فيرووووووز

أقرى عيوني كلها الغاز ورموز
حاول تفسر ما بها دون تعتيم

ان كان وضع الرجل بالوقت مهزوز
شفني انا عالارض والراس بالغيم

انا دخيل الأأأأوف من صوت فيروز
احس فيني تقهر الحزن والضيم

ما جيت ابروي قصة الهم والعوز
بعت المواتر والدبش والمجاهيم

أنا إبدوي قلبي عزوم(ن) على الفوز
ماينحني خشمي بوقت الملازيم

إن جارت الدنيا وانا لآبتي عنوز
والله ما اشكي بوجه المقاديم

إيه إعنزي لويصفق الطوز بالطوز
تاريخنا شاهد على الوقت ومقيم

يانبض قلبي كنه امبير وفيوز
والفكر ماكينه والاحساس تلغيم

يا هيه يا بنيه يانبنوبة الموز
يلي حياتك كلها روج وكريم

صدي ابي خشم(ن) على الوجه مركوز
خشم إبدويه تنتخي للمعازيم

دمها خفيف ولا يبيله كلاكوز
ومن الترف تعجز ولا تقطع السيم

قمة دلع فستانها الورد والروز
والصوت له نبره وبحه وتنعيم

ودي شماليه على الخاطر تحوز
لا هيجنت جرت علي التقاسيم

لبيه يالبيه يا ريحة الجوز
والشيح واعواد الغضى والقياصيم

انا اشهد انها درة(ن) بين الكنوز
اجمل من الازهار واطهر من الديم

مولودة(ن) بالعين في شهر تموز
متخالطه بين الظبا واشقح الريم

قولوا لها قلبي من العام محجوز
قلبي تذاكر والمشاعر مراسيم

لا شرعت سيف(ن) بالاضلاع مغروز
مازاد قلب يحبها غير تسليم

قلب الشمالي لا عشق مات ملكوز
ما يخلف النيه ولو ربع مليم

ان حب مات ولا حيا عاش مهزوز
طبع الشمالي في جميع الاقاليم

نقطة تفتيش