بسم الله الرحمن الرحيم
اليوم كان بيني وبين احد الزملاء في العمل جدال على القيادة في الدوار وكان الحديث ان طرف ثالث كان يروي استخدامة للدوار*
صاحبنا هذا كان في المسار الاوسط والشارع كان من ثلاث مسارات والدوار من 3 مخارج مثل ما هو معرف المخرج اليمين رقم 1 واذا كنت بتكمل سيده المخرج رقم 2 واليسار مخرج رقم 3 ربيعنا دخل الدوار وهو في المسار الاوسط وكان يريد الذهاب إلى اتجاه اليسار مخرج رقم 3 و كان بيدعمه واحد كان في المسار اليسار لانه كان رايح سيده ، قلتله انا انت غلطان اذا كنت تبغي تروح يسار كان الالزم عليك تمسك اقصى اليسار من قبل ما تدخل الدوار لان المسارات الثلاثة كلها متاحه للذهاب إلى المخرج رقم 2 الي هو سيده واذا كنت تبغي المخرج رقم 1 الذي هو اليمين لازم تاخذ اقصى اليمين من قبل ما تدخل الدوار واذا كنت بتروح المخرج رقم 2 الذي هو سيده بامكانك تمسك اي احد المسارات الثلاثة واذا كنت بتروح المخرج رقم 3 الذي هو يسار تمسك اقصى اليسار من قبل ما تدخل الدوار.
قام صاحبنا الي تجادلت انا وياه وقال كلامك يا بو زايد غلط في غلط وقال اذا كنت تبغي تروح يمين تمسك المسار اقصى اليمين او تاخذ المسار الاوسط واذا كنت بتكمل سيده تكون في النص فقط واذا كنت بتروح يسار تمسك اقصى اليسار اوالنص ايضاً وعلى كلامه ان المسار الاوسط حر ياخذ يمين ياخذ يسار يكمل سيده .
ارجو لرجال المرور ان يوضحوا الصوره انا غلطان او ربيعي واذا كان في رسم توضيحي يكون افضل*
الموضوع صراحة يدوخ يمين يسار فوق تحت ويبغيله تعمل دوار وتييب عده سيارات من العاب الصغارية وتمثيل الحالة
الحمودي
حادثك هذا مثل الي كان بيسير لربيعنا بالضبط والحمد لله تجنبوا الحادث وانا قلتله انت غلطان وان اشوف انك انت غلطان بعد وان بختصر الموضوع وبحدد المخارج في ثلاث نقاط وابغى حد يعلمني ان صح او غلط
1-المسار اليمين يسمح بالف يمين مخرج رقم واحد وتكملة المسار سيده
2- المسار الوسط يسمح فقط بالذهاب سيده على طول الطريق المخرج رقم 2 وعدم الالتفاف يمين ويسار
3- المسار الايسر يسمح بالذهاب سيده مخرج رقم يسار ويسمح بالف يسار مخرج رقم 3 ويسمح بالدوران إلى المخرج رقم 4
هههههه الله يعينك يالحمومي
الامور طيبه من وين ماتبا تلف لف
بس بالاخير يعتمد عالسايق وسواقته ..
والله يعينه اذا تلاقه ويا خان ولا بنقالي او حتى انجليزي هههه
بس انا بعد اقول يعتمد عالدوار وانا شايفنه هالدوار الي تطريه مال بني ياس اتحس انه ضيج وصغير ..
