كل عضو سافر صار لة موقف مضحك

6 thoughts on “كل عضو سافر صار لة موقف مضحك”

1. مرة كنت في رحلة سياحية نيوزلند المهم

   كنت في منطقة اسمها كرايست جيرج في المطار وكانت الدنيا كلها ثلج وتأخرت الرحلة 4 ساعات

   والمطار ممزور ناس ماشي مكان لليلسة الناس متسدحين في الممرات وفي كل مكان

   المهم انا مليت قلت بقرب من باب الخرطوم اللي يودي الطيارة

   لقيت لافتة مكتوب عليها ممنوع الاقتراب على الباب

   طبعا بو عراب رزة قلت بحط ايدي شوية بس بلمسة

   والله ممامداني المس الباب الا يصيح جرس انذار مثل مال الحراق واشتغل ونان فوق الباب وصوت الونان على

   انا من القفطة تميت اضحك اونة عادي والعالم متمللين وحصلو شي يضحكون علية

   ضحكو علية ضحك وانا اضحك معاوهم اونة عادي

   يوم رجعت عند اخواني ليتهم يجلبون من الضحك

2. ^___________________________^ ما خليت مكان ما سافرت ولازم على كل سفره يستوي شي لكن سفرتيه لمصر ما تنسى على ايام الطيش يعني عقب ما عقلت ^_^ كنا في مصر سايرين هلتون رمسيس ندخل المركز ضربه وفي نص دقيقه نتوزع هذا يسير ويا هذا طبعا اشيبه ما يسويلنا سالفه سااااااااااااااار سيده ويلس في الكوفي ويقول للعيوز ما تيلسين في نفس الكوفي سيرو اي مكان .. المهم امي وخالتيه سارو ويلسو في الكوفي فوق وانا وبنت خالتي بورحنا ما نبا حد ويانا “روحنا راس” المهم قمنا نشرد عنهم وندور في نفس الطابق يمكن ربع ساعه ندور وندور لين ما دار راسنا ويانا هههههههه وكان في ايدي فراخ مادري شو استوا واشوف الفراخ يطير وانا اطير وياه مادري شو اللي زلقني … ونفضت عمري بسرعه وبعدني رديت خذت لفه اونه اقول لبنت خالتيه صبري بنرد ناخذ الفراخ … ههههههههه يوم وصلنا اي فراخ الله وكيلكم خمو المكان وبلاخير حصلنا السلم المتحرك وكملنا حواطتنا في المركز

3. السالفه هذي تستوي كل سنه في مطار دبي ,

   واخر مره صارت لي يوم 19 الثلاثاء من الشهر اللي فات , كنت انا وربيعي مسافرين مصر وانا كنت بدله .( متعود ) وربيعي كان لابس جلابيه , وخلصنا من الشنط والاجراءات ويا دور الجوازات والتفتيش ولما شافني موظف الجمارك قالي اخوي الوافدين من هذا الباب خخخ

   انا طبعأ سكتت ويلست اتكلم معه مصري اشويه وقلتله كلنا عرب يا باشا مفيش فرق بينا وعصب عليا وطلعت له الجواز (( طلعت مواطن اماراتي 100 % )

   طبعأ الموظف استسمح مني وانا اخذتها ع نيتي

   الموقف الثاني :: في القاهره صار لربيعي في منطقه اسمها شارع جامعة الدول
   ربيعي كان يبي يروح الفندق ( الماريوت )) وع فكره اهوه اول مره يسير مصر وما له اي خبره في اسعار العملات هناك

   طبعا كان لابس جلابيه (( خليجي ))و وقف تكسي يوصله الماريوت ..وعند باب الفندق طلب سائق التاكسي فلوسه 120 جنيه .. وريبعي ما قصر عطاه وطلع وبعد يومين طلبت من ربيعي يلبس بدله ويكشخ اشويه لاننا منطلع نتمشى ف نفس الشارع ( جامعة الدول ) و وافق ولما خلصنا السهره وقفنا تكسي وانا طبعا في مصر كله اتكلم مصري (( وطلبت من ربيعي ما يتكلم خليجي ابدا ))وطلبت من السواق يوصلنا الماريوت , وع الدرب تميت اسولف مع التكسي ..ويوم طلبت الفاتورة قالي 20 جنيه .. وانا نازل من التاكسي اشوف ربيعي اتعلق براااعي التاكسي

