صباح الخير.. 
بخبركم سالفتي ويا سالك و الي يشتغل هناك و حاب يساعدني يخبرني..
انا خذت سيارة في شهر 6-2009 و حطيتلها سالك و رصيد 100 درهم و أول ما يوصلني أنه رصيدي وصل أقل عن ال 30 درهم على طول أحط رصيد ثاني و الأمور طيبة.. 
المهم, قبل اسبوعين يلست أفكر و أقول من زمان ما وصلني مسج سالك أنه رصيدي أقل عن 30 درهم.. مع إني مطيح في دبي آخر كمن شهر عسب تجهيزات عرسي..
قلت خلني أتصل بهم و أتـأكد أنه الأمور طيبة.. و اتصلت.. و تفاجأت بأن سيارتي محذوفة من رقم حسابي الخاص في سالك من شهر 11-2009 بدون أي سابق إنذار و بدون أي طلب مني..كيييف؟ مادري! 
المهم الحرمة الي تشتغل هناك ما قصرت يزاها الله خير و ردتلي السيارة مرة ثانية في رقم حسابي و قالتي لا تخاف ما عليك أي مخالفة بالعكس عندك رصيد تام من زمان يقدر ب 92 درهم.. أنا ارتحت و تشققت 
أمس وصلني مسجين -ورا بعض- من سالك, واحد يقولي رصيدك وصل 24 درهم و المسج الثاتي يقولي إني عديت بوابة سالك بدون رصيد كافي… أنا هنه استغربت 
اتصلت في سالك قالولي ال 92 درهم القبلية سارت حق المستحقات السابقة الي هي من شهر 11-2009 لين الحين.. و حاول إنك تحط رصيد خلال 48 ساعة عسب لا تنحسب عليك مخالفات.. و سرت و حطيت رصيد يديد بس قلبي ما طاوعني و قلت خلني أجيك على موقع سالك بشوف إذا في مخالفات و لا لأ (طبعا أجيك عليه دوم ما علي و لا مخالفة).. 
و توني قبل شوي جيكت, و إذا بي أحصل 21 مخالفة كل مخالفة ب 50 درهم مجموعهم 1050 درهم محسوبات من شهر 11-2009 إلى اليوم الي قبل لا اتصل عليهم.. 
و قلت يا ريتني ما اتصلت و خبرتهم بللي مستوي (و أسير و أطوف على راحتي, لا من شاف و لا من دري) جان أموري بخير و لا سجلوا علي مخالفات و لا هم يحزنون…
المهم أتصلت في سالك مرة ثانية.. قالولي كلامك صح 100% المشكلة كانت من عندهم ,, سألتهم شو الحل؟ قالي قدم طلب إعتراض على المخالفات عن طريق النت و أنتظر 15 يوم عمل يعني 3 أسابيع…! لاااه و المشكلة يوم تقدم طلب اعتراض لازم تفتح المخالفات وحدة وحدة و ما تروم تقدم عليهن مرة وحدة….
المهم قدمت طلب اعتراض و عطوني الريفرنس, و المشكلة ملكية سيارتي (أرقام أبوظبي) بتنتهي الحين في شهر 6 و لازم أسير أجدد على طول خصة عقب سالفة حجز السيارات بعد انتهاء الملكيات ب 10 أيام… فإما سالك يتكرمون و يلغون المخالفات بأسرع وقت ممكن أو ادفع ال 1050 و أنتظر سالك يردونها بعد ما حضراتهم يراجعون مخالفاتي الي مالي ذنب فيهن أبدا……. 
تووووتة تووتة و خلصت الحتوووتة.. و الي يشتغل هناك و يبا يساعدني حياه الله…
شكلي بطبها دبي ولا بسيرلها خير شر
و نحن شو ذنبنا نقع تحت نظامهم الخاطئ؟
تبون الصدق
ياجماعه مصخوها
نظامهم مب متكامل وكله اخطاء وثغرات ويوم اتكلم الموظف ويتوهق ومايعرف يرد عليك ,,,شو نقول بس
الله كريم
تسليك + تايد للغسيل عشان يغسلون عيوبهم…
أسميها سالفة ..
الله يعين الناس عيل إذا كان كل هذا صار لك انت بروحك
الظاهر سالك بروحه يباله تسليك