السلام عليكم ورحمة الله وبركاته ….
عندي مشكلة في موتري الفتك .. تظهر لي رقلة من سرعة 100 ألين 120 ومن عقب تختفي .. وديتها كذا مرة عند محلات التواير (Emarat – Tyre Express) و السركال وسويتله ميزانية تواير وبدلت أماكنهن … في البداية تكون الرقلة مختفية ومن عقب تظهر 
بس الريال اللي في Emarat – Tyre Express قال لي
بأنه هناك قطعة تتركب عند الجامبينات وأنها بتحل لي المشكلة؟؟؟
بأنه هناك قطعة تتركب عند الجامبينات وأنها بتحل لي المشكلة؟؟؟فبغيت أتأكد من هذي المعلومة .. وياريت الشباب اللي عندهم خبرة في هذا الشيء ما يبخلوووون علينا ويدلونا على المحلات والورش اللي ممكن أروح لهم ويضبطون لي إياه … في بوظبي أو الشارجه … وكم بيكلف $$$ وكم الوقت اللي بياخذونه حق التضبيط 
أدري بكم ما بتقصروووووون وياي 
أخوكــــــــــــــــــــــــم …… طـارقـــــــــــــــــــــــ
مرحبا يا طويل العمر …
الفتك من يظهر من الوكالة وهو فيه رقله ….
بخبرك بالسالفه وان شاالله تلقى الحل
لاني عانيت من الرقله ….. وكم واحد من ربعي نفس الشي
أول شي لو اتغير التواير يكوون افضل واحسن ..
وعندك الميشلان … المشلان مب نوع واحد … شي كم نوع حق الفتك مقاس 17 انش
عندك ميشلان بايلوت الامريكية وقياسها 265 / 70/R17 وقيمة التاير حالياً تقريبا من 700 درهم او 750 درهم او 800 درهم على حسب انته من وين بتاخذه لانه شي محلات يبيعون التاير غالي …
وعندك المشيلان التايلندية اسمها كروس وقياس التاير نفس قياس تاير الوكالة اللي ايي على النيسان 275/65/R17 وقيمة التاير تبدأ من 650 درهم وتصل 750 درهم وشي من المحلاتيبالغون فالسعر ويبيعونه بسعر جريب 800 درهم
وعندك الميشلان صناعة كندية ونقشته غير عن النوعين الاولانيين .. نقشته احلى .. وقياس التاير 265/70/R17 وسعر التاير يبدأ من 750 تقريباً و 800 درهم يصل 850 وفي بعض الاماكن يبيعون التاير على 900 درهم ..
****
تنبيه ..
الميشلان الكندي مب منتشر وايد في كل المحلات …
وحتى المشيلان الامريكي
اللي مشتهر فالسوق الميشلان كروس اللي صناعته تايلاند ..
والكواليتي نفس الشي ولكن يفرق بلد الصنع … وبعض الامور والمقاسات ..
والكندي اغلى شي في نفس المقاس ..
واعتقد شي بعد صناعة فرنسية … بس نادرة الوجود حق مقاس 17 انش للفورويل ..
لو تريد الميشلان الكندي بوصفلك مكان اتسيره ولكن السعر غالي …(( عند الشامي )) فدبي صناعية ام رموول )) … بس غالي غالي غالي
ولو تريد الكروس التايلندي بتحصله بكل
محلات التواير تقريباً
وشي اماكن يبيعون التايلندي ب 670 درهم تقريباً او 650 …. وهذا احلى سعر حقه ..
لانه بعض المحلات يبيعونه ب 750 او 800 درهم …. فنصيحتي دوّر محل رخيص …
واتأكد من تاريخ التاير …. لاتنسى التاريخ وبلد الصنع والمقاس اللي تباه …
؟؟؟؟؟؟؟؟؟؟؟؟؟ ويمكن اتحصل من بعض المحلات الكبيرة بعض الاغراءات على التاير بس بيبايعونك بسعر مرتفع مثل ماحصلّي انا … اونه مع غاز نيتروجين … +ميزانية + خرابيط
بس اعرف محل يعطيك ضمان مفتووح على التاير .. او ضمان خمس سنوات والله ….
بس سعرهم غالي … ومن غير الضمان يقولك كل 10 آلاف كيلو اتروح عندهم ويعكسون التواير ببلاش …. (( اكس ))
انزين خلصنا من موضووع التواير …
الله يطول بعمرك النيسان الفتك كل فتره يباله كبس رووودات ….
