ظواهر لازم تتعالج في بلادنا << ادخلو شاركوني..الدخووول اجباري و الموشاركه اجباريه بعد

السلام عليكم و رحمة الله و بركاته

صبحكم الله بالنووووور و السرووووووور

شو موعنكم من الغبشه؟؟؟ << اسألي عمرج اول ههههههههه

ادري ادري حليلكم الله بالنكم بهالدوامات و الارف بس ما عليه ان شاااء ادعووو انتوو بس ان ينزلووون معاشات حق المواطنين بدون ما يشتغلون << لازم يحافظون علينا عن ننقرض و ما يتعبونا..يقولون استوينا 15% من السكان في الدوله

الموهيم ما علينا ما علينا

عندنا اليوم سالفه ثااانيه و موووهيمه..اكيد كل المقيمين في الامارات لاحظووها

ماشي اتيكيت و لا شي نظام و لا ادب

خلوووني ارمس و افصص الموضوع نوووقطه نوووقطه

النقطه الاولى :

سايره اتشرى من احد المحلات …و يوم سرت ادفع الزباين متكومين على الكاشير؟؟ ادور عليهم ادوّر نهاية الطابور << حليلها نظاميه
ماشي طابور و لا خربوطه..تحيدون يوم كنا يهال ايام المدرسه في الفسحه شقا يستوي الدفان عند المقصف..نفس الحاله عافانا الله
و الا مره بعد نفس الحال واقفه بدفع بس هالمره في طابور..و تي هاي الحمقاء و ترتز جدامي؟؟ مب جنه في طابور و الا هاي تستهبل
يعني بلاهم الناس لا اتيكيت و لا ادب يعني ما تعرفون توقفون طابور مثل الناس الحلوين المؤدبين..لازم ضرابه و تدزيز منو بيدفع قبل؟؟ شو مخلين حق اليهال!! و حتى لو الواحد بيحترم عمره و بيوقف في الطابور ايووون يتجدمونه و لا يسون له سالفه…
صدق الحين كم واحد منكم مسوي هالحركه؟؟ اعترفوو عادي ما بقولكم شي..منو منكم شاف طابور و لبسه و سار عفد قبل الناس؟ << خخخخخخخخخخخ ماظن حد بيخبر على عمره…و اللي بيعترف يقولنا السبب؟ قل احترام لغيره؟ الناس الي واقفين مب مالين عينه؟ مستعيل؟ جنه بس هو الي عنده مشاغل

ننتقل الى النقطه الثانيه

و هاي الظاهره انا ملاحظتنها في دبي..ما قالوو قديما السواقه ادب و اخلاق و لباقه مادري لياقه<< لا تحضرني المقووله الان بس في شي يقولونه عن السواقه..المووهيم
السالفه يطول لي بعماركم و عمار الشيوووخ ان يوم بتي تتجاوز في هالبلاد ما يخلونك؟؟ تقول شارع ابوهم..بس مجرد تسوي اشاره بتلف يتجدمون يحدولك!! والله استوينا نتجاوز بليا اشاره من قلة ادبهم…و عاد استوى لي موقفين في يوم واحد من هاي السالفه
كنت في شارع جميرا في السيد النصفاني ابا اخذ يسار حق البو تيرن و وصلت قريب التقاطع و ااشر عشان اتجاوز…بس منووو يقووووول..محد طاع يطووفني!! يحدون حق السياره والله ماعرف شو الوغاده اللي فيهم و اعفد عليهم..انزين انتو بتسيرون سيده انا بلف بلاكم خبايل خلوني اطوف!! ..اخترت سياره صالون عشان يزيغون<<< مخططه خخخخخخ
الموهيم خذت اليسار و الهرن ما وقف حشرووني..لين خذت السيد الي يلف..و عقب يا راع السياره جدامي..و يضرب بريك ماعرف يباني ادعمه؟؟ حركه هبلا اصلا ترا فيه عيون و اشوف شقا بدعم سياره جدامي…وقفت و توقعت انه بينزل بيضارب..زهبت عمري و قفلت البيبان << خخخخخ ما كانت عندي اسلحه للدفاع عن النفس في السياره..ان شاء الله بحطلهم قب و فليت و االذي منه…الموهيم راع السياره عقب حرك و سار سيده و انا لفيت..و ظهرت حرمه حمقاء و خرقاء..و ماتت و تغصصت عشان انا ابا اتجاوز!!

