خواتي واخواني حبيت أفتح موضوع للنقاش
بخصوص غلاء المهور
الله يرحم زمان أول كان المهر ما يتعدى الـ 20 ألف
وين صرنا و استوينا خلال 10 سنين
حشى
مهر فوق 300 ألف!!
ليش؟ شالسالفه؟ شو صار ف الدنيا؟
و لا أصابعج مب من طين؟ أوه صح يمكن الأصابع من ذهب؟
اطلبي و تدللي و آمريو آخر شي بتشردين المعرس
و تعالي بعدين قولي عانس!!!
فكروا خواتي بمنطقية
الحين بقولكم سالفة و انتوا احكموا
الحين المعرس مثلا ع سبيل المثال راتبه 25 ألف
و تفضلوا التكاليف اللي فوقه
100 ألف مهر
70 ألف قاعة العرس (هذا غير إن في ناس تسوي الملجه بقاعه بعد)
من 3000 لـ 10000 بطايق عرس (حسب اللي تطلبه العروس المصونة)
صبابات و ما صبابات و خدمات الضيافة من 5000 لـ 10000
ليتات العرس بالآلاف للبيتين
عزايم و ما عزايم قبل العرس و قبل الملجة عادي ع بعضها 8000 أو زود
لا و بعد ملزوووووم يسافر شهر العسل
وراه بيت
ورا بطايق العرس
وراه الفرقة و الدي جي
وراه تأثيث بيت
وراه وراه وراه
و كل هذا ليش؟؟؟؟؟؟
بس عساس المسكين قرر يكمل نص دينه؟
شو ذنبه ف هذا كله
و الريال مسكين راتبه يمكن بحدود الـ 25 ألف
و أحيانا يكون فستان العرس عليه جان مب الكوشه بعد عليه
أنا مب ضد العرايس
بالعكس هذا اليوم يومج و هذي الليلة ليلتج
افرحي
تدلعي
اصرفي
بس مب تستوين شيطانة
هيه نعم.. مب تبذرين
الله سبحانه و تعالى يقول “إن المبذرين كانوا اخوان الشياطين”
يعني ع الأقل لو ما بتاخذينها من منظور ديني
خذيها من منظور إنساني
هي نعم إنساني.. بتقولين ليش أنا بذبح ريلي يعني؟؟
بقولج نعم تذبحينه
الريال له سنين يكد و يتعب ف دوامه
و أيام دوامه منها الحلوة و المرة و تحمل الصعاب و المشقات
بس عسب يوفر لقمة العيش له و لزوجة المستقبل و يتنعم ع بساط الحب في بيت الزوجية
((طبعا هالبيت انسيه لو كلفتي ريلج فوق طاقته))
يمع بيزاته و ولفها يوم ورا يوم
شهر ورا شهر
بالسنييييييييييين بالسنيــــــن
و يوم وفر مبلغ ممكن يبدا فيه حياة زوجية
و تقدم لج و خطبج و ملجتوا و دفع لج المهر
تعرفين انتي شو سويتي ف بيزاته؟؟؟
فصلتي فستان عند المصممة فلانه بحدود 30 ألف
((ملاحظة: ترى ليلة وحددة و رديه حقها بعدين))
و رحتي محل كوش و طلبتي كوشه فوق الـ 40 الف
و هو استفاد 39 ألف من بيزاتج
و 500 اشترا بها الورود
و 500 وزعها عالهنود
و بيزاتج انتي ف جيبه
عفوا.. سوري قصدي بيزات ريلج و تعبه و شقاه
ف جيبه عسب يشتري له بورش و بي ام
و آخر شي ريلج عنده هوندا!!
