طبعا اكيد سمعتوا بالحملة الي اطلقتها اذاعة الشارجة واللي اساءت بشكل كبير لصورة المواطن بطريقة غير مباشرة
انا مع اظهار صوت المواطن واحتجاجه على غلاء الاسعار لكن مب بهالشكل
بصراحة قمة المهزلة وسمعوا هالقصة
امس كنت واقف في محطة البترول وبالصدفة بجانبي كانت سيارة فيها شباب من جنسية بدون ماحدد
ومالاحظوني لاني كنت حاط مخفي
المهم كان ظحكهم مختلط مع صوت الراديو ..
في البداية ظنيت انهم فاتحين على برنامج فكاهي او شي من هالقبيل
لكن يوم اركز اكتشفت انها اذاعة الشارجة وفي واحد متصل يتكلم عالهوا انا على طول فتحت عالاذاعة
كان برنامج البث المباشر لاذاعة الشارجة وواحد متصل وبصراحة كان كلامه فضيحة بمعنى الكلمة
الريال متصل يشتكي على ان معاش التقاعد مايكفيه هو وعياله ماذكر عددهم…. ليش ما يكفيه؟؟؟
عياله يبغون يلبسون كنادير ب 250-300
عياله ماعندهم بيزات عشان يعبون بترول ويظهرون ويا ربعهم ويستانسون الخ… واخر شي ترك اسمه
ولسان حاله يقول اذا حد بيتبرع او يتصدق علي اسمي كذا ………. يعني بالعربي طرارة عالهوا
ووحدة متصلة تقول ان بنتها ماكملت الجامعه بسبب ان ربيعاتها في الجامعة يلبسون احسن عنها وانها محتاجة
اكيد سمعتوها لان المقطع انعاد اكثر من مرة .. على قولة المثل اللي مايشتري يتفرج
وشي وايد اتصالات على نفس المنوال
معقولة يا جماعة نفظح اعمارنا قدام الي يسوى واللي ما يسوى وبانفسنا
مب كان مفروض عالاذاعة المحترمة انها تكون اكثر انتقائية في الاتصالات وماتترك المجال لمثل هالنوع من الاتصالات
واذا حد بيشتكي عن حاله او وضعه فيكون فعلا محتاج مب مثل الحالات المذكورة
بذمتكم شو الانطباع الي بياخذه الي يسمع هالبرنامج عن الشعب الاماراتي؟؟؟؟
اترك لكم التعليق عن الموضوع واتمنى توقف هالمهزلة
أتمنى من الأخوة الأعزاء أن يتناقشوا بهدوء وبعيدا عن العصبية … أخونا الفاضل صاحب الموضوع طرح وجهة نظره وبطريقته الخاصة ويكفي تلك الانتقادات اللاذعة لشخصه … البعض ترك لب الموضوع وتمسك بالقشور … من يريد أن ينتقد بطريقة حضارية هناك اختراع يسمى رسالة خاصة …. شكرا لتفهمكم …
و الله مكالمت ام احمد اتقطع القلب و المصيبة عندما قالت بنتي ثانوية عامة تاخذ درهم
واحد معها نحن يهالنا 10 دراهم مايسدنهم .
ما سووا شي غلط
بس الغلط يوم تشوف عمرك فوق الناس
اخويه الناس مب كلهم مثل بعض
اذا تشوف غلطتهم انهم تكلموا قووول الحمد لله اللي رزقني بشي غيري محروم منه
واذا ما درسوا ترى مب كل الناس قادرين عالدراسه
اللي يشوف اهله محتاجين او عاجزين طبيعي انه بيوقف دراسته ويشتغل بدون شهاده
نقول الحمدلله اللي انعم علينا بالمال والصحه ويسر لنا التعلم
بس في نفس الوقت ندعي للي انحرم من النعمه اللي انعم الله بها علينا
((مب نقول فضحونا))
تبون الصراحة يعني الريال صادق وماجذب بهم …..
احنا مب ملعوزنا ولا مفقرنا غير هالمظاهر التافهة الي مالها معنى ولا رواتبنا الحمدالله تكفي وتزيد اذا صرفنا على قدنا….
ياخي كل واحد يمد ريوله على قد لحافه ويحاول يطور نفسه ويدرس ويتحرك ويشتغل ليما يوصل …
اما انه والله معتمدين على الحكومة بكل شي بعد مايستوي مافيه دولة بالعالم تصرف على المواطنين لهالدرجة……
احنا من كثر ما الدولة تعطينا وتصرف علينا بطرنا صراحة وصار الفقير فينا الي ماعنده مليون
اوكي صح فيه فقارى مانقول لا بس اعدادهم قليلة ونسبة كبيرة منهم هم السبب في فقرهم وكله بسبة المظاهر ولا شي غير المظاهر
انا اعرف ناس وايد يستلمون من الشؤوون بس والله حالهم احسن مني ومنك ومع ذلك يعتبرونهم من الفقرا
ويدشون بالاحصائية تبع الفقارى بس لانهم يستلمون من الشؤوون وكل الي الناس الفقارى الي حوالي نفس الشي يعني بصراحة ماعرفت بحياتي مواطن فقير فقيييير عالاخر
ونا من الناس الي راتبي تحت المتوسط وراضيين الحمدالله والشكر علشان ماتقولون عني بطران وعندي بيزات ومب محتاج
وفي الاخير مايصح الا الصحيح وليس من يعمل كمن لايعمل
وسلامتكم يالربع