قصة من الواقع الاليم .. بناتنا والزواج ..

يا جمااعة الخير هاي بعض من قصص المعاناة اللي تعيشها بعض من بناتنا الاماراتيات ..

اقرو القصة للآخر والله يعينها ياربي ..

حقيقة غمضتني ودمعت عيني عليها من واقعها الاليم ..

عمري 30عندي حرمان عاطفي قبل لا تحكمون عليه حطو نفسكم مكاني..أنا أبوي توفي وعمري 11 سنه ما لحقت أحصل على حنان ودفوة الأبو لان كان كبير فالسن وتعبان..أمي حرمه كبيره وصحتها على قدها وماتعرف أحتياجي ربتني عالشدة والعصبيه.. وأخواني الشباب معرسين من يوم أنا كنت ياهل وعيالهم شباب كبار.. يعني ما حسيت بحنان الأخ كلهم منشغلين بحريمهم وعيالهم وخواتي نفس الشي أكبر مني معرسات ومشغولات بحياتهم وعيالهم إن يونا البيت أنا يالسه وياهم مثل الغريبه في فرق فالسن وايد كبير هم كبار ويرمسون عن مشاكلهم وعيالهم مع بعض وحريم إخواني كبار نفس الحاله..وأنا روحي وحيده محد حاس فيني يالسه ساكته محد حتى يفكر يقولي شو أخبار شغلج أوشو مسويه أو شو محتايه أو يطبطب عليه أو يحضني حتى لا تقولون كبيره أنا أصغر منهم بوايد..وخواتي الكبار ال2 أل فالبيت مب معرسات ولا يبن يعرسن محد تقدم لهم و كل وحده مهتمه في دوامها المديره والثانيه مدرسه وجافات و حابسات عمارهن فالحجره كل ما رمسهم أو ألمح لهم فسالفة العرس ما يهنمون أكتشفت إنهم يقولون مب محتاجات ومرتاحات جي وأنا سكت هاي رغبتهم ومشكلتهم كيفهم المهم اللي انا ابىأقوله إني غير عنهم أنا أحس أني من يوم أنا صغيره ومحتاجه للحضن والحنان مابا مصيري يكون مثلهم هم حياتهم كلها للشغل والوظيفه..انا صح موظفه بس لا مب أولوياتي الشغل..أحس إني أبا شي ثاني في حياتي ناقصني..تعبت مب عارفه كيف أعبر عن هالشي فيني طاقة من الحب محتاجة أعرس…آسفه لو جرحت مشاعر البعض منكم بس ها واقعي أنا. وبنات وايد مثلي.

بنات هالشي سبب لي وايد مشاكل..انا خايفه على نفسي لاني ولله الحمد شكلي صغيره وكيوت وأحس في ناس تنجذب لي مثلا كنت سايره فرع من أفرع دوامي وعقب أسبوع أكتشفت إن في ناس قالوا حق موظف فدوامي منو هاي البنت الكيوت ال عندكم وكانت يايتنا؟ ماقول إني ملكة جمال لالالالالالالا القصد يمكن فيني شي يجذب وأشوف نظراتهم ودوامي ال قبل طلعت منه بسبب المشاكل أل يتني من كثر الناس أللي مب زينين كانوا يلحقوني وما يبون مني إلا إنهم يتعرفون يعني مب بقصد الحلال وطلعت من البلاوي والأذى ال شفته منهم وغيرت دوامي..حاليا أنا فوظيفه يديده وللأسف يا بنات ما جذب إلا الناس أل مب مناسبين يعني لا من طبقتي الإجتماعيه (وأنتو تعرفون عدنا فالبلاد كل قبيله أو طبقه تتزوج من نفس الناس) يعني العرب وغيرهم وغيرهم..مابا أوضح أكثر…يعني حاليا إل شفته منجذب لي واحد معرس وعنده عيال وطبعا أنا علاقتي رسميه بس ينعرف من نظراته وإتصالاته ويتعذر بأي سبب عشان يشوفني وأصلا نهائيا غير وارد فحساباتي أنا بس مجرد إني أضرب لكم مثل..والثاني أل أحس به بعد منجذب نوعا ما صغير فالسن يمكن عمره 21 سنه ويتحراني قده!!! يعني مب عارفه ليش دايما بس يا معرس يا ياهل هو ال يصد صوبي..؟ وين باقي الرياييل إل فسني أدري إنهم عرسوا من زمان و الصغار بيتزوجون أل فسنهم قوم بو 22 سنه ..إنزين إحنا أل فالنص وين نسير؟؟؟ ماشي رياييل إنتوا ما تشوفون نصهم معرسين ونصهم عازفين عن الزواج ومعقدين ولاعبين لعبتهم..ولا أستغفر الله بتشوفونهم منحرفين من أل المجتمع المنفتح أل إحنا فيه وفاهمين قصدي ولا بيتزوجون أجنبيات والبنات أكثر عن الشباب..وهالشي أل مخوفني..

