قبل .. يعني انه يديد عليكم … يعني أغلب الظن مابيكون موجود عندنا في الإمارات …

وبما أنكم ( البنات بصفة عامة ) فالحين بالتغليف والتصاميم وهذا واضح عندج ومن مواضيعج .. فليش ما تبدين مشروع نفس بعض الاخوان والاخوات اللي في المنتدى يبيعون عود وبخور …
لا تقولين محد بيشتري .. انا بنفسي مشتري من المنتدى واتوقع بتلقين ناس وايدين يبون يشترون … كل المطلوب تتعاملين مع المحل اللي خذتي منه هالعود .. ومع شركه شحن … وشويه تغليف على شويه صناديق وانتي والخير رباعه ان شاء الله

وبما اني لم افعل شي بحياتي بمقابل مادي ترددت كثيرا وعندما فكرت بجديه قلت لما لا اذا كنت سأنمي هوايتي واستفيد وافيد غيري .. وتشجعت وبدأت فعليا بعمل مجموعات من الهدايا..
وقبل كم يوم رحت لزيارة أهلي ..ودارهذا الحوار بيني وبين أخوي..
أخوي..وينك من زمان مانشوفك
أنا.. ابد مشغوله عندي بزنس الحين ومب فاضيه لكم
أخوي .. لا ياشيخه عسى مو بالاسهم بس!! ..
أنا … لا خلاص الاسهم غسلت يدي منها .. تغليف وحركات. <<مادريت اني بتهزأ
أخوي .. وش وش تقولين ان شاء الله بتغلفين هدايا وتبيعينها.. ..
انا .. أيه شفيها وانت عارف ذوقي و شغلي ..
اخوي ..أيه مايخالف ماقلنا شي بس تسوين هالشي كهوايه من انك تبيعين..
أنا ..شفيها اذا افدت غيري وأستفدت ..
اخوي .. مو انتي اللي تسوين هالشي ..وانتي مب محتاجه عشان تبيعين ..
انا ..شاللي بينقص من قدري ..وانت عارف أنه مب عشان الماده وبس ..
اخوي ..انتي بهالطريقه تستهلكين نفسك ..
انا ..شلون يعني استهلك نفسي ..
اخوي ..قفلي الموضوع ..وفكري بكلامي ..<< ولليوم مب عارفه شمعنى تستهلكين نفسك
طبعا صابني احببااااااااط رهيب وحسيت اني ابي اصيح على وقتي اللي راح وانا اشتغل ..
كل هذا وابوي يتابع ومبتسم وبدون تعليق ..
وقبل مااروح ناداني ابوي لحالي وحط بيدي مبلغ وقدره << لهالدرجه اكسر الخاطر..
وحلفت اني مااخذها واني مب محتاجه شي وانا اللي بسويه بس كهوايه مب لاني محتاجه ..طبعا ابوي يبي يسعدني ومايدري انه زاد الطين بله وطلعت من عندهم وانا بقمة الأحباط ..
اليوم الثاني اتصل فيني اخوي ..يعتذر ويقول لايكون زعلتك وكسرت مجاديفك قلت له والله انت كسرتهم ورميتهم بالبحر بعد .. قالي سوي اللي تشوفينه مناسب ..
……..
الحين انا متردده ومحبطه ..وابي شوركم

هل عيب اني اسوي شي أنا استمتع فيه وأتقنه وابيعه ؟؟ هل هالشي بينقص من قدري؟؟
وهذه بعض الصور لشغلي..

ودمتم بألف خير

9 thoughts on “سبعه صنايع والبخت ضايع (أبي شوركم)”

  1. نصيحتي انك تكملي وما تتوقفي .. لانه قمة النجاح انك تشتغلي في بزنس ويكون من هواياتك لانك بتبدعي فيه ..
    كملي وتوكلي على الله وشغلك حلو ما شاء الله ويمكن بالمستقبل تكبر هالهواية وتفتحي محلات هدابا وتغليف وتكوني ناجحة ومن الاسماء المعروفة بالسوق.
    واقرأي كلل قصص النجاح في عالم البزنس تلاقيها بدأت بفكرة بسيطة وشي صغير وكبرت وصارت محلات ومتاجر عالمية وماركات

    توكلي على الله وكملي وبالتوفيق ان شاء الله

  2. بصراحه أدهشتيني بشغلج وفنج حبوبه ماشاء الله ..

    وعلى كلام أخوج ،، يقصد إنج راح تهلكين أعصابج ،، وصحتج ،، وراح تُرهقين مع الأيام وضغط الشغل ..

    طبعاً هذا ماراح اتحسين به أول ما تبدين ،، التعب والإرهاق ،، بيكون بعد فتره يوم يبرز شغلج والكل يعرفج

    على العموم حبيبتي ،، إذا حاسه نفسج متشجعه ،، توكلي على الله وابدئي شوي شوي ،، وشوفي وضعج كيف بيكون ،، بعدين ممكن اتقررين إذا اتكملين أو اتوقفين

    مب خسرانه شي من التجربه

    موفقه يارب

  4. هل عيب اني اسوي شي أنا استمتع فيه وأتقنه وابيعه ؟؟ هل هالشي بينقص من قدري؟؟

    شغلج حلو أختي،

    لكن عندي إستفسار،

    هل السؤال اللي يهمّج هو كون الشغل عيب أو لا، أم هل أدخل في البزنس أو لا.

    أنا أسأل عشان أركز في نقطه معينه بدل نقطتين.

    همسه،
    أنا أقدر أفيدج بالنقطه الثانيه فقط. النقطه الأولى أحس إن غيري بيكون أقدر مني في توصيل وجهة نظره.

Comments are closed.