غلاء المهور – حجة –

السلام عليكم ورحمة الله وبركاته …

الموضوع مثل ما شفتوه ( غلاء المهور حججججة)

بصراحة استغرب من المواضيع اللي تنطرح وتتكلم عن غلاء المهور وتهاجم البنت وأهلها مع أن المهر من التسعينات واقف ما بين 70 ألف – و 100 ألف درهم كأقصى حد ، مع وجود بعض المبالغة لدى بعض العائلات اللي تطلب مئات الآلاف .. وهاذيل ما يمثلون نسبة كبيرة يمكن 0,1% .. وبنفس الوقت في عائلات الى اليوم تترك للراغب في الزواج حرية تقدير المهر.

وأتذكر كل الزيجات اللي تمت مثلا في محيطنا سواء من العائلة أو الجيران أو المعارف أو الصديقات أو زميلات الدراسة أو العمل الخ ما تعدت الـ 70 ألف درهم اللي يصرفها صندوق الزواج ( يعني ما يتحملها الزوج ) ..

ويوم أقارن أقدم زيجة أتذكرها في الوسط العائلي في عام 1992 وأحدث زيجة تمت العام الماضي 2008 المهر فيها نفس ماهو 70,000 درهم يعني هالرقم ( خلال 17 سنة وأكثر) ما تغير وايد و (تقريبا) ثابت ( وين الغلا اللي تتكلمون عنه؟؟)

يمكن حد يقول 70 ألف درهم مبلغ كبير بعض الشئ ان البنت تجهز نفسها به بس تستحق لأنها في النهاية ما بتاخذه بيت أبوها ان اشترت لبس ولا ذهب ولا حتى خلته في البنك في النهاية… كله لزوجها وبيتها ومب شوية عليها لأن الشباب اليوم يصرفون هالمبلغ وأكثر منه على أشياء كمالية وهالرقم (70 ألف) خاضع لموافقة الدولة اللي قدرت مصاريف تجهيز البنت للزواج بـ هالقيمة وبالتالي تصرفه من خلال صندوق الزواج!

يعني كأنه البنت ما خذت من الريال شي كأنه الدولة هي اللي عطتها اياه.. وغيره من المصاريف هي بسبة جشع التجار .. وغطرسة بعض البنات اللي تبا الغالي .. وهذا شي ما نقدر نعممه على الجميع !!

والغلا تحديدا في صالات الأعراس ، في الكوش ، في الفساتين ، والمكياج يعني باختصار التجار هم السبب؟ وللأسف لو بني عند أصحاب الصالات فهم مواطنين ، الممكيجات مواطنات، مؤجرين ومؤجرات الفساتين أغلبهم مواطنين .. الخ

في الدول الغير خليجية مثلا فستان العرس ما يكلف 1000 درهم بينما عندنا في الامارات اذا الفستان أبيض حط صفر اضافة الى الـ 1000 لأنه أبيض وهذا بس للتأجير مب للشراء .. لكن لو كان لونه مثلا بني بيكون سعره في المتوسط 2000 درهم.

يعني لا تلومون البنت ولا أهلها في هالموضوع لأن جشع التجار الغير محكوم بأحكام ولا توجد حماية للمستهلك هو السبب..

والتجار ( المختصين بالأعراس ) لا لهم ولا عليهم بعيدين عن هذا الهجوم ..

ياريت تخففون الهجوم على البنت وأهلها و تبطلون تعيبون في بنت الامارات ، لأنكم في النهاية طرف في الموضوع ، يعني كل واحد في النهاية عنده بنت وأخت للزواج فأنت باجر بتكون أب لـ البنت اللي تناقش قضيتها اليوم وتقول أهلها بالغو في المهر يعني انت سبب وطرف فـ مافي داعي تبعدون نفسكم كطرف مهم في هالمشكلة …

أحد الاخوان طلب نخطب له ولقينا بنت الحلال اللي تستوفي كل الشروط وبأقل مهر .. طلع حجج واهية وحطنا في موقف محرج مع البنت وأهلها وآخر شي يقولون المواطنات والمواطنات !!

كل أخ وكل أب فيكم يقدر ينصح ، ويقنع، ويتدخل في موضوع المهر نفسه وموضوع الاعداد للعرس والمغالاة اللي نعيد ونزيد فيها ..

ولا كل واحد اليوم بيناقش القضية ويبا يتزوج ويبا يخففون عليه المهر ويوم يرزقه الله ببنت بيقول بنتي غالية وما بزوجها الا اللي يدفع فيها ( الشي الفلاني) !