لسلام عليكم ورحمة الله و بركاته..
حبيت انزل موضوع يقهرني كل ما ادخل المنتدى ..
دايماً اشوف ردود تقهر و مالها داعي و إللي خلاني افكر انزل هالموضوع هو ان البعض من اصدقائي يرفضون يعرضون أي سلعة للبيع في المنتدى بسبة الردود إللي مالها داعي من بعض الأعضاء الله يهديهم
مثلاً واحد عارض سيارته للبيع بالسعر الفلاني .. يدخل واحد يكتب أنا عندي شرات هالسيارة بسعر أرخص و يحط رقم تلفونه !!
و البعض يكتبون ان المعرض الفلاني يبيع نفس السيارة بسعر أرخص !!!
و البعض يبببببببببببخس بالسعر و هو أصلاً ما يرغب بشراء السيارة مجرد انه صدف دخوله للموضوع و لااااااااااازم يحط رد !!
و غيره و غيره من الردود إللي صدق مالها أي داعي غير انها تحبط من معنويات البايع بعطيكم بعض الامثله من ردورد الاعضاء الله يهديهم

أسف اخويه سعرك مولع –

لا لقطه ولا شي-

روح روح انت أصلاً ماتعرف كيف ترد ع الناس –
-عيبك كيفك ماعيبك أسطفل

-اخوي نفس المواصفات ربيعي ماخذنها من امريكا على ؟؟؟؟؟؟ درهم-

-ليش السياره غاليه العضو؟؟؟؟ يبيعها باقل من هذا السعر وهذا الرابط؟؟؟؟-
الجاد بالشراء و عنده شي يبى يقوله أو يبى يساوم بالسعر يقدر يتفاوض بالخاص

و في قانون عجبني قريته في منتدى و اتمنى لو انه يتطبق اهني

لا يحق لأي عضو أن يكتب رداً أو موضوعاً يخبر فيه الأعضاء عن الأماكن التي يحصل فيها البائع على بضاعته منه أو أماكن بديلة لبضائعه بسعر أرخص حتى لو كان ذلك بحجة إفادة الأعضاءولا يحق لأي عضو ان يبخس ببضاعة أي بائع حتى لو كان جاداً بالشراء، وارسال سعره على الخاص و من حق البائع الرفض أو القبول

وكذلك لا يحق للاعضاء الاستهزاء ببضاعه العضو الاخر واحترام الاعضاء والتزام بأداب الحديث

عفوا يا اخواني الاعزاء ترا العنوان الي قراءه يعتقد انه يعم الجميع بس لا في اعضاء تحطه على الجرح يطيب والمعذره وبدون زعل من جميع الاعضاء

.

9 thoughts on “ليش يا اعضاء منتدى الامارات”

  1. كلامك أخوي في محله…. الله يهدينا وايا بعض الأعضاء اللي بصراحة تقول جنهم يهال

    وأنا أول من ترك العرض في هالمنتدى الرائع… والسبب الردود المحبطة واللي مالها داعي أصلا… ويكفي حديث الرسول صلى الله عليه وسلم حين قال: (من كان يؤمن بالله واليوم الآخر فليقل خيراً أو ليصمت)،

    لذا نطلب من الإدارة والمشرفين انه يكون لهم موقف ايجابي مع هؤلاء الأعضاء، لأن هذا الشيء محرم أصلا، ما يجوز التبخيس بأي شكل من الأشكال بحلال أخوك المسلم

    والله المستعان

    وكلمة حق تقال في بعض الأعضاء ( ردودهم اذا نحطت على الجرح يبرى )

  2. الله يهديهم صراحه

    بعضهم لا بيشتري ولا بيبيع بس يحب يخرب

    والله شاهد شي سياير دوم تنعرض بالمنتدى وشي بعض الشباب من هالنوعيه بس يبا يخرب

    وعن نفسي اشتري الموتر وماعليه من حد لاني اعرف السوق ولاسعار والحمدلله استفيد بعد من بيعها ,, لكن غيري من يشوف هالردود وتكسير المياديف يضربه شك ومايشتري.

    انا عندي فكرة بسيطة عسب نفتك من هالردود

    انه يوم حد بيحط اعلان للبيع الموضوع تلقائيا ينغلق
    عسب لاحد يدخل عرض ويتفلسف,, ويكون فالاعلان الرقم موجود للتواصل واللي جاد يتصل بالريال او يتواصل وياه عالخاص ,, شو رايكم؟؟

  3. انا بعد لاحظت هالشي بس ما ادري شو السبب بالظبط. هل هو حسد وحقد او حساسية وعداوة بين الطرفين وكل واحد يحاول يخرب عالثاني…

    الله يهديهم بس والارزاق بيد الله سبحانه وتعالى..

    مشكور الغالي والله يهدي الجميع ان شاءالله

  4. كفيت وفيت يا اخوي علي999 كلامك صحيح 100% وانا عن نفسي ما سرت افكر اعرض بسبب هذا الموضوع تعرض سيارتك بكل احترام وتسمع كلام ما يرضيك اتمنى من الاداره تتخذ اجراء ضد اي شخص يحاول يخرب على عضو ثاني واحنه معاك

Comments are closed.