السلام عليكم
ودي الشباب اللي يحبون يساعدون في هالمنتدى الطيب أن يشيروا علي في التالي:
أنا رجل أستعمل السيارة بكثرة يعني عادي جدا أسوق لمسافة ما يقارب الـ 80000 كم في السنة و هذا بسبب شغلي البعيد شوي من مسكني ، و لهالسبب قررت آخذ لي سيارة تكون قوية و متينة و في نفس الوقت فيها معايير سلامة ممتازة ….
و بعد البحث و الدراسة في السيارات وجدت أن أفضل سيارة في نظري هي اللكزس و قلت بتوكل على الله و بشتريها.
الحين أنا محتار ، و السبب اني ما حبيـــت اللكزس بالشكل الجديد 2007 و 2008 أبدا و لا أقدر أبلعه نهائيا و أقصد الشكل الخارجي ولاّ أنا أعرف أنها من الداخل مثل ما يقولون (خيـــال) !!
و قمت أفكر آخذ الشكل اللي قبل هالشكل الجديد و اللي في عيني هو شئ فخم و يستحق الاحترام
و دام أن هالمنتدى منتدى سيارات فقلت بدردش فيه ويا اخواني و بشوف شو رايهم قبل ما أتوكل على الله و أشتري السيارة
فشو تشورون علي؟
على فكرة النقاش مش لازم يكون في الشكل الخارجي بين موديلات لكزس و لكن اللي عنده خبرة ينورنا بأي علم عنده و جزاه الله الف الف خير
أخوي الـ sa7er
أنا أبغيها للخطوط و للدلع واللكزس لاشك انها قدها و قدود
و لعله كلامك صحيح بأننا مع الوقت ممكن نتقبل الشكل الجديد….الله أعلم
السلام عليكم ورحمة الله وبركاته
والله اخوي تبى النصيحه .. خذلك اليديد وتوكل على الله .. يمكن شكله مب لين هناك بس لازم لازم ينحب للجميع .. مثل ما صار مع الأس اليديد اول ما نزل مب حلو بدون اي ام جي كت .. و الحين تقول تكسي .. والكزس ما عليه كلام .. و يتحمل كل شىء ..
موفق وما اذكرك بصلاة الأستخاره
أتمنى من لكزس اصلاح العيب الشنيع و هو تسرب الهوى من الباب الأيسر لداخل مقصوره القيادة
و الحقيقة أفضل لكزس 2006 من حيث الشكل و الأناقه الخارجيه و ندرة الأخطاء المصنعيه
توكل وخذ اليديده سياره ماعليها كلام ومع السنين بيعجبك
بس يقولون انها شرات الكامري يوم تسرع يدخل الهوى بس توكل على الله وخذهااا
السلام عليكم
اخوي اذا كنت تبا سيارة بس حق خطوط خذ لك سيارة عملية غير اللكزس يعني سيارة رخيصة و تتحمل الدروب.
بس اذا كنت ادور على سيارة فخمة و حق دلع انصحك باللكزس اليديدة. لا تقول ان الشكل ما عيبك لانه اول ما نزل كلنا ما تقبلنا الشكل اليديد و قلنا الشكل الجديم احلى .
مثل ما نزل الاستيشن سنة 98 كلنا قلنا ان الشكل الجديم احلى بس في النهاية بتتقبل شكلة اليديد و بتحس ان احلى من الجديم.