شباب المنتدى الكريم …
هناك أمور عديدة يمكن عملها بعد شراء سيارة جديدة وأنا لقلة خبرتي بها أحببت أن استعين بالله ثم بكم …وإن شاء الله إنكم ما تخيبون ظني وتشاركونا بخبراتكم وشوركم الطيب
شريت سيارة فورويل جديدة … وأنا من النوع اللي ما أودي السيارة إلا الوكالة أو الغسيل … ما أعرف أمور ضد الصدأ والتنجيد وغيرها …
… عندي كم سؤال وأحببت أن أتشرف بإجاباتكم إن استطعتم:
1- ضد الصدأ: سيارتي بتوصل من بهوان الأسبوع الياي … شو سالفة مادة ضد الصدأ ؟ وهل هناك أنواع ؟ وين أسويها ؟ في الوكالة أو تنصحون بمكان معين ؟ طبعاً بوظبي فقط …
2- بلاستيك الأرضية: شفت بعض الشباب حاطين بلاستيك شفاف على الأرضية في الدبة وعند الكراسي الكراسي الخلفية ؟ شو أفضل محل يسوي هالشغلات ؟ الشباب نصحوني بمحل المرزوقي ببوظبي ؟ شو رايكم ؟
3- كراسي السيارة: شباب شو أفضل طريقة للحفاظ على جلد السيارة ؟ اقصد إني شفت بعض الربع حاطين غطاء …. شمع أو قماش أو جلد بس طبعاً موب أصلي أو غيره .. شو رايكم وهل هناك محل تنصحون فيه حق هالشغلات
4 – مخفي السيارة : ما أعرف إلا لمسات وما جربته .. شو شوركم في العازل الحراري للسيارة و شو أفضل نوع وأفضل محل يسوي مخفي وهل يوجد ضمانات ؟
5- الخطوط وصبغ السيارة: أنا أداوم في منطقة نائية وعن الخطوط لا تتخبر … شو أفضل حل للحفاظ على صبغ السيارة إذا كنت أضرب خطوط يومياً أو أسبوعياً ….
أشكر لكم تعاونكم وإن شاء الله تعم الفايدة للجميع …. و إذا عندكم خلفية عن الأسعار يا ليت تخبرونا ترى الدفعة الأولى فضت جيوبنا … 
… لكزس فورويل
مبروك على السيارة الله يعطيك خيرها ويكفيك شرها
بو يموع الكريم
وعليك السلام والله يبارك فيك وفي الجميع… أنا اشهد إن الجميع ما قصر …. أنا ودي أشوف خيارات متعددة خصوصاً حق الأشياء الغالية مثل الزيبرت … تدري الميزانية عالحديدة …
أنا عندي مثل يموع خمسة صغار …. وسيارتي الأولى الفورويل رغم إن شريتها من الوكالة …. خلوها تقول باص نقل عمال
هههه
أنا ودي أحافظ عالسيارة قدر المستطاع …. يا أخوي شارع السلام تقول حراج سيارات من كل الشباب الطايحين عند محلات الزينة … وأنا عمري ما سويت شيء حق سيارة غير تشييكات الوكالة .. حبيت أتطور شوي
السلام على الجميع والف مبروك على السيارة والله يعطيك خيرها ويكفيك شرها
الاخوان ماقصروا في النصح……… وللزيادة في المعلومة فيه محل في مصفح اسمة ورشة المقطع متخصص في الزيبارت وحماية واجة السيارات من الخطوط.
اما بالنسبة للجلد في رايي انك تستمتع فية مش تلبسة قماش او شمع ……………….
وبالتوفيق
أخوي الرميتي …
وعليك السلام و الله يبارك فيك يالحبيب … ما قصرت والله … بس غالي وايد هالزبرت … أحين هذا 6000 والمخفي حول ال 4000 من لمسات … والله حالة … والله فلسنا …
أشكرك على عرض رقمك .. وما تقصر والله ….. وإن شاء الله نشوف باقي خبرات الشباب للاستفادة أكثر ……