لو مب مقتنعات ف رمستي شوفن
بتلاقون عشرات البنات اللي انخدعن بخصوص الكوش و عقن بعشرات الآلاف من مهورهن
و آخر شي خرطي و حتى الورد ما كمل 100 درهم
لا و الله عيل شو تبينا نسوي هذي ليلة العمر و لازم نسوي هاه كله
بقولج عادي اصرفي و سوي
لكن حكمي عقلج
فستان .. ليلة وحدة .. مرة وحدة .. كم ساعه = 40 ألف
لو عقلج راضي بهالشي
ترى الله ما يرضى
و الله حرام هاللي تسوونه بنات
بتقولون لي هذي أسعار الفساتين
أنا بقولج شو فيها لو طلبتي مساعده بتصميم الفساتين
و دورتي لج ع خياط شاطر هندي يخيط لج الفستان بحدود المعقول
=
بعدين ليش حب المظاهر يا بنات
ليش التوزيعات بالآلاف و عشرات الآلاف
يعني شو بيصير لو كانت توزيعات بسيطه فيها حلاوة و ما تكلف الحبة أكثر عن 3 دراهم
لازم يعني التوزيعه ب 20 و 30 و 50
و ع فكرة كفاية استغلال الجنسيات الثانية لنا
هم فاهمين إنهم كل ما قالوا سعر غالي
المواطنة بتطيييييح ع طول و بتستانس ع السعر اللي بتدفعه وآخر شي و الله ما يسوى
تعطيه بعشرات الآلاف نوط ينطح نوط
آخر شي يحط لها ورد بحدود 200 درهم و اقل بعد
و يسوي لها شغل غير عن اللي طلبته
نرجع لسالفتنا … اسمحوا لي وايد منفعله
الريال ع شو بيكد و لا ع شو ؟
انا عاشرت عرس 2 من اخواني
بصراحة صج هم .. خاصة للي دخلهم محدود
و اصلا حتى لو ريلج ملياردير
ترى فكري حتى الملياردير تعب و شقى لين كون هالثروة
و انتي بكل بساطه تعقينها
خفضوا مهوركم يا بنات
وصلوا لأهلكم هالرسالة الله يخليكم
قولوا لأبائكم لا يبالغون ف المهور
و الله إنكم ما تعرفون إن هذا حال الشباب
و الله ربع اخواني يقولون
الشباب اللي مفكرة ياخذ هنديه
و اللي مفكرة بـ 500 درهم يتزوج اندونيسية اييبها البلاد
و اللي مسافر تايلاند يتزوج و بيرد
و اللي بياخذ فلبينه ..
ليييييش؟
طبعا من القهر بتقولون لأنهن رخيصات
هيه نعم رخيصات بالسعر و المهر .. لكن غاليات القناعه
ما عندهم شي اسمه حب الذات
ليش الشباب يدورون برا و بنت البلاد يالسه
انتوا بذمتكم خبروني في كل فريج كم عانس يالسه بين طوف البيت؟
صدقوني بنات ترى هذا تفكير الشباب
كل حد يقول
ليش أدفع دم قلبي ع مواطنه بتخسرني حلي و حلالي … الخ الخ الخ
جيه تفكيرهم والله مع إن مب الكل نفس الشي
بس هالتفكير هو اللي صار سايد بين الشباب
الريال الحين ما يعرف يتزوج و لا ياخذ له سيارة
و بعد اخويي بعد ما عرس
ايي يتشكى يقول انا دفعت و دفعت ابا وحدة تكون لي بيت و أهل و مريحتني من كل النواحي
آخر شي بصل ما تعرف تقص
و أكلي كله من المطاعم
يعني اتقوا الله يا خواتي اللي ما بترضن بأقل من 100 ألف
تــــــــــــــابع
أدري الحياة غالية و الـ 100 ألف الحينه ما تسوي شي
بس ما في شي في الدنيا ما يصير
كل شي يصير بالعقل والتدبير..
