السلام عليكم ورحمة الله وبركاته
صارلي ساكن في هالبيت مع الوالد و الوالدة الله يحفظهم من 29 سنة و نحن ساكنين فيه ، من أول أيام الإتحاد و نحن قاعدين بهالبيت الي كان مكرمة من صاحب السمو الشيخ سلطان خلال اول سنوات الإتحاد.
تعبت من كثر ما أحج بين ” المجالس البلدية ” و مشاريع الإسكان صارلي انا و الوالد مقدمين من 6 سنوات و مع ذلك نحن أكثر الناس محتاجين بيوت نحصل ناس ما عندهم إلا 3 أو 4 عيال محصلين بيت فيه 30 غرفة.
أسرتنا كلها 13 فرد و مع عيالي صرنا 18 فرد ساكنين في هالبيت الشعبي الي خلاص هلك لا صيانة تنفع عمره 29 سنة انتهى عمره الإفتراضي … تخيلو البيت فيه غرفتين نوم و ما محصلين مكان نقعد فيه.
ضاق بي الحال و تسكرت كل الأبواب … ماشي واسطة ماشي امل .. رحت لمدير المجلس البلدي و قلت له يالطيب والله حالتنا صعبة الناس كلها تحصل دبر واسطة
قال لي ” انقلع و التـــعن ” .. انت ولد فلان بن فلان قلت إي الوالد خلاص عمره في بداية الستينات من وين تباه يبني له بيت لهو و عياله ،،، قال لي : انت و اخوانك تداومون بالشرطة و الجيش و اخوكم مهندس
قلت شــكو اخواني الحين اذا اخوي يداوم خلاص سقط حقي في أني احصل بيت ؟؟ و عيالك الي هم 7 كلهم عندهم بيوت ما مقصر وياهم و توهم معرسين ؟؟
سوالي طاف و روح ،، الحين الحمدلله خوزوه و حطو واحد ثاني لكن متى ، من بعد ما تبهدلنا و ظلمونا.
أنا مستعد أييبكم لبيتي و تشوفون ” النعمة ” الي عايش فيها صراحة الحمدلله البيت ساترني لكن أصغر عيالي المساكين يبون حجرة لعمرهم ما محصلين و أنا راضي بقدري
انا توني معرس و الحمدلله صارلي 7 سنوات و ما لاقي لي بيت … عطوني قطعة أرض شو الفايدة منها كلها طين و مهما حفرت بيطلع ماي كم بصلح هالارض ب 70 الف درهم أقل شي ؟؟
لكن اذا الدولة فيها خير ليش نحن ما نحصل هالخير و هالبيوت الي تنبني أقص ايدي لو نصها مب واسطة ، أشوف اسر غريبة 2 من أصحابي محصلين بيوت و هم توهم مالجين و السبب ؟؟
” فيتامين واو ” على لسانهم و اللسان بمعنى الكلمة أفصح.
إلي عنده واسطة ما يقصر وياي ترى أنا بصرف على عيالي ولا بصرف على بيت أبنيه لأهلي ترى انا مستعد آخذ قرض ب 7 مليون درهم و أبني بيت للي ربوني و عيشوني بس هال 7 مليون بالاساس تكفي عشان أبني بيت الحين ؟؟
طبعاً انا حاولت إني ” اروح اكلم ” الشيخ اكثر من مرة .. لكن ما يخلوني أدخل و أكلمه و السبب تعرفون ما شي واسطة ما يعرفوني الجماعة !
بكون سعيد جداً لو أقرى تعاطفكم وياي و ادعو لي بالتوفيق
أنا كنت اداوم بالبلدية سنة 2003 بشهادة الثانوية العامة و كان راتبي 7500 درهم فقط لا غير .. رضيت بالقدر.
و الحين ضاق بي الحال و محصل اجازة دراسية و بخلص الباجلر إن شاء الله.
و صندوق الزواج الله يحفظه من كثر ما تميت أتريا قلت رزق و نصيب وعرست ببيزاتي .. و الإسكان يقولون راجعنا بعدين راجعنا بعدين إلى متى ؟؟
ربيعي ضابط بالجيش عمره الحين 38 سنة و معرس 3 ما شاء الله محصل بيت 3 طوابق في مدينة كلباء
و لو اعطيك الأمثلة بتشوف أن الي محصلين مستحيل تنطبق عليهم صفات ” الراتب اقل من 10 آلاف “..
واحد من أصحابي بغى يتكلم و يفرفش الي في صدره .. من بعد أسبوع اشوفه فرحان ليش قال عطوني فيلا قلت مبروك خلوك تسكت بهالبيت بالبركة.
__________________
إنته أكيد درست و توظفت بوظيفه راتبها أكثر من 10 آلاف درهم.
إسمحلي يالطيب.
البلاد تعطي الفاشلين بس.يعني إن كنت فاشل و ما كملت دراستك و لهذا السبب صار راتبك 5-8 آلاف.
بتهل عليك الرحمات من كل جانب. لا بيتم صندوق الزواج و لا الإسكان و لا
الأراضي و لا مكرمات الشيوخ إلا و تنعطى لك.
لكن إن درست و توظفت و كان راتبك فوق الـ 10 آلاف. إنسى، بيعتبرونك مليونير.
إسألني عن هالسوالف.
لولا إن الوالد تلاحق عليي و طلبلي أرض على أيام ما كنت
أدرس (كانوا يعطون هاييج الأيام)، ولا جان لقيتني للحين أشحت.
لا حول ولا قوة الا بالله
الله يعينك يا خوية .. والشيخ سلطان ما يقصر لو درى بالحال ..
يا رب ان شاء الله ما اطوف هالسنة الا والبيت محصلنه .. ياااارب
خل املك بالله كبير .. هو واسطتك .. والله يسخر لك عيال الحلال اللي يساعدونك
موفق
الله يفرجها عليك
ما اعرف شو اقولك
مب كل كلام في القلب تقدر اتقوله
الله يفرج عليك يارب