شمام سعره فوق الــ150 عندنا..

دخلت احد المواقع الاقتصادية المشهورة..وكتبت كلمة اليابان بمربع السيرش وهي عادة لازم اسويها..

في كل موقع لازم اسوي هالشي حتى منتدى الامارات للاوراق المالية ما سلم مني..

المهم وحصلت هاييك الموضيع الحلوة ..في الموقع الاقتصادي ومنه هذا..

افتتاح أول متجر للفواكة اليابانية في المنطقة

تحت رعاية وتنظيم الحكومة اليابانية، جرى افتتاح متجر “أوشي نيبون” في الطابق الأول من مركز فتوح الخير. ويختص هذا المتجر الأول في العاصمة أبوظبي والمنطقة ببيع وتوزيع الفواكة والخضراوات اليابانية عالية الجودة.

وحنيت على ريلي طول الاسبوع ودني المحل يوم بنسير بوظبي.. وكل شوي اعيد وازيد عشان ما ينسى..لان الرياييل وايد ينسون..

يا اليوم اللي رحنا فيه للعاصمة الحبيبة..وريحنا شوي بالفندق لانا واصلين متاخر..

وثاني يوم ركض على فتوح الخــير..وندور المحــل مني مناك ..صراحة خذ منا وقت لين حصلناه

تدرون ليش؟

طلع محل قد باركن سيارة وحدة.. حولت عيونا واحنا ندور عليه ..

انا عبالي محل عود شرات الجمعية وكارفور وهالسوالف..

المهم بعد ما تفاجأنا بحجم المحل..قلت يلا ما عليه اهم شي الطعم..اكيد حلو دامنه ياباني..

وقعدت اجرب من هني وهناك..صراحة طعم فواكهم لذييييذة وشكرية.. مب شرات مالنا اغلبه ماله طعم..

وبعد ما استمتعت بتذوق الفواكه..قلت يلا شرينا شرينا,,

وقبل ما اختار شو بشتري..سالتها عن سعر الشمام..الحبة يعني..

قالتي 180 تقريبا مب متاكدة بالضبط من سعرها بس هي بين 160-180..

انصعقنا انا وريلي..من السعر المبالغ ..شوفيها ذهب ولا الماس
وحتى لو مشحونة من بعيد ما يوصل السعر جي..

قلت يلا خل اسال عن سعر فاكهة ثانية..لعل وعسى يطلع سعرها معقول..
وسألت عن فاكهة اهيا خليط بين التفاح والبرتقال اظني..اهيا غريبة نوعا ما بس لذيذة..

ولا الصدمة الثانية اللي تيينا وتضرب فوق 120..والفاكهة قد حجم التفاح العود..

صراحة رحنا عنهم..مع ان خاطري اشتري لو ريلي ماقال لا …

بس وايد وايد مبالغين بالاسعار..قلنا ياباني و اصلي هب تقليد بس مب جي

وفي النهاية ماظني حد يشتري عنهم ..وخضرتهم بتخيس..لول

بس مابا اظلهم فواكهم عجيييييييبة ولذييييييييييذة وغريبة

واللي ناوي يشتري يطرش صوبنا