السلام عليكم ..
في عندي موضوع براسي وحابب اني اتشارك معاكم فيه واخذ رايكم واسمع ارائكم
واتمنى ان يتم اخذ الموضوع بمحمل الجدية
هل نحن فعلا بحاجة للغرب من اجل تطوير بلادنا ..هل نحن بحاجة للغرب لادارة اعمالنا وتربية اطفالنا ..هل نحن بحاجة للمجتمع الغربي بأن يأتي داخل الدولة ؟؟؟؟
انا اتكلم فقط عن الاجانب الغرب والاوروبيون من دون الهنود و و و
شباب الامارات وين راحو ..شابات الامارات وين راحو ..التعليم اللي عنا والتعليم اللي اخذنا من اهلنا والعادات والتقاليد وين راحت..
من الافضل ..عمل بعثات تدريبية للمواطنين في الخارج أم جلب الوافدين الاجانب الى هنا
بالمختصر هل نحن بحاجة لهم
ليش نعتمد على الخصخصة وشركات الاجانب في قطاع الزراعة والتعليم والتطوير بكل شي , طيب دور المواطن الاماراتي وين راح؟
صح البعض منكم ممكن يحكي نحنا بحاجة لهم بسبب خبراتهم وطريقة عملهم , بس هم ما انولدو والخبرات فيهم, كل خبرة مكتسبة وبالاخير نحنا كشعب دولة احق لنا من ان نهتم بشؤونها
ملاااايييين وملياااااااااارات تنصرف عليهم وعلى رواتبهم وهم ببلادهم ما بحلمو بهالشي ابدا ابدا.
صح في انتاجية بس المفروض ان يتم تدريب المواطن واكتساب الخبرة وفقط ..ليس بالضرورة ان نعتمد كل الاعتماد على الاجانب.
هل من الممكن ان تكون التوعية ليست جيدة للمواطن ..هل المواطن الاماراتي يدرك ما مدى اضرار وجود الاجانب الغرب والاوروبيون في الدولة ؟ , هل المواطن الاماراتي في وعي تام ان عليه حقوووق تجاه الدولة وشعبها؟
المواطن الاماراتي انسان , والاجنبي انسان ..لكن الاجنبي ما رح يخاف على الدولة مثل الاماراتي
اتمنى تفاعلكم مع الموضوع واسمع ارائكم
ملاحظة : التعاون حلو بين الطرفين وحلو تبادل الخبرات والشغل بس ما تصول لدرجة ان الانسان الاجنبي يطغي على الانسان الاماراتيو وتوصل معاه لدرجة الاستخفاف بحقوق المواطن او عقلية المواطن
اتقبلو تحياتي والسموحة
الحمدلله الدعم متواجد من الحكومة ..والتركيز يرجع الى المواطن نفسه
المواطن يحتاج للتوجيه والوعي القوي ..على سبيل كلام اخونا القناص ..لازم يكون في وعي في مجالات الهندسة والتصميم والبناء والكهرباء لمعرفة المواطن في اهمية هذه المجالات.
قولي الحمدلله على الدعم اللي نحصله من الحكومه..
كيف ماشي دعم للشباب.. الحمدلله الدولة موفرة للشباب المدارس و الجامعات
و فوق ها تقولين ماشي دعم…!!! اللي عليهم سووه و الباقي عالشبااب
و اللي يبا الدح مايقول اح الحياه مب سهله و اللي يبا يتفوق عالكثيرين لازم
يساعد نفسه و يحاول يلم بمجال العمل اللي هو فيه.. حطي في بالج
شي واحد.. التعليم عنا والله سهههههههل و السستم الدراسي مافي احلى منه…
شوفي جامعات برع بعطيج مثال النظام الاسترالي 70% على الطالب و فقط 30% على
المحاضر و الباقي تسوينه روحج تردين البيت و تقرين و تعتمدين على
نفسج عسب تكتسبين خبرة و ثقه بالنفس مب اعتمااااد كلي على المدرس..
و بقولج شي واقع و حاصل عشان تعرفين انه شبابنا يحبون الشي اللي اي بالساهل
طبعا هالكلام ما بعممه عاليميع بس يخص فئه تعكس تفكير الشباب اللي عنا
في استراليا.. ياما شباب غيرو جامعات قويه و دشو جامعات سهله
تدرين ليش؟ يبون النجااااااح!! ليش الهروب من الجامعات اللي فيها دراسه اقوى و اللجوء
الى الجامعات اللي بالدز و حيالله خلص عمرك و بتحصل الشهاده و بترد البلاد و بدااااوم
و اخر شي حاط في باله الناس بتقول فلان عنده شهاده من برع و فااهم
اذا عنا هالفئه تفكيرها سلبي و تبا اسم فقط الشهاااااده عشان عقب التخرج يفلحون
و اساسهم غلط و يبون كل شي بالسااهل و عقب يقولون ليش الأجنبي افضل من المواطن!!
