اليوم سرت الامارات مول أدور لي لبس حق العيد
شفت فستان بسيط وناعم ولونه عيبني
معروض على واجهة المحل وهاي صورته
يوم سألت عن سعره احسه وايد مبالغ فيه ب 8300 احسه والله ما يستاهل هالسعر!!!
قلت يمكن القماش مستخرج من بطن الأسد من جي غالي و عاد لين طلعو هالقطعة من بطنه كان في خطورة وهالقطعة نادرة وايد 
والله حرام هالمبلغ ينصرف في قطعة لبس يمكن ينلبس على أكثر تقدير 10 مرات وبينفر وفي المقابل ها راتب موظف جامعي !!
هالمبلغ يوفر ايجار سكن ل 3 شهور تقريبا ويوفر مصاريف أسرة!!
هالمبلغ يمكن يأكل حوالي 8 عائلات اذا مب أكثر!!
الناس في فلسطين مب لاقية تاكل وتشرب ونحن يقصون علينا شنطة بـ 5000 و لبس بـ 8000 وسيارة بـ 200 ألف ونحن ما نقول لا وفي الأصل قيمة هالأشيا ما تسوى ربع قيمتها !!
الناس في فلسطين مب لاقية تاكل وتشرب ونحن يقصون علينا شنطة بـ 5000 و لبس بـ 8000 وسيارة بـ 200 ألف ونحن ما نقول لا وفي الأصل قيمة هالأشيا ما تسوى ربع قيمتها !!
الأجانب ما يشترون هالأشياء يستخفون بعقولنا وبفلوسنا هاذيل ما تهمهم الفلوس وبيدفعون
اللي عنده خير لا يقول شو يعني الخير وايد ليش ما نلبس ونتمتع ونسوي … ترى بيي يوم ها كله بيغدي ولا شي وماله قيمة وكل ها بنسير عنه تحت التراب
اللي عنده خير لا يقول شو يعني الخير وايد ليش ما نلبس ونتمتع ونسوي … ترى بيي يوم ها كله بيغدي ولا شي وماله قيمة وكل ها بنسير عنه تحت التراب
ومرة سايرة محل يبيع فيه مصري
يسوي اكسسوار حسب الطلب وجي
دشيت كنت متغشية بس ارمسه مصري
لأن لساني احتاس من كثر ما اتعامل ويا خواتنا المصريات .. وطلبت ديزايي معين .. قلت له بكم بتسويلي اياه ؟
قالي حضرتك مصرية ؟ ولا متجوزة مواطن ؟!
قلت له لا هذا ولا ذاك ، بكم بتسويلي الاكسسوار
قال ده بـ 300 …
فهمت اني لو مصرية كنت بحصله بأرخص
بس طلعت مواطنة وحسبه علي بسعر سياحي.
طبيته لأني فهمت قصده ..
للمصرية بسعر ولي انا بسعر ..
والله المستعان عليهم
بخبركم قصة صارت لي امس في القرية وهي نفس الفكرة اللي طرحوها الأعضاء من استغلال المواطنين…
كنت في القرية العالمية ودشيت القرية الأسيوية ويا ربيعتي وهي بغت تشتري عين الجمل اللي نسميه بالعامية ( يوز ) سألته ربيعتي ها بكم ؟ قالها 30 درهم استغربت ربيعتي لأن سعره مب فيه. قلت له ها بـ 10 دراهم بس قال انتي من وين ؟ قلت له ايران نش يرمسني فارسي وتوهقت بس سألته ليش تسألني أنا من وين بتبيع بيع .. قال مواطن ما يقول 30 كثير !! يقصد لو مواطنة بشتري وانا منطبة …
وها ما يسمونه انتهاز واستغلال !
نحن مشكلتنا طيبين وايد…..ونستحي نكاسر….او نشتري من مكان هب معروف….الشي ينباع لنا
بسعر….ولاي جنسيه ثانيه بسعر ثاني ….نحن اللي عودناهم علينا.
بالنسبه للي بمول الامارات او غيره من المراكز….قالها اخونا….يبون يطلعون الرواتب والاجار الكبير والفايده
وفواتيرهم..ولا تنسون الاسم اللي انت ظاهر به من المحل عالكيسه له جيمته. وهذا ما يمنع انه شي
اشيا حلوه عندهم وباسعار طيبه لكن بنسبه بسيطه والاغلب اشيا غدت جديمه ويبون يتخلصون منها مثل
ما قالو الاخوان.
صح شي ماركات ولها سعر..لكن اسعارها عندنا دخلت بحدود الجشع..والاستغلال…لانهم يعرفونا نحن انا نراوي عمرنا للغير….فينا حب المظاهر…هب غلط انك تكشخ ..وتتجمل وتتزين وتصرف من الخير اللي ربك عطاك اياه..بس بالعقل……والرسول عليه الصلاه والسلام قال….لا تسرف ولو كنت على نهر جار ..او كما قال عليه الصلاه والسلام…فاذا بالنهر شي اسراف فكيف بمصروف الانسان اللي مستحيل تكون ديمومته وكثره من ديمومه او غزاره النهر؟؟
اعرف واحد كان اييب لنا جاكيتات جلد من باكستان.ع350 درهم وهي افضل كواليتي عندهم..يقول هالجاكيتات نفسها تتصدر لايطاليا وفرنسا والمانيا..ولوقو ومن هالخرابيط..ويوصل هنيه للمحلات الحلوه اللي البايع لابس جوتي لمعته لمعه الكروم وشعره متروس فازلين ومسوي كت فرنسي يدل عالرقي .وابتسامته صفره من تدش عليه.تعني بالاغلب الحمد لله دش علينا واحد من المقصه…والسعر طبعا من 4000 ورايح.
وشي محل مشهور وما شي داعي اني اذكر اسمه وبالشارع اللي حذاله محلات بتان..بايام العيد والمناسبات واول الشهر… يوم تخلص البضاعه الماركه بسرعه بسبب الزحمه ولانه الاستوك بعده ما وصل ^-^ خاصه من الغتر الماركات .اللي ب 100 ورايح…يطرش الهنود بسرعه ..فريرو بالمصري عمحلات البتان ويشترون ما لذ وطاب ب 20 و25 و30 درهم…ويردون ويفردون نفس الغتر ويظبطونهن ويفردونهن بالواجهه على اساس انهن ماركه…………بس هو هب غلطان…كل واحد يدور مصلحته……الغلط منا نحن اللي ما نقدر نوصل للشارع الثاني ونشوف ونقارن.
بكل شي اغلبنا ما يقدر يوصل للشارع الثاني. واللبيب بالاشاره يفهم.
ان اصبنا فمن الله جل وعلى..وان اخطئنا فمن انفسنا ومن الشيطان.
والسموحه عالطاله