سرقوك يا عبدالفتاااااااااااح ،،،،، 105

* ياما قلنا حق شركة (ديار ) حطولكم مدير مواطن ،، خلوا عيال البلد يمسكون هالشركات ،، وإن سرق هالمواطن المسكين حده حده بيسرق مليون ولا ثلاثه ،، قلتوا لأ ،، الوافد أحسن ،، الوافد يفهم ،، الوافد متعلم ،، الوافد يشتغل ،،، سيروا الحين دوروا على بيزاتكم ،، وهذا ويهي ،، شفتوا ويهي ،، هذا ويهي إذا رد لكم البيزات ،،

* أنا ماعرف كيف هالناس تختلس هالبيزات ،، عنبوا ما يعرفون إن هذا حرام ،، مايخافون ربهم ،، ما يعرفون إن في حساب وعقاب ،، أنا ،، والله أنا ،، أنا لو كنت مدير بشركة بسرق على قدي ،، يعني مثلا ،، يوم بسرق سيارة العمال ،، ويوم بسرق قفازات العمال ،، وعقب اسبوع بسرق حديد الشركة ،، وبعد ماتهدئ الامور بسرق عشرين كيس اسمنت ،، وبرشي العمال ،، وبرشي مدراء الافرع الخارجية ،، وبسوي حفلات خاصة حق عيد ميلادي ،، يعني كل اسبوعين عندي عيد ميلاد ،، وبعزم هالشلة ،، وشوية نبيذ على شوية رقص ووناسة ،، وهوبا ،، أنا في العلالي ،، أما إني اسرق 200 أو 400 مليون مرة وحده فأنا مب قد هالسالفة ،، لأن هالسالفة يبا لها واحد وافد ،،، وانا شخص مواطن ،، والمواطن أحسن مايكون مدير؟؟

* لين ما يفتحون دفتر التحقيق ،، ولين ما تباشر النيابة العامة التحقيقات ،، ولين ما تنظر المحكمة في الحكم ،، ويعالم الله بيستأنف المتهم(المظلوم) ولين ما يعاد الحكم للتداول بتكون (الحوالة ) وصلت البنوك السويسرية ،، ويادار ما دخلك شر ،،

* نطالب الشركات ( المغرر بها) التواجد بمعارض التوظيف المنتشرة كإنتشار (الفقع) ،، وذلك للبحث عن مدراء مواطنين (وحط خط وثلاث شرطات تحت كلمة مواطنين) وكفاية غرور(على قولة عبادي الجوهر) ،، فكل يوم تطلعون لنا بطلعة وموضة جديده ،، يوم مدير روسي ،، ويوم مدير بولندي ،، ويوم مدير هندي ،، وشو فيه لمواطن مايكون مدير ،، هو صح يتأخر شوية عن الدوام( وهذي من العادات والتقاليد) بس على الاقل أحسن من غيرة ،،

* بنك دبي الاسلامي من أكثر البنوك اللي يحصل بها تلاعب (عيني عنك) ،، من باتيل الى التلاعب بالاسهم (طلعوا برائة الجماعة) الى الفضيحة الجديدة بتاعة ديار ،،، السؤال الان ،، أين إدارة البنك ، أين هم ،، هااااااااااااااااااااع أينننننننننننن؟؟؟

ملاحظة ،، من كثر لفلوس اللي تم سرقتها للحين ما قدرت أرقد ،، الساعة الان الثالثة والنصف صباحا وأنا أفكر كيف بيرجعون لفلوس من هالحرامي ،،،