و عقب و انا راده ديره بعد نفس الموقف…ابا اتجاوز و السياره بعيد بس من ضربت اشاره…طااااااااار عشان يحد لي..عاد الحمدلله سيارتي عوده مزيغه يهال الشوارع << خخخخخخخخخ لو عندي بيك اب جان سويتهم مطبات بعد..بس ما عليه << ان شاء الله في المستقبل بستوي من بلاد الفوط فوط

بس مب فاهمه شو سالفة ظاهرة منع التجاوز؟؟ بلاهم الناس تخبلووو؟ كل واحد يسوق سياره خلاص يتحرى الشوارع مكتوبات باسم ابوه ..ما يخلي حد يتجاوز و لا يخلي حد يعبر..و الا يتمشى لي في السيد السريع على سرعة 40…و بعدين يعني و بعدين؟؟

اطالب بوضع كورس اجباري لاي واحد بياخذ الليسن و هو تعلم اخلاق السواقه و احترام الاخرين في الشارع <<< و اول ناس يدشون هالكورس هم الحريم

و آآآآخ من سواقة الحريم..انا ما بقول شي..بس لاحظو الحرمه يوم تسوق ما تخلي حد يعبر جدامها..موووستحيل..امبووووسيبل..الحرمه مااااااااا توووقف و عادي تدعمك لو تعبر جدامها << لاحظوو هالشي يوم تعبرون الشارع << بريولكم يعني مووب بالسياره و بتقولون دبي بيبي صاادقه << بيذبحوووني الحريم خخخخخ<< خلو الناس يعبرون و بسكت عنكم

و ننتقل للنقطه الثالثه.. و نسيت << من كثر الهذربان لازم بنسى ممممممم

ممممممممممممممممممم << تتذكر

المخ مكربن<<

هييييييييه تذكرت…مووووب بندو الفلكر و افتكينا من مناكر البنات

تفضلو موقع يديد الا و هو فيس بوكس و ردن جميع المنكريات على عادتهن القديمه…
كم عضو او عضوه هنيه عندهم اخت او بنت اخ او او او أي وحده تقرب لهم في سن المراهقه؟؟
عندها كمبيوتر؟ لابتوب؟ حجره بروحها؟ موبايل؟ تعرفون شو تسوي شو ما تسوي؟
انتبهووو انتبهووو << تعبت و انا انبه صووتي انبح

و اخيرا اصل للنقطه الرابعه الاخيره

و ترا بعض شبابنا الصغار مافيهم ادب و لا اخلاق و هلهم فعلا ما عرفو يربونهم….هاي السالفه صارت لربيعاتي…واقفات عند الكافتيريا طالبين و يتريون طلبهم..و ايون الشباب و يوقفون عرض جدام سيارة البنات يعني بالغصب بنبحلق فيكم…ربيعاتي حركو السياره و وقفو بعيد … مشو الشباب بسيارتهم جدام سيارة البنات..بطل اللي يسوق الدريشه و تفل عليهم!!! و سار!! يعني يا تعطونا ويه و تغازلونا و الا بنتفل عليكم؟؟ شو هالوقاحه و قلة الادب!!!
سالفه ثانيه حدثت لاحدى الاخوات…كانت واقفه في الباركن عند محل و كان الوقت الصبح و مافي ناس وايد..شافها واحد طايف و وقف سيارته عدالها و يأشرلها نزلي الدريشه..البنت من الزياغ بغت ترد ريوس و يحرك هو سيارته بطريقه انه صك على سيارتها و مستحيل تقدر تتحرك!! البنت من الزياغ شاوحت دعمته و كسرت سيارتها و شردت عنه..
و اظن وايدين منكم سمعتو بالسالفه الي صارت عند الممزر قبل كم سنه..يوم بنات كانو واقفات الصبح عند المنزال بسيارتهم و يوهم شباب بغو يعاكسونهم بالغصب و البنات ما تجاوبو فقامو دعمو سيارت البنات و عقوهم في البحر!!
و توني في منتدى نسائي اماراتي شايفه موضوع احد الاخوات تحذر البنات اللي يسوقن من الشباب ..اللي ايون يفتحون باب السياره على البنت بغرض الترقيم و المعاكسه!! يعني وصلت السالفه لدرجة التحذير في المنتديات!!

يعني لين متى بعض الشباب بيتمون يتصرفون بوقاحه و لا مسئوليه؟ متى بيتعلمون الادب؟ و متى بيكون في قانون رادع لهاي الاشكال؟؟ لان اذا تبون الصدق ماشي قانون يحمي البنت المواطنه! اذا تحرشو فيها شباب و اذا رفعو الموبايل يصورونها و اذا واحد فتح عليها باب السياره و بغت هي تبلغ الشرطه..يقولولها تعالي المخفر قدمي بلاغ!! << صايره ترى و دوم تستوي و اللي يبا يتأكد يجرب يسأل الشرطه
يعني منوووو المواطنه اللي بتسير المخفر و بتقول الحقوو علي تحرشو فيني؟؟ لين متى بتم حقوق البنت ضايعه!! و هالنوعيه من الشباب يقلون ادبهم على البنات و محد يروم يقوللهم شي؟

وصلنا نهاية الموضوع الشيق و المطلوب منكم الحين الردود على الشكل التالي:

ترحيب
تعليق على النقطه الاولى:
تعليق على النقطه الثانيه:
تعليق على النقطه الثالثه:
تعليق على النقطه الرابعه:
شكر على الموضوع

خخخخخخخخخخخخ ما يخصني اباكم تتجاوبون على كل نقطه من نقاط الموضوع عيل شحقه متعبه عمري و مودره بروجكتاتي المعفنات و يالسه اكتب لكم موضوع مظهره فيه قهري و مختلجات احشائي<< متعوب عليها

يلا خلونا نشوف ردووووووودكم الجميله و شووووووووووووووكرن