كل سالك وانت هالك …

السلام عليكم

اخواني انا ما اعرف كيف هالنظام يشتغل ويقص علينا ونحن بس ندفع

يعني من بداية ما اعبي سالك يوصلني مسج ايقوللي :

لقد تم اضافة رصيد لحسابك ********** عن طريق محطة ابكو / اينوك رصيدك الجديد هو 50.00

وبس أمر من عليه 3 مرات تعطيني الرسالة

رصيدك 38.00 في حساب سالك ******* أقل من مبلغ الشحن المطلوب الرجاء شحن الحساب فوراً

لين الحين تمام ويحسب صح

طيب كيف فيه 38 درهم وأقل من مبلغ الشحن المطلوب ؟؟؟؟

المهم بعد فترة مريت يمكن 5 مرات وقاللي :

رصيدك 18.00 في حساب سالك ****** اقل من مبلغ الشحن المطلوب الرجاء شحن الحساب.

يعني كم باقي لي :

4 مرات أمر فيه بس أقسم بالله اني ما عديت أكثر من4 مرات

وفجأة لقيت الرسالة اتقوللي :
رصيدك في حساب سالك غير كاف الرجاء شحن الحساب خلال يويمن عمل لتجنب اي مخالفات.

لو ترجمنا هالرسالة عملياً بنلاقي ان رصيدي قليل وما هو بكافي علشان اعدي فيه
انا قلت ما عليه انا هاليومين ماراح أمر على سالك بالتالي ماراح أعبي رصيد

أكتشف بعد يومين عندي مخالفة 50 درهم مرور سالك بدون رصيد

يعني كيف يا جماعة فهموني والمشكلة دقيت عليهم وزاعقت وياهم ولا احد عنده رد كافي الكل يقول هذا قانون

وحدة تشتغل في سالك احلف لها اني ما مريت بدون رصيد اتقوللي لا بلى مريتي

طيب كيف اثبت وكيف هم يثبتون ؟

ونفترض اني مريت ليش ياخذون 50 درهم غرامة وانا ما وصلتني رسالة اتقول ان رصيدي نفذ

الرسالة توحي بان الرصيد غير كاف فقط فقط

وليش لازم علي اني اعبي خلال يومين ,, ليش هالالزام ؟ واذا ما عبيت اتخالف

نفترض اني ما ابي استخدم سالك مرة ثانية
ليش ايحطون غرامة 50 درهم علي وانا ما استخدمه

والله يا جماعة الموضوع محزن وهذي مقصة عيني عينك
وثاني مرة تستوي وياي … كيف نحن راضيين وكيف ان الحكومة تفرض شي بدون رغبة الشعب
وين الديمقراطية ؟

والله لو سوينا استفتاء ورصدنا الموافقين على سالك بنحصله 1 قدام 7 مليون
ممكن واحد يرد ويقول : لا سالك حل وايد مشاكل وخلى الدرب سالك
بالله عليكم مروا على القرهود الساعة 5 العصر لين 9 بالليل وشوفوا كيف السالك اللي تنادون به
انا اوصل الشارقه من القرهود في ساعة
والله اني لو رحت على معبر الخليج ومن على نفق المطار اوصل أقل
يعني وين الفايدة منه ؟

وين حق الشعب في التعبير .. وين احترام اراءنا .. وكيف نحن بس اللي لازم نتبع قوانين الدولة بدون ما هي تدور على مصلحتنا وتاخذ رضا الشعب على الدولة .
هذا ابسط شي ..