غبيشة وبخيته وفضيلة وسعيدة في خضم الحياة ..

ودلة القهوة السوداء المقنده برائحة الهيل .. فدار هذا الحديث ..

غبيشة : ولدي يمّاع يقول بيسير سوق الأسهم يقول السوق منتعش وبيشتري وبيبيع .. مسود الويه

امس بايع سيارته بدقة رزق .. ويقول فرصه اعوض خسارتي .. الله يسلمه ما يطيح في سهم اعمار.

بخيته : ( وهي تلطم الرطب ومازرة ثمها ) ميودة بيزات الشونه من زمان بعطيه اياها جان بيزيد بيزاتي

وببيع البيك اب مال العزبة .. يمكن الله يرزقني ببيزات وايد وبشتري لي بيك اب غيره ..

سعيدة تشتغل على كجوجتها تلي ومن سمعت طاري البيزات بطلت عيونها .. غربلج الله يا بخوت وتقولين ما عندي بيزات يوم طلبتج سلف

بخيته : الله اكبر عليج مب عاطيتنج بيزاتي .. ثرني خبله اعطيج بيزاتي من يسيرن ما يردن

غبيشة : ولدي يمّاع يقول بيضارب هناك .. اقول له شل وياك اخوك صويلح الضيخ يمشي على زنده التيس

بيعاونك على الضرابه ولاحد بيروم عليه ..

سعيده : وانتي خبله تخلينه يضارب .. بيزخونه الشرطه وبيودونه مخيرز

غبيشة : يمّاع يقول ما فيها شرطة .. والضرابه ببيزه هناك .. ومن عقب الضرابه تحصل بيزات

ااااااااااه يا ليتني بعدني قوية جان ضاربتهم وحصلت لي كمن ألف ..

بخيته : جان شل وياه سعيدة من ترفع برقعها بيتروعون وبيتشاردون وبيتمن البيزات حقنا

تراها مروعة عيال الفريج ومب مخليه ياهل مب مزيغتنه ..

بخيته : بلاج الله يهداج محد يروم يسوي وياج سوالف

اقول غبيشة انا سامعه عن دخول وخروج في الأسهم وأنا ما فيه بده علي الحركه وما فيه

علي داخل طالع وطالع داخل مثل ما يسوون قوم ميثوه وعوشانه هذيلاك خفاف ويقدرن

وبقولكم إذا بدخل في سهم إعمار بصبر لين يزهب الأصنصير مال البري ( البرج )

انتي تدرين انه عالي و أنا ما أقدر علي لدريات.

غبيشة : فضيلة بلاج ساكته ؟؟ ما ترمسين ..

فضيلة : افكر بمشروع ..

سعيدة : شو مشروع هذا بعد ؟؟

فضيلة : افكر اتاجر في العمله والبترول ؟

بخيته : غربلج الله .. شو تبين البترول لو يسرب التانكي ضاعت فلوسج

فضيله ترد علي بخيته : جان خرت التوانكي بترس يحال وخروس

موجودات عندي في بيتنا الجديم وببيع البترول مثل ما يبيعون الماء قبل وبسوي غوازي بالعظمه..

وذيج الساعة محد بيروم يرمسني ..

سعيده : وشو العمله بعد ؟؟

فضيلة : يوم قلت لج مدحوبه ما صدقتي .. العمله اشتري بيزات وابيع

بخيته : والله محد الخبلة غيرج يا فضيله .. حد يشتري بيزات ويدفع بيزات اسميج مينونه

فضيلة : انطمي وانتي شو دراك بالبيزبس ( البيزنس) انتوا النطيحة والمتردية ..العمله لها موسم .. تشترين في الشتاء

وتبيعين في الصيف .. وتحصلين بيزات وايد .. وبشتري بهن صوغ من سوق الذهب ..

وبشتري بيك أب حق العزبة .. يديد وارد اليابان .. يلمع مسيرة يوم ..

وإن زادن الغوازي .. بزرع لي ضروس بدل ها الطقم ..

غبيشة : يوم أتذكر ضروسج المرصوصه زمان جنهن حب رمان

وأشوفهم اليوم تنفرقوا كل واحد علي راسه … ضرس واترك فراغ وضرس واترك فراغين …

يغمضني حالج يا فضيله . إمنوقال فضيلة الفتنه بتصير جذيه وحليلها..

سعيدة .: فضيلة جان اشتريتي صوغ اشتري لي مرية ذهب .. يحليلي خويتج انا ..

فضيلة : تبيني اكد عليج .. حشا عليه .. خلي ولدج يشتري لج ..

وتراج بروحج مسويه بيزبس .. تراج تسوين مغاطي ومكانس وتسوين تلي وتبعين محد قالج شي

سعيدة .. هذا ما يسوي بيزات وايد يا فضيلة .. انتي شو رايج اشاركج .. كل البترول اللي في تانكي البيك

أب بعطيج اياه .. وانتي بيعيه … وهاتي لي الغوازي ..

غبيشة : غربج الله يا فضيله كل هذا تحت راسج ونحن ما ندري بج .. انزين سمعي .. عندي يحال وخروس

اشتريتهم من سوق اليمعه من الفجيرة شو رايج اشاركج بهم .. حليلي يارتج في السراء والضراء ..

سعيدة : خلنا من ها الرمسة ألحين .. القيض والحر ياي وين بتقيضون السنه ؟؟

غبيشة : بنسير كلبا والا دبا فيها حيضان باردة للسبوح ..

سعيدة: أنا عندي روماتايسون وعظامي متخشوله بقيض في راس

الخيمه في خت وكل ليله بتودن في العين منها وناسه ومنها علاج للروماتيسون..

فضيله : سعيده يالخبلة تاسون هذا مصارع …

سعيدة: إنزين هواللي ضربني في الركب بلاج إنتي

وانتهى الحديث بشور فضيلة عليهن بالطموح لأعلى والذهاب للهند ( بمبي )

-ومدحت لهن الهند بقولها :فيها العلاج وفيها الأكل وفيها الميوه …

والأهم عيال أجمل هناك وهريس والبانياني وغيرهم عندهم عود ودهن عود وزباد

وعرق الزعفران ومخمريه وووو……غير وقايا الصلاه

واللي تبا تسوي بيزبس حياها الله ..