السلام عليكم ورحمة الله وبركاته…
اخواني كتبت هالموضوع حذر فيه اخواني من السرقة في الحرم …ا
نا طبعا مصدقت في يوم من الايام راح انسرق في بيت الله احرام اللي فيه حتى حرام الطير اتروعة في قول الله تعالى ( فِيهِ آيَاتٌ بَيِّنَاتٌ مَقَامُ إِبْرَاهِيمَ ۖ وَمَنْ دَخَلَهُ كَانَ آمِنًا ۗ وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا ۚ وَمَنْ كَفَرَ فَإِنَّ اللَّهَ غَنِيٌّ عَنِ الْعَالَمِينَ (97) من سورة آل عمران
المهم الجمعة اللي فاتت كان عندي شغل في جدة يومين وقلت في نفسي يالله اسوي عمرة في الحرم وارجع وكمل شغلي وفرصة اكسب اجر صلاة الجمعة في الحرم المكي,, واحد من شباب قالي مادمت رايح العمرة باسير معاك وبعدين انا باتم في مكة ونت ارجع جدة كمل شغلك والرفقة زينة قلت توكل على الله…..والحمد الله وصلت باليل انا وصاحبي كملنا العمرة ..في صلاة الجمعة فوق السطح صلينا الجمعة وبعد الصلاة طلعت المبايل اقرا فيه سورة الكهف لان القرآن مخزن فيه ..ولاحظت في شخص على يسار اشوي ظاك فيني بس قلت في نفسي ممكن زحمة مع انه مافي زحمة وايد لابس ثوب عادي وعمرة فوق 45 سنة ما اقدر احدد جنسيته لاني شفت بس نصف ملامح وجه ..المهم وانا اقراء سورة الكهف قامت صلاة الجنازه وبسرعة حطيت الهاتف في مخباي جه الريال (( يعني الحرامي )) ونا مندمج في الصلاة والدعاء ماحطيت في بالي هذا حرامي ولا صفر % وكان صاحبي على يميني والريال على يسري خلصت الصلاة وعلى طول شليت سيادة الصلاة وتحركت اقل من 5 امتار احط يدي في جيبي ماحسيت في المبايل فتشت في مخابي ماحصلت ورحت على طول مكان اللي صليت فيه قلت ممكن نسيته على الارض ماحصلت عليه قلت ممكن حد حصله تصلت عليه عطاني مغلق عرفت انه انسرق …قلت قدر الله ما شاء فعل …المشكلة مش في المبايل لكن الارقام والصور للي فيه اتخص شغلي ما تعوض ..
كتبت الموضوع وحذروا يا اخواني في الحرم ولا تأمنون… في ناس ما تخاف ربها ولو كان في مثل هالمكان الطاهر …والسموحة كان طولت عليكم
الله يعوض عليك
وانا في رمضان سرقو محفظتي وانا اطوف … بس الحمدلله لقيت المحفظة بدون البيزات 6500 درهم تقريبا…. كنت احاتي البطايق اللي في المحفظة
الحرم اكثر مكان للاسف يتعرض له الواحد للسرقه لان فيه جنسيات كثيره والحكومه السعوديه جاهده جزاها الله خير لتقليص هذه الظاهره لاكنهم لا يستطيعون القضاء عليها لان السعوديه يدخلها كل سنه مليونين او ثلاثه من جنسيات مختلفه يرد منهم النصف ويبقى النصف مجهول في البلاد ولببه يعين الحكومه السعوديه ويعوض عليك خير انشاء الله
وانا في الصيف للاسف ما ليقيت نعالي ما ادري هوه انسرق أو احد خذه بالغلط على كل حال الله يسامح الي خذه وتخيل تطلع من الحرم إلى السياره بدون نعال في عز القيظ عذاب
شرات اختي الذكيه … خلق الله كلها بزنانيب اتمشى وهي سايره الحرم بنعال طلعه …
هفووووووه
ولبست نعال الفندق
وصرقوووووه بعد
لين ما ابويه خذلها شاحوف …
حد محد افتكر يشله يابته وياها البلاد وميودتنه
عمره مقبولة إن شاء الله
وانا بالصيف رحت العمرة ، بأول يوم سرقوا نعالي اليديد ( وانتوا بكرامة )
اضطريت ارجع الفندق حافي