السلام عليكم
يا جماعة الخير أريد أشتري سيارة عن طريق كوبارت لكن ما أعرف كيف طريقة التسجيل ودفع الرسوم و إختيار طريقة الشحن والمصداقية حقتهم
أرجو ممن إشترى وجرب ألا يبخل علينا بالتفاصيل والنصائح الله يبيض وجهيكم يا النشامى واللي عنده معلومة صغيرة هم لا يبخل .
الله يخليك و يطول بعمرك شيخي
بخصوص الكرفانات … فهن انواع اذا a
يفرق عن b
يفرق عن c
ال اي يكون هو موتر و كرفان و بعض انواع البي بس اغلب السي يكون كرفان منفصل
عن الموتر … والله انا اشوف انك ما تاخذ غرقان .. خاصه اذا كان اي او بي … يمكن سي لانه يختلف عنهم يبالك تقلصه .. بس ما تضمن انه تلفزيون ولا ثلاجة ولا مكيف باجر يخترب عليك و بيني و بينك منو بيصلحلك باجر مثل هالسيايير هني فالبلاد
انا اشوف تاخذ صاحي موديل 2001 او 99 اي يكون احسن و ارخص بس عاد الشحن غاااااالي لانه مب بالكونتينر ينشحن …. في شي يسمونه شركات الشحن رول اون او رول اووفر …. يعني السيارة تنشل و تنحط بدون كونتينر و ياخذون مواصفات السيارة و الحجم و تدفع وايد وايد …. ماعرف اذا في شركة شحن رخيصة بس اسئل … و قول حق الشاري ابا شركة موتر هوم مب شحن عادي و الله يوفقك
و السموحه مره ثانيه عالاطالة
ما شاء الله عليك اخوي على كيف كيفك
كفيت وفيت ونصايحك الصراحه تنشراء بفلوس
بس حبي اسألك عن الكرفانات شفت عارظين بس اكثرة غرقان
شو رايك فيهن وكيف شحنهن للبلاد
مشكور على النصيحة يالغالي … بس وش رايك بهذه الشركة exporttrader.com !!
بسم الله الرحمن الرحيم
اخوي الشراء من كوبارت او من اكسبورت تريدر بيني و بينك ما ينفع و احسنلك تاخذ من هني
اولا مسالة الشراء اذا بتاخذ السيارة ارخص عن جيمة البلاد ب10 او 20 او حتى 30 الف
يبالك تصلحها …. و عقب عندك مسالة الشحن … اذا بتشحن لين الامارات على حسب الشركة الي تشحن منها تاخذ قول ما بين ال1500 دولاار لين 4000 دولار … في شحن داخلي يضربونه ,,يعني نفرض انك اشتريت من تكسس و الشركة الي تعاملت وياها تشحن من لوس انجلس بيضربون عليك شحن داخلي (مرات يكون والله اغلى عن الشحن لين البلاد ) ما بين 200 دولار لين 2000 دولار بعض الاحيان يوصل …. و اذا اشتريت السيارة يوم الاثنين مثلا لازم تشلها خلاث ثلاث ايام ولا بيتمون يحسبون عليك بيزات .. ما اذكر والله 10 دولار او 20 عن اليوم الواحد … لين يتفيجون شركة الشحن اييون و ياخذونها بعد تراك بتم تدفع …. المهم كمل المسلسل : و السيارة توصل الميناء و انته مستانس يحليلك … بييون و بيقولون لك تعال يا حبيبي و ادفع رسوم تخليص معاملات و ستور (تخزين)فالمينا و ووو يطلع عليك مال 1000 حوالي …. ماعليه و يقولون لك السيارة خلال 4 اسابيع بتوصل و اذا انته متعامل ويا الشركات الرخيصة فالشحن يعني اكيد بتاخذلها اكثر عن 4 اسابيع …. ( على فكرة مرات الكونتينر يشل ثلاث سياير و هم سعرهم بالكونتينر مب بالسيارة ) يعني مرات اذا الكونتينر ب 7000 دولار تروم تشحن فيه ثلاث سياير و هم ما يخبرونك يطلع عليك ارخص )
المهم وصلت السيارة “” العروس المدقدقة “” الي انته تتحرقص و تترياها … يووك و قالولك لو سمحت تعال ادفع رسوم تخليص اوراق و مادري اييش … انته مستحييل تعرف الاجرائات لانك ما اداوم فالجمارك و بتقول لا ( لانك وايد دفعت ) و بتسير مينا جبل علي ( مثلا) و بتقول اونه عاد انا روحي بخلص امور السيارة … و بتسير و بتتبهدل ( اجازة من الدوام و حالتك حاله … الخ ) …
المهم المينا ياخذون عليك 5% من قيمة السيارة و انته عندك فاتورة كوبارت تقول حق الجماعة السيارة شارنها ب 100 الف ها اندوكم 5 الاف جيمة ال 5 % …
حط في بااااالللللك انه عاااااادي جدا يقولولك لا نحنا ناخذ جيمة السيارة في السوق المحلي !!!!!!!
