السلام عليكم

مبارك عليكم الشهـــر،،

أنا أفكر أغير موتري الألماني بدون ذكر موديله.. الصراحه بهدلني تبهديل كمل وياي سنتين وشوي منه يخترب لي كل شوي صح التعديل عالوكاله لانه تحت الورنتي لكن الورنتي بينتهي خلال 10 اشهر فمن احينه افكر فالموتر لي باخذه ومنه قطع غياره نااار والوكاله يبالها يوم او يومين عسب يخلصون الصيانه الدوريه المينتننس (مادري باقي الوكالات كيف ماعندي فكره)

المهم انا عندي اختيارات وابى راي المجربيــــــــــــن بس وبدون تحيــــز من واقع التجربـــه،،

رقم واحد والمرشح القوي: اف جي ..

لانه اولا تويوتا ، بعدين قطع الغيار رخيصه وماظني الوكاله بتنقعني وان نقعتني بوديه اي مكان وبيمشولي اموري..

رقم اثنين اتوقع مايصرف وايد من حجمه ههه طبعا انا مايهمني كم سلندر -لو شي موتر ب 2 سلندر باخذه مب مهم

وسعره مناسب

صح اني بخسر المزايا لي عندي احينه من امان و ثبـــات و محدد سرعه وحساسات ومليون اير باج لكن لي اباه راحه البال

المرشح الثاني :
تويوتا -لاند كروزر

عاد هني فرق فالحجم والسعر والمميزات لكن الصراحه اشوفه معمر لين اليوم نشوف موديلات مال 10 سنين ورا -موتر مايقول اق

المرشح الثالث والصراحة هذا لي انا خاطري في من زمان وهذا هو الحب الاول والاخيــــر بس للاسف ماخذته لكنه موجود:

الفتـــــــــــك،،،،

صراحه شكل داش الخاطر من زمان حتى امس حلمت انه عندي فتك ولا 2 من النيسان القديم (حلم شيوخي)

لكن ماخذته لانه يصــــــرف بترووول صرف،،

هذا عيبه العود ومثل ماتشوفون كل يوم رفعو البترول وانا من النوع النشيط ما ايلس في البيت فمافيني عقب اتم احاسب وين سايره ووين راده وبكم هع

والنيسان بعد مال مكده لكن ماعرف منو يكد اكثر ومادري منو خراباته (تعقدت) اكثر

من تجربتكم شو رايكم وليش ابى حد يقنعني!!!!

ودخيلكم مابى ارمس رمسه شواب مثل موتر شباب وموتر بنات وخذي لج غيرهم انا اخترت هاييل فلا تقترحون غيرهم،، احين البنات يسوقون كل شي وتشوفون تراكم

وبس

29 thoughts on “طالبه رايكم بدون تحيــز وعن تجربة”

  1. بما أنة هدفج الأساسي ( سعر السيارة وشرط أساسي المكينة تكون 6 سلندر ) فالجواب واضح ..

    لكن انا عندي إقتراح ..

    لا تشترين سيارة من الوكالة ليش ما تشوفيلج سيارة ماشية شوي 4000 او 5000 كيلو .. سواء FJ أو ستيشن ..

    وبعدين ال6 سلندر تشرب أكثر من الــ 8 سلندر ع الخط . إذا أنج تطلعين خطوط ..

    ودامج تحبين الفور ويل وراعية فور ويل أرشحلج لكسز 570 فور و يل موديل 2009 بتلقينها بسعر وااايد مناااسب

    واللكسز ما يبالها تجيك فالوكالة ولا غيرة إذا إنج من ( الشارجة – دبي ) عندج DinaTrade

    وإذا إنج من بوظبي DinaTrade فمصفح

    ولعلمج السيارة ما يبالها تشيك ودلع كل شوي

    تبديل آيل فمحطة أدنوك .. يكلف فحدود الــ 340 يمكن ..

    تبديل سفايف ومخرطة درامات كل 3 تجيكات او إذا أحتاج وعحسب السواقة ( هذا لازم فدينا تريد ) كل 10,000 ويكلف فحدود 1000 درهم مع المخرطة ..

  2. السلام عليكم ورحمة الله وبركاته شوتبقين بالافجي تقول بقره شايفه حريجه عليج بالاستيشن ولا تعالي ببايعج نيسان موديل 91 عليه مكينة 6,0 فورتك

  3. شوفي انا من رايي من الخيارات الي حاطتنها بين اف جي والاستيشن والنسيان
    انا انصحج بالاستيشن vxr 8v استعمال حلوو وصرفية البترول وكل شي فيه حلوو لاني مستعمله
    والخيار الثاني النيسان الصراحة حلووو بس عيبه يصرف ف البترول و شوي والمكيف
    اما اف جي مانصحج فيها فالناس تستعملها للبر والرمله بوجه خااص اما كستعمال احس انها صعبة شوي

    انا من وجهة نظري الخاصة اذا انج بنت وحابه تستخدمين سيارة فعليج بالكزس gs430
    انا اشوف انها تليق على البنات اكثر واكشخ
    مب غالي سعره ارخص عن الاستيشن والنيسان

    وهذا رايي انا
    وسمحيلنا على القصور…

  4. لا اف جي ولا فتك ولا خرابيط

    استيشن والحياه مستمره

    و موفق بإذن الله … لك مني أجمل تحية .

Comments are closed.