يا جماعة إفهموني مستويه مب قادره أسيطر على قلبي و نفسي أي كلمه تجذبني وأي مدح يخليني أفكر 100 مره..وأنا مابا هالشي..أنا أبا الشي الصح مابا أغلط أبغي أعف نفسي من هالأشياء..قبل فتره كان في شخص إنعجب فيني وقال بتقدم بس قبل لازم أتعرف وأنا رفضت هالشي رفضتتتتتتتته لاني نفس الشي أعرف نفسي مابغي أغلط وأنجرف ورا الكلام المعسول وتركت هالشي بنات أنا الكلمه البسيطه تأثر فيه لاني محرومه من الحنان ومحد إهتم فيني الكلمه تخليني أفكر فيها طوووووووول اليوم مثل المراهقه رغم عمري 30 مب 16..تركت كل شي حرام لاني مابغي أغضب ربي أبا أدعي والله يستجيب دعائي مب إني مسويه إثم وبعدين أدمر حياتي كلها عشان علاقه ما تسوى وماضمن نهايتها..جربت مواقع الزواج وماشفت فيها أي فايده تذكر والغالبيه يبون بس يتعرفون وأنا لاعت جبدي من هالشي كرهته أعرف بس لعب وتسليه..بتقولون أهلج وأقاربج أدري..بقولكم للأسف أهلي إنطوائييييين وأمي حرمه كبيره ماتعرف إلا ربعها إلي عيالهم أصلا تزوجوا من زمان.. عافانا الله خوات كل وحده منهم نفس الشي ماعندها معارف إلا محدودين ..لا أهل فسني ولا جيران من نفسنا ولا عزايم ما يعرفون حد..إنزين أنا شو ذنبي أبا أعرف؟ إذا إنتو جي هل معنى هذا إني أنا أضيع مستقبلي بسبب إنكم ما تعرفون الناس؟؟ يعني لا يبادرون يعزمون أو ينعزمون تعبت نفسيا شو الحل..يوم يقولولي فلانه إنخطبت أستغرب أقول مشاالله بس كيف؟ ومن وين ؟ الله يسعدهم محسدهم على شي الله الرازق بس أقول شو الوحده تسوي عشان تنخطب وين أسير شو لازم أسوي؟…تخيلوا وصلت لدرجة إن وحده باكستانيه فالدوام تقوللي إنتي سيري عند أهلج قوليلهم تبين زوج ولا تيلسين تضيعين عمرج جي متا بتلحقين تيبين عيال! تخيلوا سرت أصيح البيت وأدعي ياربي أكفيني شر هالناس و كلامهم الجارح! لمحت حق واحد من أخواني مره بطريقه غير مباشره..جان يقول مستحيل أسير عند ربعي وأقولهم تزوجوا أختي…أتصدقون أعرف بنات يطلعون مع شباب وخطبوهم..وبعد ني ماقول غير ياربي أنا مابا أسوي الشي الغلط أنا تركت اشياء وايد عشانك ..يالسه أجاهد نفسي وإنتو تعرفون شو أقصد قمت ماسير السينما..مابا أشوف فيلم رومانسي عشان ماتتعب نفسيتي..فالردايو يوم يحطون برنامج عن الزواج ويناقشونه غيرت القناة إن قريت كتاب وطلع قصة حب عقيته بعيد..مابا أيلس أفكر..بس أبغي زوج صالح يعوضني عن الأيام الحزينه والوحدة ال شفتها ويتم وياي طول العمر ما يتركني عشان أقل مشكله..أنا أقول لكم هالكلام عشان أفضفض بس عن أل داخلي وأكتب ودموعي تنزل أعرف ماعندكن الحل بس عالأقل إسمعوني لان أهلي ما قدر أقولهم هالشي…وإسمحولي لو جرحت مشاعركم : (

الله يرزقها يارب بالزوج الصالح ..

شو رااايكم يا جماعة الخير ..

= (