مب لازم 20 قطعه مخاوير. ع الأقل جمن وحدة و بعد العرس ترى كملي الشررا
مب لازم 66 نعال.. خذي واحد ابيض واحد اسود واحد بني واحد وردي واحد ملون و عن خاطرج خذي احمر بعد .. شو تبين اكثر عن جيه
مب لازم 84 عطر .. خذي 10 عطور بس و دهن عود و مخلطات و خلاص
مب لازم 20 طقم ذهب.. خذي طقم خفيف طقم ثقيل طقم للاستخدام اليومي و كم خاتم خفيف و ثقيل و نوعي بين الأبيض و الأصفر
ترى كل هالسوالف بتاخذينها بعدين سواء من راتبج او راتب ريلج
و بعرض لكم مواقف تكنسلت بسبب غلاء المهور
واحد كان يحب وحدة و كانت حبه الأول و الأخير
و كان متفق وياها تراعيه بالمهر لأن ع قد حاله مسكين
و لما خطبها قالت المهر مب انا احدده ابويي و هذي ما فيها شي
بس ابوها طلب 150 ألف
و هو مب قادر ع هالتكلفة
و رمسها و هي تكبرت عليه و قالت له ما اروم اناقش ابويه بهالسالفه
لو تحبني صج بتدفع
و المسكين دبر و دبر و دفع لها المهر
بعدها اتصلت له تقول له فستان العرس عليك
قال لها يا فلانه انا سويت المستنحيل عسب اييب لج بيزات المهر
و هي ما راعته ف هالشي
و قامت كل يوم تتصل تقول ابا و ابا و ابا و ابا و ابا بيت بروحي و ابا و ابا الخ الخ
و إذا رفض لها طلب تخبر ابوها
وين سار الحب؟
تحول لكراهية لأنها ما وقفت وي الريال بموقف يحتاج وقفتها
سبحان الله حبت البيزات أكثر عن الريال اللي كانت تحبه وتتمنى تاخذه
و طلقها .. بس مب بإرادته سوا فيها حركات لين هي طلبت الطلاق
عسب يردون له كل بيزااااااااته
و فعلا ردوها و بعدها طلقها
و للحين متعقد و يقول يبا ياخذ وحدة من تايلاند ما بتكلفه أكثر عن 500 درهم
و تكون مسلمة و مربية أجيال تربي عيالها ع الاسلام و عاداتنا و تقاليدنا
موقف ثاني و ادري بكم بتضربوني وايد طولت أدري
و همسة أخيرة .. ترى الريال اللي بتاخذينه بيكون أهلج و ناسج و حبيبج
باجر بتقولين له أبا كذا و كذا بيقولج ما عندي.. لأن خسر حله و حلاله ع العرس
أو لأنه ماخذ سلفية و الراتب ما يكفي و قاعد يسدد الأقساط..
آخر كلامي يا بنات
تذكير بقول الرسول صلى الله عليه و سلم
((أقلهن مهورا أكثرهن بركة))
و شوي شوي علي لاتهجمون علي
فكروا في رمستي لأن كلها صح و عين العقل
أتمنى أشوف تفاعلكم و ردودكم بخصوص هالموضوع
و اللي ترد تكتب قبل لو هي
((مـــــع))
أو
((ضـــد))
يعني لو موافقه ع كلامي أو مب موافقه عليه و بعدين تبدي رايها
و حياكم الله خواتي واخواني
و الله يطرح البركة ف حياتنا إن شالله
((لا إله إلا أنت سبحانك.. إني كنت من الظالمين))
صح لسانج اختي
انا عندي خالي عندة 3 بنات زاهبات للعرس
بس للاسف عنده طلبات اكثر عن اللي يطلبونها الاهل العاديين للاسف
نبغي ذهب ونبغي عرس ونبغي خيام و ……..و…….و,,,,,,,,,,و,,,,,,,,,,,,
يعني لو انا فكرت اتزوج الثانية من عندة
لازم اعمل حسابي على الاقل بنص مليون
لا والبنات طايحات في جبدة ( عانسات )
و الريال مسكين راتبه يمكن بحدود الـ 25 ألف
ما بالكم باللي راتبه 8آلاف او اقل
يا يسرق
يا يتسلف من البنك و يحط ديون عليه
او تطيح عليه بيزات من السماء
الله يوفق الجميع ويهديهم
كلام طيب و سرد طيب في جميع المراحل للعرس..
واناا اوافقج في كل شي ولازم الموضوع ينكتب في الجرايد حتى يتسنى للجميع معرفة كل شي بخصوص هااي المشكلة اللي حاصله..
جزاج الله خير و كثر الله من امثاالج..
ما شاء عليج
ربي يحفظج ويعزك
اول مرة اقرا كلام بها الرقي
ابشرك
الحمد الله اليوم كلمت احمد بن شبيب الظاهري بخصوص صندوق الزواج
وان يتم استقطاع مبلغ (لم يحدد بعد) من رواتب الموظفين من ابناء الدولة لصالح صندوق الزواج
وبعد كلمته بخصوص الغلاء وانه من اسبابه بعد الاعلام
تدرون ليش؟؟
لانه اغلب المسلسلات الخليجية والعربية تعرض الزواج بصورة البذخ الزائد حتى استقر هالشيء في نفوس الكثير من الناس وهذا له مشاكله بدون شك و قدمتله اقتراح بخصوص العنوسة لكن ما بخبركم بخليه سر ,,,,,,,,,,
بعدين بتعرفون ان شاء الله
الله يبارك فيج ان شاء الله ويجعله في ميزان حسناتج
وان شاء الله الموضوع بيفيد ناس وايدين
والسموحه