اخواني الاعزاء اطرح عليكم هذا السؤال لماذا الزوجه لاتحب العيش في بيت اهل الزوج هل تعتبر هذه عاده ولابد ان تنتهي هل هوا استغلال ام استقلال
والسؤال واضح وارجوا منكم التعليق بكل صراحه ومصداقية …..

تحياتي لكم ولكم كل التقدير والاحترام..

28 thoughts on “لماذا الزوجة لاتحب العيش في بيت أهل الزوج ؟”

  4. السلام عليكم ورحمة الله وبركاته

    اول شي حبيت اشكرك اخوي على موضوعك ها والسؤال الي فيه

    وعلى ما اظن اغلب الناس يفكرون بها السؤال وايد والاجابات تكون مختلفة من شخص لشخص

    انا عني عادي عندي لو عرست اسكن بيت اهل ريلي واتمنى هاالشي بعد وبعضكم بيظن اني اقول ها الشي الحين يمكن خلاف تتغير نظرتي وابغي اقول الي بيظن جذيه لا غلطان انا بتم على راي وان شاءالله ما بتغير

    انزين فيه حد بيقول كيف اصلا بتتحملين امه و خواته ومشاكلهم بقولهم دامني وافقت من البداية لازم اتحمل اي شي من اجل راحة ريلي اول شي وثاني شي علشان تكون حياتي الزوجية هادية ومستقرة وبعيده عن المشاكل

    امه بتم تغار منج وبتسوي مشاكل بينج وبينه وبتقول حرمتك تسوي جذيه وجذيه بقولهم ها الامر عادي اصلا لازم احط في بالي بانه زوجي هو ظنى هاي الحرمه وهيه امه ربته وتعبت عليه يعني لازم بتحس بها الشعور كون وحده يت وخذت عنها ولدها بس لازم اوضح للام بانه رغم انه تزوجني صح بس غلاها في قلبه بعده موجود ومستحيل غلا امه ومكانتها اتجاوزها واقولها الي ما فيه خير لاهله ما بيكون له خير في بنت الناس

    اول شي لازم على البنت الي بتقبل على الزواج ولو كانت بتسكن في بيت اهل ريلها تحط في بالها بعض الامور من وجهة نظري يمكن تكون صح او غلط

    اول شي هو انتي بتسكنيين في بيت يديد صح وناس بعدج ما تعرفينهم عدل ولا تعرفين أطباعهم بس حاولي تكسبينهم لانه لو كسبتيهم بتكسبين ريلج والريل يحب الحرمه الي تحترم وتقدر اهله

    اعتبري انج في بيتكم شو كنتي تسوينه هناك سويه هنيه لا تخلين فكرة انج بتكونيين غريبه وناس ما تعرفينهم في بالج

    امه اعتبريها شرات امج حبيها شرات حبج لامج ولا تنسين في الاول والاخير انها صح ام ريلج بس مكانتها مكانة الام ومكانها عالي

    خواته شرات خواتج لا تسوين بينج وبينهم فواصل وحساسيات

    لو غلطوا او قالوا شي لا تراددينهم حاولي قد ما تقدرين انج تتماسكين اعصابج وانج تكسبينهم تراهم يشعرون ولهم قلب ولازم بيحن قلبهم عليج يوم بيشوفون معاملتج لهم

    اي شي تشترينه لامج اشتريه لامج الثانية واي شي تاخذينه لاخواتج اخذيه لاخواته

    خذي ريلج وسير وياه وايلسوا ويا اهله شاركيهم في كل شي فرحهم حزنهم سوالفهم وظهراتهم

    حاولي تسالين اهل ريلج شو يحب ريلج شو اطباعه بيحسون وقتها انج صدق شاريه ولدهم وتبغين رضاهم

    يوم حد بيي بيت اهل ريلج قومي بالواجب وياهم كانهم ياين لج علشان الناس يقولون هاي نعمة الحرمه

    لا تخبرين امج او حد من اهلج لو صار شي بينج وبين اهل ريلج حتى لو شي مضايقنج من اهل ريلج حاولي تحلين الامر بدون علم ريلج بس يكون الحل بطريقة ذكية وتكون لصالحج مب ضدج

    لو الوحده منا حطت هاالاشياء في بالها صدقني بيكون عادي عندها تعيش وياهم ولا بتفكر تعيش برع

    صح تبغي تيلس في بيت بروحها وتسوي كل شي على كيفها وتاخذ حريتها اوكي عندج مسكنج الخاص غرفتج كانت او ملحقج خذي راحتج فيه قد ما تقدرين وما اظن حد من اهل ريلج بيي مكانج الخاص وبيغثج او بيمنعج من ها الشي

    والسموحة على التطويل

    اختك

    بنت الأمارات

    أعجبت بهذا الرد بصراحة

    مشكورة يا بنت الامارات على الرد الجميل

    واتمنى ان يفكروا البنات مثل تفكيرك

  5. طبعا السكن هو حقها الشرعي لكن اذا ظروف ريلها ماتسمح تصبر مع ريلها على الحلو و المر لين ما تتيسر امورهم
    وبعدين أنا أشوف السكن مع أهل ريلها أريح لها بوايد من انها تسكن في بيت بروحها بتتسلى ويا اهل ريلها وبتتقوى علاقتها وياهم وبتكبر في عين ريلها وأريح لها من كل النواحي يعني الطباخ والنظاف وهالسوالف بتحصل وقت تتعدل ومالها الا غرفتها اتربتها واذا بغت تظهر ويا ريلها في حد يشوف العيال ويهتم فيهم
    بس أهم شي انها ما تدخل في خصوصياتهم

Comments are closed.