قال رسول الله صلى الله عليه وسلم :
“رحم الله إمرئ سمحاً إذا باع ، سمحاً إذا اشترى”
سبحان الله بعض الناس وللأسف البعض منهم معانا في المنتدى 
تلاقيه متنرفز وحساس لآخر درجة إذا عرض سيارته للبيع 
وإذا إتصلت عشان تشتري السيارة
يعاملك كأنك إنت الفقير اللي ياي يخطب بنته الغنية
وإنك طمعان في فلوسه
يعني يوم بتسير له لا تقوله أبا اشتري سيارتك … لا
قوله : أنا طالب القرب 
والبعض منهم يرفض موضوع الإتصال تماماً
يقولك لأي استفسار أرسل SMS فقط
وإذا أرسلت يرد عليك بــ “نعم” … أو “لا”
واحد من الإخوان سألته سؤال وقلت له جاوبني بصراحة
الأخ إعتبر كلمة “بصراحة” إهانة له 
وواحد ثاني إتصلت أسأله عن سيارته
تخيلوا رد علي بسؤال : كم عمرك ؟؟ 
شو دخّل العمر في الموضوع ؟
قال أنا ما أبيع سيارتي لشباب صغار !!!!
مع إن سيارته سعرها في السوق ما يزيد عن 28 ألف
لو عنده بوجاتي … أكيد بيطلب مني صورة الجواز وخلاصة القيد وشهادة حسن سير وسلوك وكفيلين
وواحد ثالث يطلب (على سبيل المثال) 100 ألف لسيارته ويكتب قابل للتفاوض
وإذا عيبتك السيارة السيارة تسأله عن نهاية سعره
يقولك أنا دفعولي 99 ألف ولا بعت !!!
تقوله ياخي إنت كاتب “قابل للتفاوض” … كم مجال التفاوض عندك … 100 درهم ؟؟؟
وبعد كمن اسبوع تلاقيه منزل موضوع لنفس السيارة وكاتب (تعديل السعر) !!
يا إخوان اللي يشوف سيارته عزيزة عليه لا يعرضها للبيع أحسن
يحتفظ فيها 
كلااااااااام بالصميم
شكرا لك
لا حول الله
وصلت لهالمستوى !!!
يعني الحين طلعت عليه السيارة بـــ 44 ألف
ما نقول إلا عسى الله يهديهم
ومن قالك ياخوي ما استوت لي هالمواقف
لكن الحمدلله مب برع أبوظبي
والا الدم بيوصل للركب
لكن أكبر غلطة إنك تكون إنت البايع وإنت اللي تسير للمشتري
المفروض العكس
مشكلتنا إنّا نفترض حسن النية
وهذا اللي يخلينا نتعرض لمقالب سخيفة
أما بالنسبة للأوقات اللي يتصلون فيها
عن نفسي تلفوني مغلق من بعد الساعة 11 مساء
وفي بعض الأحيان من بعد الغدا إلى صلاة العصر
واللي يبا يتصل بين هالأوقات حياه الله
بكل تأكيد ياخوي
ما أنكر الشي هذا
تحياتي لك