يؤسفني ان انقل لكم هذا القرار الغبي، في وقت تتسابق فيه المؤسسات الخدمية الى طرح خدمات تواكب التطور، اصدرت مؤسسة الامارات للبترول “امارات” قرار يتعارض مع استراتيجيات دبي واقتصادها، خاصة كما تعلمون عدد المقيمين الاجانب يفوقون عدد المواطنين باضعاف ومعظمهم يستخدمون البطاقات الائتمانية لدواعي امنية…الخ
لا نلوم مؤسسة الامارات فقط، انما نلوم وزارة المالية والصناعة على قصورها في حل المشكلة مع البنوك والتي طرحت قبل فترة حين قررت مؤسسة الامارات فرض رسوم بنسبة مئوية لا اذكرها على كل استخدام للبطاقة الائتمانية واعترضت الجهة المسؤولة عن بطاقات “فيزا” بانها عملية غير قانونية ولا يحق لـ”امارات” فرض رسوم، وبذلك قررت “امارات” بمنع استخدام البطاقات في محطاتها، ويتضح لنا انها مجرد علمية عناد مع “فيزا” !
قرار غبي جدا!
منع استخدام بطاقات الائتمان في محطات «إمارات»
تقرر منع استخدام بطاقات الائتمان في كافة المحطات التابعة لمؤسسة الإمارات للبترول «إمارات» اعتباراً من 20 أكتوبر الجاري، وذلك لارتفاع الرسوم المصرفية، وجاء قرار المؤسسة في إطار اتجاهها لتقليص المصاريف التشغيلية في محطات البترول التابعة لها. وكانت المؤسسة قبل شهر تفرض رسوماً على استخدام بطاقات الائتمان ورغم ذلك فإن المصاريف التشغيلية كانت تعتبر مرتفعة بسبب استخدام هذه البطاقات.
دبي ـ «البيان»:
الله يوفقك ان شاء الله في بحثك في بداية الامر اخوي انا اداوم في شركة ادنوك للتوزيع كمدير مبيعات وكل اللي قلتلك اياه مب مصدره موقع او دكتور قال بالعكس اللي قلتلك اياه سياسة واقعية في شركتنا وكل الامور اللي تحدث مب وجهة نظرة مثل ماتفضلت انما طبيعة عمل شركات التوزيع
انت تقولي عطني قرار او صورة قرار .. الله يهديك منو منا مايعرف ان سعر البترول تقرره حكومتنا مب شركة البترول نفسها ولا كنت بتلاحظ سعر البترول في شركات التوزيع المحلية مختلف
شوف الموضوع متشعب ويمكن ماعرفت اوصلك الفكرة بشكل صحيح وانا ماباك تخلط بين نشاطات الشركات اذا حاب تتواصل معاي اوضحلك الصورة اكثر انا ماعندي مانع وفي نفس الوقت اقدر ارتبلك اوريانتيشن لمدراء الاقسام عندنا في الشركة عشان تاخذ فكرة اكبر واوضح لطبيعة عمل الشركة وفي نفس الوقت عشان يساعدك في بحثك
الموضوع فيه وجهة نظر اخوي
يعني اذا قطر والسعوديه تتحمل الخساره بتكون تتحمل عبىء كبير لان هم يبيعون البترول باقل من سعر الامارات بحوالي النصف!!!!!
والامارات تبيع البترول باكثر من قطر والسعوديه بالضعف مقارنه باسعارهم انزين ليش الامارات ماتقدم الدعم اللي تقدمه قطر والسعوديه وتبيع بنفس السعر والسعوديه توجد كثافه سكانيه فيها تقدر بعشر اضعاف الامارات والامارات اقتصادها فوق الريح عالي..!!!!
اذا بعض شركات البترول مثل ماتفضلت وقلت تشتري البترول من الخارج وذلك بسبب فرق السعر البسيط ليش ماتشتري جميع الشركات من الخارج دامه رخيص ولو الفرق بسيط جدا ليس تتحمل اعباء التصدير والشحن وهذا اللف والدوران كله وتكتفي بالشراء من الداخل دام الفرق بسيط…!!!!
