الموضوع هذا يمكن يثير حفيظة البعض و لكن هالشي قاهرني و اذا انا ما برمس و غيري ما بيرمس عيل منو بيرمس؟
المكان = فستفال سنتر دبي
الكوفي شوب = بتيل
المحل المقابل = لاسنزا لملابس النساء الداخليه
طبعا لان فستفال قريب من مكان سكني..كل فتره اسير.. و احيانا اكثر عن مره اسبوعيا…
ملاحظاتي = نفس الشباب دوم في الكوفي شوب و عيونهم مبحلقه في المحل النسائي المجابل
في المقابل المحل النسائي متروووس بنات و حريم و مكانه صدق مكشووف و الاضائه الحلوه ..و الوحده يوم تشل قطعه في يديها..الشباب يشوفون من بعد ميل شو اختارت و اي لوون!!!
ليش كتبت الموضوع : كنت اتحرطم على واحد من اخواني ” لا تستغربون اخواني و لله الحمد واعين و متفهمين و نقدر نرمس في اي موضوع مهما كان”
قال انه يعرف واحد ” مب ربيعه بس يعرفه” هذا من رواد الكوفي المذكور..و كل يوم يسير له..و احلى حظ يكون في الايام اللي يلقى مكان فاضي في اول طاوله مجابله المحل المذكور!
مب قادره استوعب شو المغزى من اليلسه هاي! ريال ولد عرب و قبايل و يعرف المذهب ما بيداوم في الكوفي يوميا بس بسبب المحل المجابل!
و بالنسبه للبنات..ما يحلالهم الشوبنج الا في هالمحل مع ان وايد محلات ملابس نسائيه في فستفال و مستووره..بس حلاته يوم تشل القطع في يديها و توقف مجابله الباب..يلا شوفوا ذوقي حلو!!!
الموهيم لولا الحيااااء و لولا حشيمتكم جان خضت في الموضوع و شرقت و غربت..بس اتمنى ان الفكره تكون وصلت
و في النهايه التوضيح = الغلط يقع على المول نفسه و على شباب الكوفي هذا و على البنات اللي يتشروون من المحل بدون اي اعتبار للي مبقق عينه برع يطالعهم! عشان تعرفون اني ما ادافع عن اي حد منهم..الغلط يقع عليهم جميع …
و انا شخصيا خليت ربيعتي تدق للفستفال تشتكي عن هالامر..و قامو يستهبلون و يسوون عمارهم مب فاهمين..
اتمنى من الجميع باجر رفع سماعة التلفون و الاتصال بالمووول .. لان يد وحده ما تصفق و اتمنى منكم المساعده في هذا الامر..و ان شاء الله يتخذون اجراء سريع يوم بيشوفون خلق الله هابين فيهم ..لان مهما كان نحن عرب و مسلمين و ما نرضى بهالمصاخه اللي ياسه تستوي و اغلب ابطالها و بطلاتها من البلاد بعد..يتحرون محد منتبه لهم و لا يدريبهم!!
و اللي يشك في كلامي هكو فستفال..سيرو على الاقل يومين او 3 ايام ورا بعض بتعرفون عن شو بالضبط انا اتكلم..خصوصا الوجوه المكرره .. و وين العيون مسنتره!
و سامحوووووني 
ماشاء الله عليج .. انكارج لوضع مثل هذا مطلوب منج ومن غيرج اختي الكريمه يزاج الله خير
بس انا اعتقد ان الموضوع مرتبط بالأشخاص أنفسهم مب بأماكن المحلات
يعني العيب فينا مب في أصحاب المحلات
التجاره شطاره وهم شافوا المطلوب واللي يجذب
لقوا ان توفير جو مناسب لمثل هالفئة من الاخوة والاخوات ينشط تجارتهم
عداهم العيب!
شـكــ وبارك الله فيك ـــرا لك … لك مني أجمل تحية .
وجزاك الله خير على هذا التنوية … والي ما كان عارف الحين عرف ..
الحل بسيط
لا تسير المحل وريح عمرك !! دبي مليانة مولات واذا سرتي المحل خذي ريال وياج يعطي الشباب عين حمرا وخلاص
لا حول ولا قوة الا بالله
الله يرحمنا برحمته
احيد من فترة طويلة واحد طرش مسج للبث المباشر يشتكي عن هالشي لكن ما كملت الموضوع . .
في البداية . .
عشان ما نظلم صاحب الكوفي شوب يمكن هو ما حصل مكان غير هذا يناسبه للتأجير! وفي الوقت
نفسه يمكن بعد شافه نقطة جذب! الله يعلم بنواياهم واللي يدور في نفوسهم . .
وأنا مارة من هالمكان عمري ما ركزت في أشكال رواد هالكوفي لكن بعد اللي قلتيه واقع دامنج شفتي
أن نفس الأشكال تتكرر وخاصةً الكلام اللي قاله لج أخوج . .
المفروض . . مثل ما قالت عبق الورد يظللّون الزجاج بحيث اللي داخل المحل ما يكون مرئي هذا أفضل
حل . .
لكن في نفس الوقت . .
بصراحة هالمحل بالذات اقصد لاسنزا دوم فيه رياييل اقصد اي فرع . . هالأيام دايماً احصل حريمهم مع
رياييلهم . .وهالشي عيب . .مواطنين أو وافدين . . وغالباً ما تكون عين الريال مب على اختيار زوجته
لكن على اختيارات الغير . .مما يحرجنا . .
إذا بالنسبة للكوفي والعيون الزايغة . . اقتراح يظللون زجاج المحل . . ولكن عن الرياييل اللي يدخلون
المحل هذا بيقولون حرية شخصية . .
الموضوع ما بينحل بس اذا اتصلتوا فالمركز . . لازم تكلمون جهة مسؤولة لها سلطة على فرض أمرها . .