[][] لمستخدمي نيسان باترول اليديد فقط [][]

اخوي او أختي ،، النيسان الجديد او القديم ،،، متفقين في شغلة وحدة واهي متعة القيادة .. انا جربت الجديد بس ماشريته للحين وما افكر اشتري الجديد لاني مقتنع بالفتك اللي عندي ومريحني وعاجبتني سواقته ،، الحلو في الجديد انهم رغم تبديل المكينة والجير والشكل الخارجي والداخلي بنسبة مية في المية ،، ما نسوا اهم شغلة في النيسان وهي خفة القيادة ..

يعني بغض النظر عن وزن السيارة الا إن النيسان هذا حافظ على الشغلة القديمة اللي كانت موجودة في الموديلات القديمة اللي بدأت من موديلات التسعينات وهي خفة دعسة البنزين والدريسكون (السكان) وصدقني من يسوق النيسان ويتستمع في سواقته وما يهتم للكلام والمظاهر راح يعشقه ومستحيل يطلع منه ويحول على موتر ثاني … وعالجووا فيه اهم عيب بالنسبة لي كانت صرفية البترول

الموديل الجديد تناكي البترول يقولون والذمه على الشركة انه ممكن يمشيك 900 كيلو بدون توقف ،، يعني افضل نظام اقتصادي للبترول في العالم وانا اعتبرها معجزة النيسان بصراحة هههههه

واحد عيوب النيسان القديمة كانت الكبينة الداخليه للسيارة خصوصا الكراسي الخلفية للركاب ،، كانت ضيقة ومافيها مكان تمد رجولك فيها ،، لكن الموديل الجديد عطوك مكان كبير ومرتاح ،، يعني بالعربي مد رجولك وخذ راحتك .. وطوروا مستوى الفخامة اللي كانت التويوتا دوم تقول انه عندها الفخامة في سيارتها ،، يعني كفاية يجيك موتر من الباب للباب والصدام والكراسي كله جلد وتيك مستوى فخامة يضاهي الرنج والبورش واللي حتى اللكزس ما سوت نفس الاشياء الموجودة في النيسان الجديد ..

موديل le اللي اهو vip هو أعلى فئة في النيسان الجديد قوة محرك تقريبا تعادل 400 حصان مع جير بنظام cvt واللي اهو ثووورة في عالم الفوريلات تسوق السيارة بدون ما تسمع تبديل الجير علشان تكون مرتاح ..

بخصوص الرموول والطرق الوعرة والشوراع المكسرة ،، حطوا لكل إطار في السيارة نظام هيدروليك خاص به يتحكم بنفسه ذاتيا ،، ويوزان عمره لتحقيق اقل نسبة رجة / رقلة في السيارة والمحافظة على راحة الركاب في السيارة بدون ما يحسون بأي تأثير للاهترازات المركبة ..

وبخصوص الدبل على قوة 400 حصان او 320 وعلى كلام الوكالة انه الدبل حاطينه كمالة عدد يعني ماراح تحتاج له لانه اساسا قوة الميكنه كافية انها تقوم بباقي المهمة ..

للعلم الباترول الجديد فيه مواصفات كثيرة وهذه اللي ذكرتها اهم شغلات لمستها فيه ..

وعلى العموم انت / انتي حرة لاختيار السيارة المناسبة لك .. بس كلمة بين السطور ،، ما يشتري النيسان اللي يعشقة وبس .. واذا شاريه بدون قناعة انه الموتر عاجبك اقولك من البداية لا تشتريه

باختصار النيسان يقول للناس ( اللي ما يعرف الصقر يشويه )

تحياتي لك .