السلام عليكم ورحمة الله وبركاته
علياء القمر للعطور أو عطور علياء القمر ( الصراحه مب متأكد من ترتيب الإسم )
هو اسم لمحل بيع عطور موجود في دبي على ما أعتقد، من فتره سمعت من كذا واحد عن المكان إنه ممتاز وبضاعته ممتازة لما أسألهم والله هالعطر والا هالبخور اللي حاطينه من وين ، بس للأسف الشديد ما أعرف مكانه لأني كل ما أسألهم عن المكان يقولون نحن ما نروحه بس البيت ايبون من عندهم وأوصيهم عشان يسألون ويردون علي بس كل مره يقولون نسينا وما سألنا، فقلت ما في إلا المنتدى أكيد في ناس يدلون مكانهم ومجربين بضاعتهم.
فيا ليت اللي يعرف يدلني عن المكان ويخبرني عن تجاربه مع البضاعة الموجوده في علياء القمر إذا كان من زبائن المكان
وشكرا
بأي منطقة مركز الملا بلازا
لأني من السعودية
الأخت الكريمة .. العذوب
شكرا على مداخلتج وردج وتواصلج مع الموضوع وأكيد إنّج أفدتيني في الموضوع، لأنّ مسألة العطور ودهن العود والبخور يمكن تكون الشيء الوحيد اللّي أحب آخذ فيه رأي الآخرين وشو اللّي يقترحونه عليّ بعدين أقوم أنا بالمرور على كل الأماكن اللّي وجّهوني لها وخصوصًا اليديده واللي ما أدلها أو ما يكون لي زياره سابقه لهم ومن هناك أختار اللي يناسبني من بين كل الاقتراحات اللي أسمعها من هني وهناك
بالنسبة للمحلات اللي في عاصمتنا (((( أبوظبي )))) زين انج خبرتيني عنها لأني زياراتي للعاصمة قليلة وبالتالي معرفتي بهالأماكن مب لي هناك. وأنا إن شاء الله بحتفظ بنسخة من ردج هذا عندي وإن شاء الله في أقرب زيارة للعاصمة بحاول أزور هالمحلات بقدر ما بيسمح لي الوقت
أما فيما يخص بركن العطور العربيّة الخاصة في باريس غاليري فأتفق وياج 100 % بأن عندهم شغلات جدا جميله وللعلم هذا الركن موجود أيضا في فرع المحل في ديرة سيتي سنتر بدبي الدور الثالث
وبالنسبة لسيد جنيد عالم فأنا ما سبق لي إني خذت شيء من عندهم بس ما يمنع تكون لي زيارة قريبه لهم وأجرب اللي عندهم وخصوصًا اللي اخترتيه ونقّيتيه طبعًا على أساس إنّج مختارة أفضل الموجود عندهم
أمّا فيما يخص عبدالصمد القرشي ، فأنا أيضًا من عشّاق العود المعطر الملكي اللي في العلبه الصفراء يعني أول علبة جتني هدية من سنتين أو أكثر شويه ومن يومها وأنا آخذ من عندهم هالعود علبتين منها في كل مرة وبعد ما ننسى دهن العود الكمبودي اللي عندهم تراه شيء عجييييييييييب
مرحبا
فيه محلات ثانية كلها تخصص عطور عربية .. وفي بوظبي وايد من ها المحلات .. وأحسن فرصة تشتري فيها هذه العطور في معارض العيد ورمضان لأنهم يحطون عروض خاصة ع العطور والدخون وغير جذيه يكون عندك فرصة إنك تشوف بضاعة أغلب المحلات وتاخذ كروتهم عشان تعرف أماكنهم وطريقة الاتصال بهم ..
عموما هذي بعض المحلات الليأعرفها ..
مرتع الغزلان .. عندهم عطر اسمه الدانة يخبل .. وعندهم عطور ثانية بعد .. وفيه دخون عندهم اسمه العروسة ما انصحك فيه لأني ما حبيته ..((( جني أباك تاخذ على ذوقي..!!!كخخخخخخخخخخخ أمزح)))
وفيه الظبيانية هذا في سوق مدينة زايد في بوظبي .. وهذا المحل عندهم عطر اسمه حبايب وعطر اسمه ابوظبي وعطر اسمه الامارات ,.. ودخونهم رهيب بعد .. والصراحة عندهم كريمات لليد وعطورات للسيارة خبال .. ومالهم أي فرع ثاني في الامارات .. وأنا أحب اسوي لهم دعاية لأن أصحاب المحل من هلي .. بس والله هم يستاهلون لأن دخونهم وعطورهم فعلا يستاهل العنوة …
وفيه محل خمس الحواس .. وهذا في الخالدية وأظن له فرع في دبي .. بعد عندهم عطور رهيبة …
وإذا تبا الغالي اللي جيمته فيه .. تعال باريس غاليري الخالدية عندهم ركن عطورات عربية خاصة .. وخذ منه أهم عطرين أستعملهم مخلط عذبة .. ومخلط الشيخ عبدالله (هذا العطر 80% منه دهن عود أصلي) .. أظن إنك ما بتندم بس ترا الخلطتين غاليات في السعر ..
تولة عذبة بـ 600 درهم
وتولة الشيخ عبدالله بـ 1000 درهم ..
تبا نصيحتي خذ لك ربع تولة من كل خلطة .. والله يسدنك
وإذا أنت من عشاق دهن العود جرب دهن عود معتق من سيد جنيد عالم .. التولة بـ 800 وربع تولة يكفي
والعود المعطر من عبدالصمد القرشي (عاد أنا ما أخذ شيء من القرشي الا ها العود المعطر ) العلبة بـ 300 والثلاث علب بـ 600 .. وعندهم تنزيلات ها اليومين ..
إذا حاب تاخذ عطور أغاني محمد عبده مثل الاماكن وتدلل ومذهلة وبنت النور وغيرها .. تلقاها في حامل المسك .. بس الصراحة خليك على العطور العربية اللي في محلات الدخون أحسن لك
أتمنى أكون أفدتك …
وأي استفسار أنا حاضرة
لك الشكر
الأخت الكريمة .. العذوب
شكرا على مداخلتك وردك
بخصوص مكانه في دبي فبالأمس عرفت إنه في مركز الملا بلازا
أختي الكريمة ..
ذكرتي إنّه في محلات ثانيه تبيع شغلات أحلى .، فهل بالإمكان تدليني عليهم بشرط إنّ منتجاتهم تكون شغلات عربيّة أو شغل بيت وهذا اللي سمعته كذلك عن علياء القمر إنّ عندهم أشياء شغل بيت من دخون وعود وخلافه
في الانتظار
أخوي المحل اسمه (علياء القمر للعطور)
وعنده عطور خاصة مثل (غلا زايد) و(شيخ الشيوخ) >> ها العطر ريحته مثل عطر الشيخ اللي ينباع في باريس غاليري ومركز أكثر
بالنسبة للمكان في دبي ما أدله .. بس في بوظبي مكانه في الخالدية في الدانة بلازا نفس العمارة.. جنب منطقة أبوظبي التعليمية ورا باريس غاليري الخالدية.
أتمنى أكون فدتك بالموضوع .. بس بيني وبينك فيه محلات عطور أحلى بوايد من ها المحل ..