موضوع من زمان في خاطري … شو رايكم لو كنتوا في مكان تجمع مدرسة – كلية – عمل – ميلس .. و فيه حد يتكلم بلهجته المحلية … جدام ناس ما يعرفونها…
يعني تلقون اثنين يتكلمون عيمي او بلوشي مع بعض في موقع عمل لو اي مكان و زملائهم ما يفهمون عليهم …
او تحصل واحد يرمس بدوي تقول مولود في الربع الخالي في خيمة مع انه دارس ومتعلم في المدينة يعني يعرف على الاقل يتكلم حضري ,,,مع الحضر على الاقل …
وساعات تحصل واحد يرمس شحي مع الناس الحضر .. وهم ما يفهمون علية شي …
انا احترم كل اللهجات المحلية و كل واحد يفتخر بلهجته .. بس اعتقد انه ما فيه بدوي او شحي او عيمي ما يعرف يتكلم اللهجة العادية …
انا ما اقصد كبار السن الله يطول في عمارهم قصدي على الشباب اللي درسوا في المدارس و اختلطوا مع اهل المدينة .. وللمفارقات تحصل واحد يرمس بدوي تقول نمر بن عدوان و اخوه من امه وابوه يتكلم اللهجة العادية ..؟؟
وجهة نظري احس هالمواقف تخلق المشاكل من خلال اطلاق النوادر على اللهجات و بعد تسوى مشاكل لانه اللي ما يفهم اللهجة يتحراكم ييكلمون عنه …
هذا راي الشخصي ؟ واحس مب حلوة الواحد يتكلم لهجة جدام ناس ما يعرفونها ؟ ولكم رايكم
صح لو واحد وافد او من دولة مجاورة يسمع المواطنين يرمسون بلغه غير العربية شو بيقول اللهجة ما تضر بس اللغه هي العربية بريحة البداوة ؟؟؟!!
والله يسامح الي فتح الموضوع….
في شي انا مب فاهمتنه!! الحين اذا هم يعرفون اللهجة المحلية شو اللي يجبرهم يتكلمون مع بعض بلهجة او لغة ثانية!!
انا اشوف ان هالشي عيب و على الاقل المفروض يحترمون لغة الدولة اللي هم مواطنيين فيها……….وعيب اصلا اثنين يتكلمون مع بعض بلغة و الباقين مب فاهمين عليهم…….
مشكورة اختي وما قصرتي
بس لو حطيتوا هالشي في موضوع مستقل كان افضل
ياني صداع من موضوعكم
انا بصراحه اشوف عيب الواحد ايلس يرمس عيمي ولا بلوشي وخلق الله الي احذاله مب عارفين شو السالفه لانه كل واحد احذاهم بيتحراهم يرمسون عنه..
لكن الهجه البدويه انا مووووووووووول ما اشوف فيها شي ..البدويه ما تختلف عن الحضريه مول يعني البدو لو يرمس ويا اي حد بيفهمه لانه لهجه عاديه اما اللهجه العيميه او في مرات الشحوح ما ينعرفون شو ايقولون احس صعبه