اخوي مب كل ماينقال من خلال موقعهم الالكتروني صدق وواقعي
والكلام اللي قلته كلام موثق من خلال واحد من دكاتره الاقتصاد بجامعه الامارات بعد ماسالته
وعلى فكره ما اذكر كان في مرسوم او قرار من مجلس الوزراء بزياده اسعار البترول هذا على ما اذكره(كأن قرار الزياده طلع مابين ليله وضحاها دون تدخل اوموافقه احد المسؤلين وبدون اي تعليق منهم..شي غريب!!!!) يعني مافي اي شي من خلال وسائل الاعلام يدل انه في قرار من جهات سياسيه عليا توافق على الزياده…هذا طبعا بشكل مباشر ويليت لو ترفقلي وصله بالخبر اذا عندك لاني محتاجنه ببحث
حكومة السعودية وقطر ايضا تدعم شركات التوزيع اللي موجودة فيها – وعلى سبيل المثال ـ.. عندنا في ادنوك للتوزيع في شي يسونه يديد اسمه المشروع السعودي وهو عبار عن اقامة محطات للادنوك في المملكة العربية السعودية ويوم بتبيع ادنوك للتوزيع البترول السعودي بتبيعه بنفس السعر اللي قررته الحكومة السعودية وهي ايضا بتتحمل الخساير .. انت لو زرت امريكا كنت بتشوف محطة فيها سعر الجالون غير عن سعر محطة اخرى تابعة لشركة اخرى وذلك لانهم يرتبطون باسعار عالمية (( عادي تشوفهم مثل البورصة)) بس بالنسبة لشركات المنطقة تلقى دعم من الحكومات عشان جيه الحمدلله اننا مب مرتبطين بالسعر العالمي
اما بخصوص المصفاتين اللي عندنا واتقول ماتكفي احتياجات الدولة بالعكس اخوي تكفي وتصدر للخارج بعد .. تقدر تدخل الموقع الرسمي لشركة تكرير وتطلع على اداء المصافتين كيف
http://www.takreer.com/
وبالنسبة لشراء بعض شركات التوزيع عندنا للبترول المكرر من الخارج لانه يفرق قيمة بسيطة يعني مثلا شركة الامارات (( شركة توزيع )) حبت تشتري بترول مكرر وشافت شركة اخرى اقل قيمة من شركة تكرير .. اكيد بتاخذ من هالشركة.. كل هذا بزنز اخوي حتى في الشركات من بينهم
اخوي انا ما اقصدك انت ولكن اتكلم بشكل عام عن سبب ارتفاع البترول وبخصوص شركات البترول اللي تشتري البترول من الشركه الام تراها تشتري بالسعر العالمي اللي تقول عنه وانا قارنت بينا وبين قطر والسعوديه عندها البترول باقل من سعرنا وبفرق امياااااااااااال وعنده نفس السياسه في شركه ام تتولى بيع البترول لشركات التوزيع يعني مايفرق شي
وبخصوص المصفاه اللي عندنا لو تلاحظ انا قلت مصفاه ماتلبي الطلب الداخلي عندنا يعني عندنا نقص بالبترول المكرر ونطر نشتري بترول من الخارج ويطلع علينا بسعر غالي وبالتالي نطر نبيعه على الافراد بسعر غالي
لو عندنا مصافي تلبي الطلب الداخلي ما كان وصل السعر لهذا الارتفاع بغض النظر كانت ادنوك او الامارات او اينوك من وين تشتري البترول ….يعني لو كنا نكرر البترول عندنا بشكل كلي كان طلع علينا بسعر رخيص وكنا بعناه بسعر اقل لشركات التوزيع ولكن دام نشتري البترول المكرر من الخارج ونرجع نبيعه على شركات التوزيع لازم يطلع علينا غالي
مثل ماقلتلك بتعليقي السابق موضوع ارتفاع البترول عندنا مشربك ويتعلق بقرار سياسي بالدرجه الاولى طبعا هذا بعد ماضربني الفضول ورحت وتخبرت وسالت بعض اللي عندهم خبره ودرايه بهذا الموضوع وحصلت على بعض الاجوبه …