انا كانت عندي الرقله … وماخليت مكان الا وسرتله …
والله صدعة راس …
المهم سوولي كبس رودات … وميزانية الكترونية للتواير ومن ثمّ ميزانية ارضيه ومن عقبها الموتر صار مظبووط … هذا الكلام حق مووووتر البيت (( نيسان فتك 2008 )) من ظهرناه من الوكاله وهو فيه رقله … وعليه تواير بريجستون مال الوكاله لحد الآن … بس الحمد لله ميزانيته مظبووطه من عقب كبس الرودات والميزانية الارضيه ….
أماّ بالنسبه للفتك مالي موديل 2007 .. وشاب راسي منه هههه
ماخليت مكان وكبست الرودات كم مره وماشي فايده …
آآآخر شي وديته عن محل الشامي اللي فدبي … وبدلت تواير ميشلان … وكبس رودات مره ثانية …. وميزانية … وصال الموووتر 10 على 10 … ادووس به لين 200 وموول ماشي رقله ابد
.. ولكن مشكلة المحل هذا انه يضرب عليك ضربه …
يعني بايعني التواير بسعر غالي …. وشغلهم غالي …
غالي وايد والله …
بس ظبط الموتر عقب ما خسرت بيزاتي هع هع
…. نصيحتي لك اذا انته فالشارجه سير حط الميزانية عند عبدالرزاق … شغله زين ورخيص ..
اسم المحل ماله تقريبا ايفن )) اذا ماخاب ظني بس المشكله من كم سنة ماسرتله ….
كنت اسير له من ايام الاستيشن
وعن التواير … سير الشارجه يمكن اتحصلهن ارخص … وفيه بعض الاماكن يبيعون بسعر معقووول …
ولكن الشامي توايره غاليه … ونفس الشي محل اسمه المستقبل فدبي بعد غالي ..
ولكن يعطوونك ضمان مفتووح (( الشامي يعطي على الميشلان ضمان مفتووح )) او ضمان خمس سنوات …
وما اعتقد حد يخلي توايره خمس سنوات بالكثير سنتين او سنتين وشوي
ومحطات البترول اللي فدبي اغلى واغلى …
التاير فالسوق ب 650 يبيعونه لك ب 900 درهم حشى مايسوى علينا
والله يسهل اموورك ….
بس بصراحه كنت احب الفتك … ولكن والله من كثر ما صدّعلي راسي عفته عفته والله ….
ايام رقله وايام يقرقع وايام مادري شوو …
وين ايامك يا الاستيشن والله الاستيشن راازن لا رقله ولا تقرقيع
السلام عليكم ورحمة الله وبركاته
مشكورين على ردودكم الطيبة … السيارة عليها تواير بريجستون من الوكالة … والرنجات من الوكالة … فيعني الموتر مو مغير في أي شيء أبــــــــــــــــــــــــــــــــــــداً … نفس ما هو من الوكالة من سنة 2008
تسلم أخوي Sharjah 3000 على ردك الطيب … شكلي يمكن أغير التواير وأركب تواير مشلين لأني شفت الفرق عند ربيعي … فرق كبييييييييييييييييييييييييييييييييييييييير لا حشره ولا رقله وتحكمه سهل
وسألت الفليبني “لوريتو” اللي في التاير اكسبريس اللي في شيشة بترول الامارات – الخزامية وقال لي بأنه فرق كبير بين أداء الميشلين والبريجستون “مال الوكالة”بحيث إنه يصل مايقارب من 80% فرق في الأداء وإنه سعر التاير الواحد بيكون بحدود 950 أو 970 درهم .. وأنا أشهد بأنه موتر ربيعي يوم ركبته كان غييييييير عن اللي عندي مووووووووووووووول .. وتميت امبطل حلجي طول الفترة وربيعي يسوق موتره وأقول له بأنه هل الفتك مالك (2006) أهدئ من مالي (2008) لهذي الدرجة
فخلني أرتب ميزانتي على الله على نهاية الشهر أغير التواير وأفتك
وإذا حد منكم عنده حل ثاني …. فلا تبخلوووووووووون علينا
اخوي حتى لو اصليه موتري وكاله والرنقات اصليات موديل 2009 بعد فيه رقله وريال عنده 2008 ونفس الحاله
__________________
تأكد من نوعيه التواير + الرنقااات اهم شي الرنقاااات تكون اصليه