شو اريكم في معهد ادنوك ؟

22 thoughts on “شو اريكم في معهد ادنوك ؟”

1. السلام عليكم ورحمة الله وبركاته . .
   هلا أخوي .. ~
   بخصوص أدنوك ..
   عندك معهدين ..
   معهد ادنوك الفني : لحملة شهادة الاعداديه .. يعني من ثالث اعدادي وطالع .. ~
   المعهد البترولي : لحملة شهادة الثانويه القسم العلمي فقط .. وتقبل الثانويه الصناعيه ..

   أول شي معهد أدنوك الفني .. ~
   ما انصحك به .. لانه شهادتك بتكون ثانويه صناعيه ..
   وبعد يوم تداوم لو بغيت تكمل جماعي .. تقريبا فالسنه يختاروا لهم 5 اشخاص
   من كل شركه لي هن تعب ادنوك . .

   ثاني شي المعهد البترولي .. هذا سالفته سالفه ..
   طبعا القبول فوق ال70 % بس هم فالحقيقه يقبلون فوق ال80 %
   التخصصات الموجوده :
   هندسه بتروليه
   هندسه كيميائيه
   هندسه ميكانيكيه
   هندسه علوم أرض (Geoscience)
   هندسه كهربائيه
   هندسه علم المواد قريبا (Material science)

   احسن تخصصين في المعهد من وجهت نظري
   المكانيكيه والكهربائيه ..
   هالتخصصين مطلوبين وبكثره في ادنوك .. وخارج ادنوك ..
   عند الهندسه البتروليه محدوده ف أدنوك بس ..
   لاسمح الله طلعت او شي وين بتروووح ؟؟

   وبعد في اداره الهندسه الميكانيكيه والكهربائيه ينزلون
   الكورسات كل سنه وبشكل منظم اما فالتخصصات الثانيه .. لك عليهم شوي ..

   المعهد بصراحه ماعليه كلام .. من دراسه وطلاب وكل شي
   الحين هالمعهد عنده خطط انه يجمع فيها جنسيات كثيره يعني International
   بيسوون استقطاب للطلاب من اليابان وكوريا وامريكا وعدة اماكن ..

   الدراسه في المعهد يباله شد حيل ..
   يعني في بعض الدفعات تحصل 300 المقبولين والمتخرجين 30-50 مهندس فقط ..

   عندك بين فتره وفتره تنزل قرارات يديده في المعهد تخرب على الطلاب ..
   من هالقرارات ..
   المكافآة .. المواصلات .. الاكل ..
   وطبعا وانته كطالب يديد لازم تعاني شوي .. ولاتنسى الدراسه
   لانه همها هم .. وبعد لاتنسى التوفل 500+ وفي احتمال انه يرفعونه ..
   وبصراحه أحلى شي في المعهد ..
   أنه من تخلص تتوظف على طووول ..
   وأقل راتب ممكن تحصله وانته تداوم فالحقول البريه او البحريه
   مابيقل عن 40 الف درهم .. ومع السنين بيزيد .. بس شد حيلك ..

   ولو في أي شي حاضرين .. ^^

   بن سعيد

2. تسلمون شباب على الردود

   الحمدلله استفاد منكم وماقصرتم انا خلص قرر ادخل ادعولي بتوفيق

3. السلام عليكم ورحمة الله وبركاته

   مشكورين أخوننا الكرام ع ردودكم وتواجدكم معانا وأنا الحمدالله أستفدت منكم وإن شاء الله أخوي راااك أستفاد بعد

   ثانكس

4. شوف اخوي ,اذا كنت تملك ضروفك وتقدر اتكمل دراستك الجامعية نصيحة من واحد درس في معهد ادنوك و اشتغل في الحقول البحرية لاتقرب صوب المعهد .بسبب انك اذا توضفت وانت جامعي غييييييييييير ,يعني حتى لو انك تعينت في الحقول بعد كمن سنة بتكتسب خبرة على شهادتك و تقدر تنتقل الى المكاتب بسهولة اكثر وبمركز حلو بعد.

   لكن اذا كانت ضروفك ماتسمحلك اتكمل دراستك الجامعية فالمعهد مكان مناسب جدا لاكتساب مهنة فنية مطلوبة بشدة في شركات البترول و رواتبها ممتازة و تقدر بعد كمن سنة اتكمل دراستك في الكلية التقنية,بس لازم اتعرف ان ضروف العمل في حقول البترول متعبة بسبب البعد عن الاهل والاصدقاء

   و في النهاية اخوي لاتنسى الاستخارة

   و تمنياتي لك بالتوفيق

5. خذها قااعده اساسيه في راسك..

   اذا تبا تدش المعهد البترولي لازم تنسى حياتك مده فتره دراستك واتكون متفرغ للدراسه فقط..

   يعني الطالب عندهم مثل الكمبيوتر ، يعني لازم يكون stand by 24 hours

   وها الكلام هب من فرااغ دفعتي كلهم طلعو ( ها الكلام قبل 6 سنين تقريبا ) ،

   اللي ظهر من اول سنه ( طبعا هذا انا ) ، واللي ظهر عقب سنتين واللي عقب ثلاث .. الا واحد لين الحين يجاهد وياهم وحليله..

   في الاول والاخير الشور عندك..

   انته تختار

Comments are closed.