سلام عليكم اخواني

الموضوع باختصار اني ان شاء الله ناوية اشتريلي سياره يديده او سياره مستعمله وماشيه بحدود 50 الف كليومتر

امس كانت عندي جوله فالوكاله والمعرض وهذا اختصار الجوله

1. امس سرت وكاله نسيان وشفت نسيان باترول اليديد 2011 حبيت العرض(تامين سنه مجانا +5 سنوات كفاله مجانا) بس المشكله مب مقتنعه بالشكل >>> شكله وايد كبير عليه >> بعدني بنووته بختفي فالسياره ^^

2. وسرت المعرض لي فالعوير وشفت سياره بورش توربو 2008 وماشيه 133 الف لون ابيض ومن داخل جلد بيج ومواصفات خاصه وبسعر اوك و استعمال (الشيخ) وكل تجيكاته مسوي فالوكاله, والتواير يديده مغيرينه قبل لايبيعونه>>>>> عايبني شكله بس متررده لان واايد ماشي

والحين بغيت اشاوركم (اهل الخبره) لاني ابا يكون عندي على بدايه السنه ومابي استعيل
واذا عندكم اي سياره ثانيه اتشوفونه اوكي حق استخدام والمواصفات لي ادور عليها :

1. بغيت فورويل او ميني فورويل (بس مابا ميني فوريل لكزس ومورانو)
2. بحدود 200 الف او اقل (والدفع كاش ان شاء الله)

واتمنى انكم اتسهلون عليا واستفيد من خبرتكم

والسموحه

9 thoughts on “فزعتكم يا اهل الخبرة”

  2. الله يسلمج يااارب ..

    ولو تبين سياره من امريكا انا حاظر شيختي .. وعندي لج هالروابط يمكن يعيبج شي

    1- 2008 Porsche Cayman S الموتر ماشي 21600 كيلومتر بس .. سعره مع الجمارك والشحن وتخليص اوراق
    واصل لين عندج قرب باب البيت >> 162 الف درهم ..
    الرابط .. 2008 Porsche Cayman S, $43,800 – Cars.com

    2- 2010 Porsche Boxster .. الموتر 7804 كيلومتر بس .. وسعره مع الجمارك والشحن وتخليص الاوراق
    واصل لين عندج قرب باب البيت >> 175 الف درهم ..
    الرابط ..
    2010 Porsche Boxster, $44,995 – Cars.com

    والسموحه منج ع القصور والمغثه شيختي

  3. “خيماوي77”

    صح كلامك بس لكزس مابا اخذه لان كل لي فالاهل هابين عليه >>> ف نو جانس ل لكزس
    عالعموم تسلم عالمرور

  4. بالتوفيق ان شاء الله اختي .. وانا نفس الحاله كـ بنت ما انصحج بالبورش لو كل الخلق هابين عليه

    ولو تبين سياره صغيرونه مثل البورش الي لقيتيه .. خذيلج لكزس is300 والله حلوه وكشخه .. وسعرها اوك
    ويابانيه ومال مكده ما تقول لا .. وصيانتها وتكاليفها معقوووله لا غاليه ولاشي

    او جوفيلج اي سياره ثانيه تقتنعين فيهاا .. بس انا واحد مول مب مقتنع بالمواتر الالمانيه (( بورش – مرسيدس – بي ام دبليو ))
    وفوقهم الرنج روفر << سعرها غالي وسامانها غالي و وكالاتهم حرااااميه .. وتاخذينها اقل شي وكاله فوق ال300 الف
    وتعالي بيعي السياره ما اتييب سعر اوك ابدا .. واحس ان خراباتهاا وااايد وما تخلص ..
    حدهاا للاستخدام لين 70 الف كيلو وبعدين تنباع اغلب الناس جي .. وجوفي اعلانات البيع للمواتر هاي كيف تكون ماشيه شوي
    عشان اتييب له سعر زين ومعقول بالنسبه له وما يخسر فيها اكثر ..

    والسموحه على الاطاله شيختي .. والراااي راايج >> وياليت محد يتحسس من كلامي

Comments are closed.