   وقاله يا حرامي من يومين قصيت علي واخذت مني 120 ع نفس الشارع ونفس الفندق

   ورااعي التاكسي قال انا اول مره اشووفك يا باشا خخخ ما بعرفكش

   يخلق من الشبه 40 طبعا هديت ربيعي وطلعنا الفندق ويلست اتمصخر عليه اشوي ليل ما رقد خخخ

4. هاي سالفة استوت معاي ايام الدراسة بامريكا تقريبا بعام 98

   انا وربيعي كنا طالعين من السينما في مكان شرات مرسى دبي (Marina Walk) مكان مفتوح وفيه سينما 21 قاعة ومحلات وبار واحد. اخر الليل انا وربيعي سايرين جدى الباركينج طول الدرب يمشي ورانا واحد سكران ع الاخر..غصب يمشي ع ريلين..شوي يسبنا وشوي يضحك ويانا وشوي يصبع لنا لوول..المهم كنا مطنشينه..ركبا السيارة وتحركنا..والسكران تم يلحقنا والشوارع فاضية..وعلى نفس الموال شوي يسبنا وشوي يضحك ويانا بس هالمرة يلف علينا بالسيارة..ياي على باله يمزح ويانا بالسيارة لوول

   ونحن كنا سايرين الفندق عشان انشوف شباب زايرينا من منطقة ثانية..والسكران ورانا لين ما وصلنا جدام مدخل الفندق نزلنا وهو نزل من السيارة..ويا جدى ربيعي شوي يضحك معاه وشوي يسبه وهو يترنح يمين ويسار مب قادر يوقف على ريله..مره وحده ضرب بوكس في خشم ربيعي..ونزل دمان من خشمه..

   هني قلنا لا الحبيب عطيناه ويه وايد..

   طبعا للظروف احكام..يعني لا تاخذون فكرة عني لووول (انزين كمل السالفة)

   طحنا فيه ضرب..يعني كيف اشرح لكم؟ تشويت في الويه..وفي الاماكن الحساسه والغير حساسه..انضرب من خاطر..واتوقع طلع فيه شي مكسور..طلعنا حرتنا فيه مال كم من سنه عليه..طبعا هو سكران ما حاس بالدنيا..شل بعمره وركب السيارة وروح..دقيقتين دورية شرطة وصلت (طبعا العرب يسمونهم عباس لوول ..هاي روحها قصة ثانية) طلع اللي في لوبي الفندق متصل بالشرطة..

   المهم سألنا الشرطي شو مستوي؟..قلنا له واحد سكران نزل وضربنا حتى شوف الدمان يطلع من خشم ربيعي..جان يقولنا شو مواصفات السيارة؟ قلنا ما لحقنا ناخذ لان ظلمة وفاجأنا..جان يقولنا تبون تفتحون قضية عليه؟ قلنا لا لا بسيطة.. بس دمان في الخشم..( الحبيب ما يدري ان السكران يوم بينش ثاني يوم بتكون فيه عاهات الدنيا في جسمه لووول). وروحت الدورية..ونحن ميتين من الضحك..

   الحمدلله السالفة عدت على خير ولين اليوم كل ما نذكر السالفة نضحك على اعمارنا..كنا في سن المراهقة.

   المهم لا تاخذون فكرة غلط عني..تراني هب شراني.. وايد هادي بس تدرون الدفاع عن النفس واجب لوول

5. بصراحه انا حصل لي موقف بايخ لول

   من سنتين رحت مع اخواني لدولة عربية

   للي حصل

   ان السياره تعطلت في الدرب الساعه 2.00 ظهراً ..والطريق شبه مقطوع

   الحل هو المشي سيراً على الاقدام 6 km لأقرب ورشه خخخخ

   يعني للي صار الأبطال توهقوا وماكان الا اننا نمشي ال6 كيلو

   بالفعل مشيناها خخخخخ

Comments are closed.