طلب صغنن:)

السلام عليكم ورحمة الله

ما أدري شو سالفة المنتدى هذي رابع مرة أكتب فيها الموضوع

إخواني ..

أنا جد سويت مواضيع عن المنتدى في جريدة الاتحاد كمن مرة، وجد نزلت كمن عضو في مواضيع مختلفة مثل بوسعود وبدر راعي الغزلان وشمسة المهيري وبو شهد وغيرهم .. واترقبوا بعد عندي كمنت عضو في انتظار تنزل مواضيعهم قريب ..

بس نحن في العلام نواجه مشكلة الكل يتهرب من الظهور في الجرايد .. الكل ما يبا واللي يرضون ينعدون ع الاصابع ..

وإحنا ما نروم ننزل آراء بدون صور .. على طول يظنون إننا ملفقين الموضوع ..

أنا زهقت ومليت إني أنزل المول وياي مصور نصور ويا الشباب .. الكل يتشرد تقول بنزل صورهم في المعاكسين
واللي يرضا على طول عقبها يا يرقم يا يسألني كم رقمج !!! عيب والله عيب نحن بنات ناس أهلنا لو يدرون ينقعون حروب في هالسوالف .. بس نقول ما عليه ونتحمل

اللي صاير الحين إني وصلت لعجز في التواصل مع الشباب .. ما أروم نفسيتيه ما تتحمل .. وفي نفس الوقت محتاجة آخذ رايكم في القضايا المختلفة بعد يا عرب ما يصير هذي قضاياكم وهمومكم منو بيرمس فيها دامكم تتشردووون ؟؟؟؟

اللي أباه الحين ياليت اللي يرضون وماعندهم خلاف صورهم تنزل في الجريدة يراسلوني ع الخاص .. يتركون أسماءهم ورقم الموبايل وبخبرهم كيف يوصلون الصورة يا إما بريزليوشن عالي ع الايميل أو يتركونها في مكتب من مكاتبنا اللي موجودة في كل الامارات ..
وبعد يخبروني هم يحبون يرمسون في أي موضوع .. شبابي أو تراثي أو أسرة أو قضايا مجتمع ..

الباب مفتوح للي عندهم ابتكارات وهوايات غريبة بعد ..

أنا ممكن أرسل المصور لين عندكم يصوركم .. بس برسله على صور المواضيع موب الصور الشخصية البورتريه ..

رجاءا إخواني اللي حاب يتعاون وياي لا يبخل .. بس مع ملاحظة إن المواضيع اللي أسويها لها طابع اجتماعي موب محلي يعني ما ترتبط بهيئات ومشاكل محلية ..

يعني موب سوالف الكسارات والبطالة والشاحنات والبلدية والاقتصاد وصندوق الزواج وغيرها وغيرها ..

هذي لها صحفيين متخصصين ..

أنا عندي قضايا الاسرة والعلاقات الاجتماعية وظواهر المدارس والسفر والتراث والابتكارات

أي شيء خفيف وقابل للنشر

أتمنى تتعاونون وياي ..

…………………………………

وهذا طلب خارج النص للي عندهم ايميل اتصالات أو يقدرون يسجلون في الخدمة ع السريع من الموقع ..

تصوتون لصورة فلاح اللي بتوقيعي ..

وشكرا ..