شدتني بعض المواضيع عن عدم التزام وكالات السيارات بالمواعيد او الخدمة
في طريقة سهلة لاكن فعاله
الاولى عن طريق وزارة الاقتصاد لانة المسؤل الاول عن الوكالات وعن العروض وحتى عن شركات التامين وكل الوكالات
والطريقة الثانية الي انا اتبعتها
كانت عندي سيارة و اخترب عندي القير و الضمان كان منتهي بس السيارة كانت مش ماشية وايد
رحت للوكاله و قالولي ادفع 35000 علشان القير
قمت رسلت رساله للمصنع و بكلشي و بحالة السيارة و التشييكات
بعد يومين ياني ايميل من المصنع و وافقو انهم ايبدلون القير مجانا و بعد كلمو الوكاله وتم تبديل القير بدون ما اتحمل ولا درهم معنه الضمان كان امخلص
بعدين كلكم اتعرفون شو صار في وكالة العتيبة لما سحبو منه الوكاله لانة كانت خدمتة سيئه
الطريقة انه اي واحد حس انة الوكاله ابخستة يرسل ايميل للمصنع ويكتب فية كل شي او بيانت السياة بالكامل
اذا كل الاشخاص الي كاتبين في المنتدى عن لفطيم او عن غيرة اتبع هاذا الاسلوب صدقوني بتحصلون الخدمة اتغيرة 180 درجة
بس الموظوع يبالة 5 دقايق تدخل الموقع الرسمي مال الشركة طبعنا مش مال الوكاله و بتحصلونة حتى لو عن طريق الجوجل بدل المذلة او بدل اللعوزة او بتشوفون الوكاله ابروحها تتصل فيكم و تتاسف منكم
خلونا شوي نتفاعل ولا كل واحد ايحط ايدة على خدة او يشكي
هاذا من حقكم او بس من المقصة علينا
والله ايوفق الجميع
والسموحة
اعرف واحد عنده لكزس موديل 2007
عقب ما طلع الموتر من وكالة الفطيم في دبي بكم يوم حتى بعد ما كمل 1000 كيلو قام يسمع اصوات غريبة وبعدين راح الوكالة وخبرهم عن المشكلة .. ما سووله سالفة وخذوا عنه الموتر فترة اسبوع او اسبوعين على اساس انهم يصلحونه لكن فالنهاية بعد ما استلم الموتر مرة ثانية شاف المشكلة بعدها موجودة .. بعدين تم يودي موتره اكثر من مرة لكن بدون فايدة .. اخر شي راح الوكالة وقالهم انه بيطرش رسالة للشركة فاليابان وبيخبرهم عن السالفة .. بعدها من الخوف عطوه موتر ثاني يديد اليوم الي بعده
اشكرك اخوي على الموضوع وهالشركات ما تنفع وياهم الا العين الحمره
حلوه الاخ نوط بوخمس …………..الا هذي سوالفهم طبعا هل العين طيبين وهالنوعيه ماينفع معاهم الطيب
انا بخبركم سالفه بتبطلون حلوجكم منها ..
قبل سنه جيه واحد من الربع عنده سي ال ووداه وكاله المرسيدس اللي فالعين .. و كان يبا ايجيك سياره الميجار سيرفس يعني تقدر اتقولون التجييك العود .. يعني مال 120 الف و قال حد الموظف اللي هناك و اسمه (( محمد )) هذا السوري لو تعرفونه .. ياللي تسيرون وكاله العين …
المهم قاله بكم قاله و الله 5 الاف و خرده قاله ماشي خصم .. اتعرفون 5 واايد على تجييكه ..
تم ايذله ذل و آخر شي نزله 10 دراهم من المبلغ ..
شفتو المذله .. ؟؟
المهم و قاله متى بتجهز السياره قاله بعد يومين
المهم و في نفس اليوم و بالصدفه شوف ربك الحبييب رايح صوب مرور العين و هووه خاطف ما يشوفلكم سيارته تمر من الشارع الثاني .. يعني الشارع المقابل له .. و فالبدايه شك فأن السياره سيارته خص ان اللي يسوق السياره زلمه و عندنا فالعين قلييييييييل ما اتحصل زلمه ايسوق سياره اوكي و لا برقم طر .. و بعدين رد بسرعه من الدوار و تأكد من الرقم .. ( X0000) يعني كم رقم بيكون على سي ال و بنف لون سيارته و موديلها و لا رقمه اللي فيه اصفار … المهم الحبييب ايعطي فول ليت حق الزلمه ما طاع ايوقف … مره مرتين ثلاث ماطاع .. المهم جان يتجاوزة و ايوقف جدامه ..
و جان يضرب الزلمه بريييك قوو … و نزل من السياره و سار للزلمه … و قاله انت شو يايبنك اهننييه؟؟ قاله اءءءء اءءء انا اجرب السياره لأنها لازم تتيرب ك تست درايف…
قاله اتسوي تست درايف و انت لابس بدله و كاشخ و لا و القهر حاط سيدي اغاني زلمات فالسياره هههههههه ولا و الساعه كم الساعه 9 فلييل .. يعني اي وكاله هاي اللي بتفتح ؟؟!!
و جان اينزله من السياره و خذ السوييج و قاله حسابي وياك باجر عند المدير .. قاله لالالالالالا و الله ايخليك و ربي اخر مره و يا شيخ و يا طويل العمر .. المهم و بالباجر اول ما دخل الوكاله الزلمه استقبل صاحبنا بابتسامه عريضه و قاله اتفضل طويل العمر و سيارتك جاهزة و عمل لك خصم 30 % .. الريال ما كلمه و دخل على طول على مدير الورشه .. وكان واحد بريطاني و خبره بالسالفه من طءطء لين ما هات السويج … و طبعا اتأسف له .. و قاله مافي داعي اتسوي شي و انا بييب لك حقك المهم جيكوله السياره ببلاش و عطوه هدايا من مال مرسيدس عباره عن كاب و قلم و كوب و ميداله .. كل ها عشان يسكت …
و الزلمه الحبيب فالبدايه ماطاع ينزله غير 10 دراهم ..
هل الصوت ياي من الدرامات (درامات الويل)؟
إذا الصوت ياي من الدرامات و السفايف يداد، فتقدر تخوز الصوت بالطريقه التاليه:
1- سر وكالة المرسيدس (أو أي محل قطع غيار المرسيدس) و أطلب قريز للدرام (هو عباره عن قريز معباي في معصار صغير (نفس معصار الكتشب اللي في المطاعم). سعر العبوه على 3-4 دراهم بس. إشترلك 4 عبوات، لكل تاير عبوه.
2- سر عند أي ميكانيكي و خله يبطل السفايف و يفرك القريز على السفايف و الدرام. و خله يركبهن مره ثانيه.
3- إنتبه. البريك في أول إستعمال ما بيمسك عدل (بسبب القريز)، فحاول ما تسرع بالموتر أول يوم و خل مسافة أمان أطول من المعتاد بينك و بين اللي جدامك.
وبس، الصوت إنشاء الله بيختفي.
مشكور عالموضوع
لكن في ناس ماتعرف انجليزي عشان تراسل الشركات او المصانع
فياريت حد يتبرع بالترجمة للاخوان
تحياتي