يعني لو السيارة ب 140الف هني و انته شارنها ب 100 يقولولك هات ال5 % مال 140 ….. ههههه والله بتتخبل …. المهم اول مره ما عندك خبرة بيقصون عليك شركة الشحن او وكيلها هني و بيقولولك بنوديها بونج … وين تبانا نوديها ؟؟ طبعا بتقول الكراج الفلاني ( لان السياره فيها بمبر و ضربات خفيفة فالبودي .. على حسب تقرير كوبارت و على حسب الصور )
يمكن تنصدم و تشوف اشيا غريبة و عجيبة فالسيارة ما تتوقعها
بييك راعي الكراج و بيقولك “”” يا استاز فلان سيارتك بدها تصليح شاصي و فيها لييك فالجيير و فيها و فيها “”” و اشرب يا حبيبي المهم انته بتم تحايل الريال عشن ينقص لك “” يا ريال صلح ب 10 ولا ب 20 لين ما الحبيب راعي الكراج يوافق و بقولك تأبرني خلص اتفأنا “”
صلحت السيارة و يييت بتسوقها بتكتشف البلاوي الي فيها (( الا مسجل ما يشتغل … ولا حزام ما ينربط … ولا شو ما يكون شي بسيط حتى راعي الكراج مايدريبة ))
وديتها و سجلتها و عقب قلت خلني ابيع و اشوف كم بتيب لي
( لا تنسا السيارة الوارد امريكا لو ارخص تكون دايما اقل من سعر الخليجي )
نفس العروس تنباع فالسوق ب 140 الف …. انته لين الحين قول مخسر 120 الف
و انته صاحب امانه و للاسف ضاعت الامانة هالايام و زاد الغش و الخداع على شو … على وصخ دنيا
لازم تقول حق الشراي ياخي ترى السياره كان فيها جذه و جذه عسب الله يباركلك في بيزاتك
مب نفس مال المعارض … سيايير غرقانه و متكنسلة يصلحونهم و يغشون الناس ( الا من رحم ربي )
اووه صح نسيت اقولك لااااااا تفكككككر حتى تاخذ سيارة غرقانة
طبعا الناس ما يحبون حد يكون امين و صريح هههه يوم يقولهم كانت مدعومه و عدلت البمبر و الشاصي و الخ
يقصونك بطريقة غير طبيعية فالسعر
و انته طبعا لا حول لك ولا قوة ااخر شي بتبيع و السالفة كلها اخوي ::”” بتطلع عليك اغلى عن بيع السوق “”
ما يسوى التعب ولا تسوى البيزات و لا حرق الاعصاب كانو بعض الشباب يقولولي سير و خل يفحصون السيارة انته ما تغشهم ! بس والله ما بغيت ااكل عيالي اموال اذا مب حرام عالاقل شبهه
يا خوي اسال مجرب ولا تسال طبيب
اذا حق تجارة ترى ما ينفع … لازم تكون صاحب كراج و جذاب و بين ال100 سيارة وحده تكون لقطة
خذلك وحده من هنه … انا بديت في هالشغله و صارتلي كل هالامور قبل الازمة العالمية اقولك يمكن شوي سوق السيايير
كان احسن و جربت و غلطت و تعلمت و بعد الفايدة كانت 2000 درهم الى 5000 درهم… اما الحين بعد الازمة نصيحة مثل ما يقول المثل سير بعيد و تعال سالم …
اذا مصر انك تاخذ من هناك مثل ما قالولك الشباب لااااازم يكون عندك حد يشيك عالسياير ( بس المشكلة لو عندك حد في نيويورك و انته اشتريت سيارة من فلوريدا لازم الريال يطير بالطيارة 3 او اربع ساعات ) يعني الشخص الي هناك ما ينفع يكون طالب او حد يشتغل لازم حد متفيجلك و بيني و بينك محد بيسويلك هالشي لسواد عيونك … الريال اذا بتشركة فالربحية ( هذا اذا حصلت حد ) عقب بيسير و بيدور و للعلم بعض الرحلات في امريكا فرضا من واشنطن لين كاليفورنيا 5 ساعات بالطيران الداخلي !!! يعني نفس الوقت المستغرق بين لندن و الامارات !!!!
انا اقولك هالشي من تجربة حيث اني يبت حوال 7 سيايير ….
و هالايام التاجر فالسوق ياكلك و البايع ياكلك
حاسب و اذا عندك كمن بيزة سير افتجحك محل شاي كرك احسن لك و الا اشتغل فالسياير الخليجية
ادري اني وايد رمست … سامحني جدا على الاطاله
بس مابا حد ولد البلاد يستويبة نفس الي استوابي
السلام عليكم ورحمة الله وبركاته
موشكورين … أخوي majelan … بس بعد ما تسجل وتفوز بالمزايدة كيف تخلص أمور الشحن وغيره؟ هل هم يخلصولك السيارة؟
مشكور