عندي مقابله في بنك راس الخيمه .. و بغيت منكم المساعده ..

14 thoughts on “عندي مقابله في بنك راس الخيمه .. و بغيت منكم المساعده ..”

1. الحمدللـــــــــه الأمووور مشــــت تمام

   بس ان شاء الله احصل شغل احسن قبل ما اوقع العقد

2. السلام عليكم ورحمة الله وبركاته . .

   نصايح خفيف . .

   لاتسهري ليلة المقابله . .
   تعالي قبل المقابله بوقت . . ~
   واهم شي ماتكوني متوتره ومتخوفه . .
   خلي الموضوع عادي وكووول . .
   وطبعا لو سألوج . .
   بيقولوج . . من وين ؟ وليش هالبنك ؟
   وشو اهدافج ؟ شو من الدورات عندج وبس ؟

   وبالتوفيق ان شاء الله

   بن سعيد

3. مشكوريـــــــــن تسلمون ..

4. وعليكم السلام ورحمة من الله وبركاته ..

   في البداية الله يوفقج اختي وإن شاء الله تكون الوظيفة من نصيـبج وتيسر لج أمورج وتنقبلين ..

   بخصوص إذا سألوج ليش اخترتي البنك ..

   تقدرين تجاوبين مثلاً : انه البنك في نفس الامارة اللي انا ساكنة فيها والمكان والوقت وظروف العمل بشكل عام مناسبة لج .. وتقدرين تضيفين أنه الوظيفة أو البنك مثلاً مناسب لتخصصج وأنج تحبين الأعمال الإدارية في البنك ..

   إذا سألوج عن نفسج .. حاولي تبرزيلهم مواهبج أو مهاراتج اللي لها علاقة بالوظيفة .. مثلاً قوليلهم أعرف استخدم الكمبيوتر وعندي الآي سي دي إل مثلاً .. أو قوليلهم عندي شهادة توفل أو آيلس .. وخبرة مثلاً في المكان الفلاني .. بالمختصر المفيد .. حاولي توضحيلهم الشهادات والمؤهلات اللي عندج .. وتبينيلهم أنج مناسبة للوظيفة ..

   أتوقع أيضاً بيسألونج أسئلة مثل : ما عندج مانع لو نقلناج لأفرع ثانية ؟ أو هل عادي عندج تداومين شفتات ؟ أو هل توافقين انج تاخذين دورات في أفرع أو معاهد معينه .. ومن هالأسئلة اللي لها علاقة بالوظيفة .. وحاولي أنج تجاوبين بشكل إيجابي وتردين بطريقة دبلوماسية ..

   احتمال كبير أيضاً يسألونج عن البنك بشكل عام .. مثل تاريخ التأسيس .. والخدمات وأماكن وجود البنك في الامارات و و و من هالاسئلة ..

   في النهاية .. لو قالولج عندج أي اسئلة .. لا تسألينهم عن الراتب .. وحاولي قد ما تقدرين أنج تعطينهم صورة إيجابية عنج .. ولو سألوج أسئلة استفزازية أو قالولج كلام ينرفزج .. حاولي تحافظين على هدوئج واعصابج .. لان معظم هاي الأمور الغرض منها انهم يشوفون شخصيتج وكيفية تعاملج مع الآخرين ..

   أخيراً .. حاولي أنج تكونين متواجدة قبل المقابلة بربع ساعة أو بـ 10 دقايق .. لحتى تعطينهم انطباع من البداية أنج مهتمه بالوقت .. وادعي الله قبل لا تدخلين المقابلة أنه يوفقج وييسر لج أمورج ..

   والسموحة .. وبالتوفيق إن شاء الله ..

5. وعليكم السلام ورحمة الله وبركاته

   خلج هادية أعصاب وأقراي سورة الحمد سبع مرات فبل لاتدخلين للمقابلة

   ورددي ثلاث مرات { رب أدخلني مدخل صدق وأخرجني مخرج صدق وأجعل لي من لدنك سلطاناًنصيرا}

Comments are closed.