أكيد مافهمتو شي…بتقولون راعي الموضوع أشلق هههههه 
.. لا لكن بالحقيقه هاللي صاير هالأيام بالمواضيع… مع بعض الناس عشان ماتزعلون
ريال يبا يبيع لابتوب… يبدا مزاده بسعر والناس تفاوض بربع قيمة بداية المزاد….
أكيد في الحين ناس بتسوي سيرج عن مواضيعي وبتطلع تحركاتي في منتدى البيع والشراء.. الحمدالله الكمبيوتر لللي عرضته أنباع هههههه يعني الحمدلله ما أكتب هالموضوع عن قهر بموضوع الكمبيوتر اللي عرضته… الأمور مشت على طيب خاطر…
بس ما أنكر صارتلي بعض المواقف…. بس أوصفها بالطريفه…
بس أغلب القهر ياني يوم شفت مواضيع الشباب حليلهم…
أسمحولي يا أعضاء… بس الواحد ينقهر يوم يشوف ردود الناس… الريال يحط بدايه 5 آلاف والناس تبدا بألف…
أنا من رايي الشخصي فقط…
اللي ماعنده كاش لايدخل مواضيع ويحط آمال… عن تزعلون مانزل من قيمتكم… بس مثلا هالشهر اللمت شوي مايسمح فليش تضغط على عمرك وأتدش مواضيع اللمت مالها عالي!
أنتو بتقولون خله ترا يكاسر… ها مايكاسر ها يكسر الموضوع وصاحبه… بس بالعقل كمبيوتر يديد كلف راعيه فوق العشر… لو هو صدقوني باعه بألف… نفسي نفسي ماراح ترضى عليه… صدقوني بزيده… بس أنه ريال يحط بداية مزايده بسعر وأنته تبا بدايه بربع السعر!
لازم الصراحه نعزز ثقافة المكاسره بالأسعار! ههههههههه
ترا الأعتدال حلو… وأنا أنصح هالنوعيه من الناس مايحط ردود أحسن.. لانه مايحقق أهداف صاحب الموضوع ويأثر عليه وايد… و مشاركته لايحقق أي فايده…
أسمحولي بس باخذ من وقتكم.. المسأله يبالها أسلوب..
نفرض… قلنا نفرض ههه أنه الكمبيوتر صج مايسوى 5000… لو أنا شراي… بقول لصاحب الموضوع…. يالطيب أنا جاد للشراء مع مراعاة السعر… أرجو الإفاده عالخاص…
وطبعا يوم يرد علي راعي الموضوع بالخاص… من هالنقطه أبتدي مفاوضاتي بالمعقول… لكن أذا حاب أتزيد خلك علني مافي مشكله….
وأنصح أي شخص بيشتري غرض.. مثلا جهاز كمبيوتر..
أتصل أستعلامات.. أي محل كمبيوتر.. أتنشد عن رقم الموديل والسعر المعروض عندهم..و لو أتشيك أزيد من محل وتاخذ المتوسط أحسن…. وقارن وأبدي حساباتك… و حاسب مب أتسير قوقل أتطالعلي سعر كمبيوتر في ويب سايت بأمريكا وتاخذ هالسعر كنقطة بدايه لك… إذا كان الغرض متوفر بالدوله… فستفسر عن سعره هني… لكن أذا كان شي ماينباع هني بعدين عاد دور وأجتهد…
يعني مثلا ريال عارض مرسدس خليجي من قرقاش… لاتقوله في وكالة ميونخ حصلته بسعر أقل… لا تقارن أسعار هذا وذاك…
لاتقارن الشي الا بنفسه… لاتقول مثلا ليش لابتوب أبل مثلا أتبيعه غالي… أنا أمس شاري لابتوب أيسر أب 500 درهم! … أزين وبعدين؟ شياب هذا في ذاك…
ومثلا بالتلفزيونات… لاتقول ياريال تلفزيون ال42 انج اللي تبيعه غالي.. انا شفت ال 37 انج عارضينه بسعر وايد أقل؟!! ياسلاااام!!
ولي مش حاس بموضوعي أو بالكلام.. أشتري علبة كلينكس وجرب بيعه بهالمنتدى… بتشوف كثير من تصرفات اللي بتثير جنونك…
مابيحس الا اللي جرب…
الهدف من هالموضوع هو التوعيه لا أكثر ولا أقل مش غرضه الضرب بالسوط عالأعضاء…
لانه ماشاء الله كثير منكم فاهم وواعي وأسلوبه راقي بالتعامل…
بس شو رايكم بصورت اللابتوب 
وصل البلاد ول بعده تراني شراي ههههههه بداية المزاد ألف درهم مني للي بيحط الموضوع 
ههههههههه
يالله أتريا تفاعلكم وآراءكم… والسموحه
ماشالله عليك فنان
و صح كلامك يالغالي
و ربي يوفقك يالغلا