الدولة بعدها الحمدلله موفرة الخير للمواطن في شتى المجالات
اهم شي الواحد يكون مخلص و يسوي كل شي بحسن نيه و ان شاء الله الانسان بيلاقي اللي يطمح له
اللي يتقاعس عن العمل و الكسول دوم يشوف كل شي سلبي و الحياه ضده
بس الي يكافح و يتعب بتتيسر له امور وايده و بيكون متوفق من عند الله و بيوصل
للي في باله و اللي يخطط صح من البدايه بيحقق النجاح بإذن الله…..
و الحمدلله عايشين بنعمة في بلادنا
والله شبابنا وبناتنا أشطر وأذكى عن الاجانب بس محد يدعمهم وموب عاطينهم فرصه..
حتى لو ماعندهم شهايد ومادارسين شي مخهم امفتح ويرومون يتعلمون بسرعه…
هالشي حاااصل حتى في الدول المطورة مب بس دولتنا
تعالو يعطيكم اكبر مثاااااااال استراليا و اعتمادها على 70%
على الاسيوين بس شوفو التطور و الثقافه و تطبيق التكنلوجيا
ماشين صح مب معناته عنا اجانب انيبهم من برع و بيكون هالشي
مب لصالحنا !!
بس في فرق بين المواطن و الاجنبي صراحه و بدون
حياديه لو تشوفون معظم الاعمال الشاقة مثلا في استراليا
من بنائين و صباغين و سباكين يكونون استراليين هم نفسهم
تشوفه ينش الصبح عز الفير و و يكون حاب الشغله اللي يشتغلها
و تبا تطور نفسك صرااحه حب شغلتك و طور نفسك بنفسك
و هني بتي الخبرة و بتكون افضل من الاجنبي و بتثبت للدولة
انك شخص مهم و طموح بس اللي يتريا ترقيات و يقول بيشلون
الاجنبي و كلام فاضي صراحه لا يودي و لا اييب اي نتيجه و بالمختصر
المفيد ادرس اقرا ثقف نفسك و بتشوف الخبرة مووجوده ان شاء الله
بس مافي دولة تعتمد على مواطنينها 100% يمكن اليابان تعتمد
اعتماد كلي على مواطنينها لانهم عباقره و صناع بس شوفو حتى
امريكا اكثر الدكاترة اللي يسوون بحوث و تجارب من جنسيات ثانيه
اتيبهم امريكا و تاخذ خبرتهم و تخليهم ينجزون شي و في النهاايه
الانجااااااز يكون باسم الدولة و اسمحوولي على الاطااااااله
مداخله بسيطه مني كغريب عن البلد بعد اذنكم
طبعا المواطن يوم يحس بضيق مكانه الي هو احق فيه بكل تاكيد بيكون عنده ردة فعل .
شفت كثير من النقاشات الي تتكلم عن الزحمه وعن العماله وزيادة عددها فالامارات .
اول شي اخواني لازم تحطون في بالكم شي مهم وهو أن الي يصير حاليا هو اعداد بنيه تحتيه للدوله وفق خطه واستراتجيه تقتضي انجاز بنيه متكامله تكفي الوطن والمواطن الى ما بعد عشرات السنين
وذلك يتمثل في ما ترونه من مشاريع كبرى في شتى المجالات . يعني بعد 25 سنه ستجدون عدد المواطنين لا يقل عن 4 او 5 ملايين نسمه ويجب ان تكون البنيه التحتيه والاساسيه مجهزه لذلك .
وكل م يحصل حاليا هو اختصار لسنوات طويله لكي لا يبقى الاجنبي موجود بحجة تطوير وبناء بل سيكون كل شيئ جاهز .
ولكن هنا لابد من أن يكون المواطن نفسه موجود في كل المجالات اللتي تحتاجها الدوله للاستمراريه بواقع متطور .
مثلا وبالعدد كم عدد الشباب المواطنين اللذين يرغبون بدخول مجال الهندسه المعماريه ؟ او المدنيه ؟ ولماذا البعد عن مثل هذا المجال
عدد فنيين الاتصال ؟ و عدد مهندسي الميكانيك
وغيرهم من الفنيين الضروريين في كل المجالات
لماذا الاتجاه ومن جميع الفئات الى المجالات الاداريه ؟ من اللذي سيكون فني اذا لم يكن المواطن فني ؟ ومن هو المهني ؟ ومن هو الصناعي ؟
الغياب عن كل هذه المجالات يحدث فراغا يجب ملؤه باصحاب الخبره .
غياب المواطن عن اي مجال سيفتح الباب لغيره للدخول فيه .
لذلك انصح الشباب بالتوجه للتعليم المهني والفني لكي يكون لهم دورهم في اكمال مسيرة البناء وملئ اي شاغر يتوفر لذلك .
والسموحه منكم