السلام عليكم ورحمة الله وبركاته ..
هذه قصيدة لشاب متهور كان السبب في موت والدته بحاادث سيارة …..
في البدايه جفت هالصوره لابن يلبس والدته نعلتها ..الله يرحم حالها وحال من برها ..
يواسيني وانا الميت وحالي يجبر الدمعات

تسيل من الذي فيني ويبكي وهو يواسيني

وانا ابكي واتنهد وارسم بالحزن لوحات

يجبروني عشان امشي ورجلي ما تمشيني

قتلت رعايتي بيدي قتلت الحب والرحمات

حرمت النفس من حقها وانا ابكيها وتبكيني

وكنه حلم قدامي يقيدني من الصرخات

ابي اصحى ولكني عجزت القى ال يصحيني

فداك القلب يايمه ومهما قلت من كلمات

صغيره في كبر حقك بس اتمنى تعذريني

نهبت الفرح من بيتي صحيح اني خسيس الذات

صحيح اني ولد طايش وكل ما أسمعه فيني

تجول عيونهم فيني تفصل مني قياسات

وتشيح وجوههم عني وكني غيرت ديني

يظنوا حزنهم اكبر وهم اصحاب هالمأساة

وانا اتحدى اذا فيهم ربع ما يحترق فيني

نقص قدري بعد موتك وغابت نشوة اللذات

وصار الهم عكازي اباكيه ويباكيني

عطيتيني بدون حساب ولا سمعتك تقولي هات

وانا اشرب حيل من دمك ودمك ما يكفيني

يايمه ارجعي كافي ابجلس معك لو لحظات

واقبل ايدك ورجلك وافرش لك رمش عيني

يايمه ما تحملهم يقولوا فات ما قد مات

تعالي غيري هالقول واطيعك باقي سنيني

واترك عادة التدخين وانفذ ما تبي بسكات

واصلي الفجر في المسجد قبل منتي تصحيني

يايمه ارجعي تكفين وطفي شمعة الآهات

ابيك انتي ولا غيرك على موتك تعزيني

وضميني وداويني مثل ما كانت الهقوات

ما ابي احدن يواسيني ابيك انتي تواسيني

دخيلك بس لا تبكي اذا شفتي بي الدمعات

انا مقوى ابكيك اذا انتي تبكيني


أسال الله أن يغفر لها ولجميع موتى المؤمنين
ولو كانت القصيدة جديمه بس أحب كلماتها ونقلتها لكم

9 thoughts on “قصيدة تبكي اللي ما يبكي ..”

  1. كلمات مؤثرة .. واحساس رائع من الشاب ولكن متى ؟ بعد فوات الأوآن

    كلنا نحس بس احساسنا للاسف يكون بعد ما يفوتنا القطار

    للأسف ما عرفت اعبر وربي اصابعي مب قادره تكتب

    بس اقول الله يخلي لي امي ويخليها راضيه عني

  2. الله يرحمها ويغفر لولدها سبحان الله الوالدين في بعض الأبناء ما يحس فيهم الآ اذا توفاهم الله يومها يتحسر على كل

    لحظه عصاهم فيها او لم يأتمر بأمرهما ,,,,,,,,

    اللهم أرحم وأمي وأبي كما ربياني صغيرا وأرحم أموات المسلمين ورقق قلوب ابناء الموجودين انك سميع بصير ,,,,,,,,,,

    شكرا اختي على هذه القصيده المنسوجه بأحاسيس صاحبه

Comments are closed.