حتى انا روحي ماقدر اغامر فيه عسب انه شوي صغيرون وعليه زحمه
بعكس الدوار العود :d
بسم الله الرحمن الرحيم
بو زايد >> انا استوالي حادث فالدوار نفس هالسالفه بالضبط ” بقولك الكلام الي قالي ياه الشرطي فالمركز ( قال الدوار قانونه معقد وايد لدرجة ان فـ بعض الحالات رجال الشرطه روحهم ما يقدرون يحكمون منو المتسبب ومنو المتضرر اذا كان شي حادث لا سمح الله الا بعد ما يتصلون فالضباط و يشرحولهم الوضع .. والضباط روحهم ياخذون وقت لين يطلعون بالنتيجه او انهم يحولونك للنيابة و تتحول للمحكمه (تستوي سالفه طويله و عريضه) >> و هذا الي استوالي انا
طبعـآ المعروف والي علمونا ياه يوم ظهرنا لياسن > نفس كلام ربيعك ( اذا كان الشارع بـ 3 مسارات و الدوار له 4 مخارج 1 يمين + 2 سيده + 3 يسار + 4 تلف الدوار كامل وترد صوب الشارع الي ياي منه ,, المسار 1 (يمين) تقدر تروح يمين مخرج 1 او تكمل سيده مخرج 2 || المسار 2 تقدر تروح سيده مخرج 2 او تلف يسار مخرج 3 || المسار 3 تقدر تلف يسار مخرج 3 او تلف الدوار كامل و ترد ع نفس الشارع اللي ياي منه مخرج 4 )
وو طبعـآ الي يطبق فالواقع يختلف تماما عن القانون هههههههه >> اقصى اليمين يلف الدوار كامل ولا اقصى اليسار يلف يمين كل واحد ع كيفه
وسالفتي انا > الدوار فـ جسر بني ياس
الحمدلله ما صار شي الله سلمنا
انا راد من الدوام ياي من بوظبي طلعت جسر بني ياس ( طبعآ ع طول يقابلك الدوار ) كان المسار 3 اقصى اليسار زححححمه طابور سياير وماروم اصف وراهم والمسار 2 الوسط فاضي > رحت المسار 2 الوسط و دخلت الدوار كنت ابا أروح يسار مخرج 3 والمسار 3 اقصى اليسار كان فيه باص صغير ( دخل الدوار وراي) ف يوم لفينا خلاص بنطوف مخرج 2 سيده >> راعي الباص غير راييه و لف عسب يدش مخرج 2 سيده و دعمني صوب اليسار آخر شي عند الليت الي ورا >> طبعـآ خلاني افترر و اخمس فالدوار
والباص الدعمه يته عند الليت اليمين الي جدام فالزاويه يعني >> طبيعي من شكل الدعمه بينعرف منو غلطان > بس للاسف البتاني تم يتصل ف ربعه و ترسو راسه خررط ليين ما يت دوريه ساعد > خرط عليهم و حولونا المركز من 4 العصر لين 1 فالليل بعد التخطيط والتعب و الرمسه مع الضباط > حولونا النيابه > طولوا السالفه واايد و آآخر الموضوع حطونا نحن الاثنينه متسببين فالحادث و دفعونا كل واحد 1000 درهم و كل واحد يصلح موتره ع حسابه هههههه > نظاام فاشل بمعنى الكلمه و بكل برود فالنيابه > لو ما عندك فلوس تدفع بنحجزك واتصل بحد من اهلك اييب البيزات واذا تحس انك مظلوم استئنف الحكم ف محكمه بوظبي > وانطر يا شاطر لين اييك الربيع > غير الخساير الي بتخسرها و الدعمه ما تكلف 500 درهم .
خلاصة القول حددوا وين بتروحون و اختاروا المسار الصحيح من البدايه + استعملوا الاشاير + ابتعدوا عن المهنده والبتانيه فالدوار + اذا صارلكم حادث لا سمح الله وكان بسيط > والطرف الثاني تم يخرط لا اطولون السالفه لانه فالنهايه بتخسرون اكثر > حطوا الغلط عليكم حتى لو مب غلطانين و عدلوا الموتر
و اما سالفة الاخت فوشية > يباله كرتون بندول اكسترا الاحمر هههه
و شكل الدوار هذا ف دبي او الشارجه >> والامور مخبوصه هناك > كم مره كنت بندعم
وو سلامتكم ^^
أنا دار راسي في هالموضوع بصراحه.
بس من خلال قرايتي للموضوع الأساسي، أقدر أقولك إن كلامك صح، و كلام ربيعك غلط.
موضوع مهم وعلى بالي من يوم ماجيت الأمارات
في المانيا مثلاً اللي يريد يخرج من أي مخرج لازم يمسك أقصى اليمين – يعني ممنوع تخرج من اي مسار أخر كالوسط أو أقصى اليسار وهكذا تتكون حركة إنسيابية طبيعية لأن كل شوية يفضى المسار الأيمن بسبب خروج الناس منه وتم الناس تنتقل من أقصى اليسار الى الأوسط الى اليمين بكل سهولة
أما هنا في الأمارات فتلاقي شخص جاي من أقصى اليسار ويريد يخرج من أقصى اليمين يعني يعدي مسارين في وقت واحد والموجودين في المسارين الأيمن والأوسط لازم يتبخروا في الهواء علشان سعادته يعدي
والكارثة أنهم يعلمونهم هذا الخطأ في مدارس السواقة فأنا أداوم في أيكاد وأشوفهم كيف مدرس السواقة يخليه يطلع من أقصى اليسار و يخرج من أقصى اليمين
و أنتم تعرفون طبعاً الهنود يتم يطبق ما تعلمه في مدرسة السواقة ويالله يا حوادث