شو رايكم بنظام الغاء نظام الكفيل في الامارات مثل البحرين والكويت ؟

15 thoughts on “شو رايكم بنظام الغاء نظام الكفيل في الامارات مثل البحرين والكويت ؟”

1. العامل الواحد يكلف صاحب العمل تقريبا 7800 درهم من قامه وتأمين بالعمل وتأمين صحي واستخراج هوية

   تخيلوا اني جبت تقريبا 10 عمال راح يكلفني هالموضوع 78000 الف درهم

   منهم 3 غيروا وظائفهم على حسب القانون اليديد يعني خسرت انا تقريبا 14400 درهم كون الضمان ال3000 راح يتم لي بالعمل
   انزين مين راح يعوضني هالخساير ؟

   بصراحه هالقانون راح يأثر على اصحاب الاعمال وبيخلق مشاكل بالمجتمع الاقتصادي

2. الكفالة حماية للمواطن والوافد والقرارات الصادرة من وزارة العمل اغلبها في صالح العامل يعني الحين العامل مايحتاج موافقة كفيل لنقل كفالته

   وبعدين ماحد يسجن حد بدون سبب والسارق والسارقة فاقطعوا أيديهما بحسب آية من آيات الله

   بخصوص التعليم والشغل عند الوالد ولا أخوك المفروض يكون عادي مب معقد

3. معروف من زمان ان نظام الكفيل المتبع حاليا تعتبره حقوق الانسان مثل نظام العبودية فالعامل مايقدر يشتغل باي مكان إلا باجراءات ورسوم غالية جدا والانتقالات محدودة

   ليش مانكون مثل امريكا برقم الضمان الاجتماعي اي واحد يشتغل باي مكان بهالرقم بدون اجراءات بلا معنى

   ويكفي قسوة مراجعة العمل والعمال والجوازات والي عنده عمال او مندوب يعرف كم يعاني المراجعين من الاذلال والتأخير بإستلام طلابتهم وكيف الموظفين يتعاملوا معك وكإنك تكلم وزراء

   مرة من المرات كنت اراجع لمعاملة بغرفة تجارة وصناعة ابوظبي -الجوازات – وصلت الساعة العاشرة والنصف واخذت رقم كان بيني وبين الرقم الي على الكاونتر حوالي 22 من الساعة عشر ونص للساعة 2.30 يادوب تحركوا عشر ارقام وبالاخير وبالرغم ان الدوام ماانتهى وقفوا استقبال الطلبات لا والموظفة الموجودة – حسبي الله عليها- اشرت على المتواجدين والي طبعا كلهم مستثمرين وشركاء بالدولة وقالت هذولا ليش قاعدين هنا وقصص الكثير والكثير

   تخيل ان اذا والدك او صديقك عنده محل وحبيت تنزل تساعده بالعمل او تشرف على امور العمل او حتى تتعلم وتاخد خبرة بهالحياة وجاء العمل والعمال يحطوك بالسجن وغرامة وبهدلة طووووويلة وانت تنزل تساعد والدك بشغله او تتعلم منه يعني مابعرف كيف باي قانون بهالدنيا ممنوع الابن يساعد ابوه بالشغل

   الغاء نظام الكفيل اريح للاثنين وبتوقع رح يعتمدوا على بطاقة الهوية كبطاقة ضمان اجتماعي مثل امريكا

4. نحن عندنا النظام يخدم العامل والموظف الوافد
   ويحمل المواطن كل البلاوي والخساير ويحرمه حتى من محاولة حفظ حقوقه

   ألحين كل المسؤلية على المواطن الفرد أو الشركة
   وإذا طبقنا نظام الكويت والبحرين ستنتقل المسؤلية على العامل والدولة

   لأنه ماراح يكون عندنا كفيل مواطن ..
   ولا بنراكض عسب نسوي إقامات وتأشيرات وتجديدات وبطايق وتأمين صحي وو ووو وو

   يعني ماشي رسوم تذبح المواطن

   وكل واحد من الوافدين يشل عمره إذا يبا يعيش ويعمل في الدولة

   وطبعا ماشي مؤكد لين يصدر القانون ونفهم بنوده

   مجرد توقعات ..

5. صراحة احسن يلغوه لانواللي نسمعه عن بعض الكفلاء شنويسوونه بالعمال يوصل لحد يقطه بالسجن او تهديد يعني اشياء مشينة الصراحة اما بخصوص الحريم حدث ولاحرج وهالشئ الي مايخلي بعض الناس تتجي للخليج علشان تتشغل يفضلون العمل باروبا او امريكا وكندا بسبب هالكفالة ومشاكلها

Comments are closed.