قصيدة رجل يخاطب عريس حبيبته

اليوم جبت لكم قصيدة رائعة جدا عن واحد يخاطب عريس حبيبته

ان شاء الله تعجبكم

————————————————————————————————

أبــد مـا جيت ابـــارك لك ولكـن جيــت باوصّيـــك

علـى الله نــاوي ٍ تدخــل بهـــا الليلـــة مُعذّبْتـــي

تــرى لولا الظروف اللي عطتْك وحدّت محاكيــك

قســــم بالله ما تدخــل عليهـــا لـو علـى رْقبْتــــي

ولكنّ النصيب اقوى ولا ادري ويش اسوّي فيـك

نعــم صــارت معــزّبتــك ولا صــارت معـزّبْتـــي

كذا شــاءت بنــا الأقــدار تحرمنـي لجـل تعطيـــك

كذا لازم عشــان تفوز إنت .. أخســــر بتجـربْتـي

تـــــراهـا غاليــة جــــــداً وتكفـــى والله يخليــــك

تـدللهـــــا .. تدلعهــــا .. تنسّيـهــــا مصاحبْـتــــي

أنا من كثر ما اغليهـــا أحس انـي بديـت اغليــك

ولا تســـأل بأيّـة حـــق .. والا ّ وش منــاسبْـتـــي

لإنك لو بتسألنــي بتسمــع شــــيء مـا يرضيـــك

لــــذا يا خـوي لا تسـأل .. ولا تسمــع لأجوبْتــــي

أبيــك تحطهـا في داخل عيونـك .. وبيـــن ايديـــك

وهي دلوعــه اعتـــادت علـى كثـــرة مداعبْتــــي

فداعبهـــا شـــوي شـــوي حتــى تشتهـي طاريـك

وشاغبهـــا إليــن تقـــول لـك بطّـــل مشاغبْتـــــي

واذا هي مالها خلقــك .. ولا تضحك ولا تسلّيـــك

تحمّلهــا وإسألهـا: يـا عمـــري ليـه عصّبْتــي ؟؟

وبالــك اسمـع انّك يــوم تضربهــا وهـي تشكيـك

ما يحتـــاج اورّي لك بفـــن الضـــرب موهبْتــــي

صحيــح انــك بتملكها ومعـاك الصـك بالتمليــــك

وانا عــارف حـــدود الله ومـن حقـــك معاقبْتــــي

ولكــن قلّهـا المجنـــــون وصّانـــي وهـو يعنيـــك

يقـــــول انّـه بينتـظـــرك ولـــو شيــّـب وشيّبْتــــي

وانا مجنونهــا اللي ما نساها .. وانت مـا يمديـك

تغطّـــي ذكرياتـــي في هواهـــا وربْــــع تجربْتــي

أحــس اني تمــاديت بكلامــي والغضــب حاديـــك

ولــو انّك في مكانــي مــا تفكّـر فـــي محاسبْتـــي

كفــاك اني تـركـت الليله اشغالي عشـان اجيـــك

دخلت القاعــة برجلــي ولا ادري ويش عاقبْتـــي

وانا مــا جيت اخرّب عرســــك الليلـة ولا أذّيـــك

أنا جيتــــك عشــان اخاطبـك واسمـع مخاطبْتـــي

توصّـــى وانتبــه واحرص عليهـــا والله يهنّيـــك

تـــرى كل الكلام اللي طلَع مـــن ضيقـيَ وكبْتـــي

ولكــن ما قدرت انـــّي أقولــه وانـت مـا يخفيـــك

أخــاف انّــــي إذا قلتــه تقـــوم وتقطــــع رْقبْتـــي

————————————————————————————————