موضوع من زمان في خاطري … شو رايكم لو كنتوا في مكان تجمع مدرسة – كلية – عمل – ميلس .. و فيه حد يتكلم بلهجته المحلية … جدام ناس ما يعرفونها…
يعني تلقون اثنين يتكلمون عيمي او بلوشي مع بعض في موقع عمل لو اي مكان و زملائهم ما يفهمون عليهم …
او تحصل واحد يرمس بدوي تقول مولود في الربع الخالي في خيمة مع انه دارس ومتعلم في المدينة يعني يعرف على الاقل يتكلم حضري ,,,مع الحضر على الاقل …
وساعات تحصل واحد يرمس شحي مع الناس الحضر .. وهم ما يفهمون علية شي …
انا احترم كل اللهجات المحلية و كل واحد يفتخر بلهجته .. بس اعتقد انه ما فيه بدوي او شحي او عيمي ما يعرف يتكلم اللهجة العادية …
انا ما اقصد كبار السن الله يطول في عمارهم قصدي على الشباب اللي درسوا في المدارس و اختلطوا مع اهل المدينة .. وللمفارقات تحصل واحد يرمس بدوي تقول نمر بن عدوان و اخوه من امه وابوه يتكلم اللهجة العادية ..؟؟
وجهة نظري احس هالمواقف تخلق المشاكل من خلال اطلاق النوادر على اللهجات و بعد تسوى مشاكل لانه اللي ما يفهم اللهجة يتحراكم ييكلمون عنه …
هذا راي الشخصي ؟ واحس مب حلوة الواحد يتكلم لهجة جدام ناس ما يعرفونها ؟ ولكم رايكم
ياجماعة الموضوع عادي ولا فية اي حساسية والأخت ريم الشحي ماسوت شي غلط وانما زودتنا بمعلومات كنا نجهلها بصراحة عن الشحوح والبلوش ولازم نشكرها على جهدها الجبار .
اصبح الموضوع تعريف عن قبيلتي الشحوح والبلوش…؟!!!
بعد لو سمحتو قبيلة السويدي والمحيربي والمنصوري والزعابي وال علي والنعيمي والظاهري و والقبيسي و كل قبائل الموجوده في الامارات
اذا حد بيعطينا معلومات عن كل القبائل في الامارات بسوي خير من باب المعرفه…
أختي العزيزة أنا قمت بوضع معلومات عن البلوش تلبية لأحد الاعضاء وكذلك عن الشحوح تلبية لبعض الاعضاء بأن أخبرهم بمزيد عن الشحوح وليس هدفي الانحياز وشكراً للجميع وكلنا أمة عربية واحدة
أخواني لا تفهموني غلط انا وضعت معلومات عن الشحوح بطلب من بعض الاعضاء عبر رسالة خاصة والسموحة وهذا فقط قصدي وكلنا واحد
مشكورة ياختي ريم الشحي
أنا واحد من الشحوح
والصراحة ما أستخدم اللهجة الشحية إلا مع اللي يبدأها معاي
ومكان شغلي يلزمني بالتحدث بالانجليزي
وحتى لو تكلمت مع أي شخص تراني أستخدم اللهجة الحضرية الحديثة
طالما الأغلبية يستخدمونها
وبالنهاية كلنا عيال آدم وحواء
ومافي حد يقدر ينكر التاريخ
وكل القبايل واللهجات على راسنا من فوق