في يوم الجمعة الماضي و كالعادة رحت للحلاق و كان جدامي شخص من الجنسية الباكستانية بعد ما خلص عطا صاحب الحلاق خمس دراهم و توكل . استغربت!!! وبادرت أخونا راجو الحلاق بالسؤال:
ليش هذا يدفع خمسة مع انه الحلاقة بعشر؟؟
قال هذا نفر مسكين.
فسألته أنا شو عيل؟؟
قال أنت في مواطن واجد فلوس معاش سبعين فالمية زيادة .
قلت له زين ليش إنت يسوي زيادة فلوس مال حلاقة ؟؟؟ إنت ما في يصرف بترول ولا ديزل ؟
قال بابا .. بترول ما في مشكل سبعين فالمية سوي مشكل
قلت له بصوت عالي : ليييييييش ؟؟
قال : بابا … الحين دولار في نازل يعني ريال مال إمارات في ينزل صح قلت : صح
قال : شوف إذا ريال ينزل … كل شي يروح فوق .. مشان نفرات تجار يشتري أغراض غالي و الحين ريال تعبان
قلت له : بعد ما فهمت ؟
قال : هذا مشكل مال إنت .. كل نفرات يقول غالي بس ما في قول ليش غالي .. إذا أنا في يشتغل نجار و يشتري خشب بلايوود 25 ربيه ( درهم ) و بعدين درهم ينزل مع أبو مال هو دولار …. على طول أنا في سوي زيادة خمسة ربيه .. مشان سكر خسارة مال أنا ..و مشان يجي فايدة طبعا أنا شرات الأسد قلت له ايواااااه الحين فهمت قال: الحمد لله
قلت له: راجو من وين إنت في تعليم هذا ؟
قال :كل نفرات صديق يسوي كلام هذا شكل بعدين….. سكت مرة وحدة و أنا أقول في خاطري شوف هالحلاق يعرف كل ها !! عيل المتعلمين شو يعرفون ؟؟
فالباجر اتصلت بصديق باكستاني عنده دكتوراه … يعني دكتور وقلت له أريد أشوفك , فقال لي : ليش شو تبغي ؟
قلت له في عندي شي محيرني .
قال شو هالشي ؟
قلت شي يخص الاقتصاد و التجارة .
قال مو مشكلة اليوم بالليل الساعة 8 بنلتقي في مطعم ……….
و أنا أتريا هذا اللقاء بفارغ الصبر و اعد الساعة ورا الساعة … المهم يات الساعة ثمان و التقينا فبادرني بالسؤال :
شو أخبار الجامعة
قلت له الحمد لله كل شي زين …
بدينا في الكلام طريت له سالفتي ويا راجو الحلاق …
فابتسم وقال بسيطة تبغي تعرف كيف راجو يعرف اثر نزول الدولار و ارتباطه بالأسعار و الدرهم.
قلت : أكيد
قال : هم عدة أسباب أولها إن التعليم في دول آسيا يعتمد على الأمور العملية أكثر من النظرية وأنا ( الدكتور ) اطلعت على مناهج التدريس عندكم و تبين لي أن اغلبها حشو و الطامة الكبرى أن اغلبها غير مرتبط بالبيئة الاماراتبة و خاصة في الاقتصاد و إدارة الأعمال الطالب ما يتعلم عن الاقتصاد الإماراتي ما يكفيه و ينصب جل التركيز على اقتصاديات الدول المتقدمة و هذا زين ولكن السؤال هو أين سأستخدم مهارتي في الاقتصاد بالتأكيد فالإمارات .
السبب الثاني يدور حول الإعلام المقروء ( الجرايد و المجلات ) للأسف ورغم إنكم دولة اقتصادية من الدرجة الأولى إلا أن الأخبار الاقتصادية لديكم لا يعدو كونها إعلان عن صفقة أو عن مشروع يديد مع قليل من المقالات البسيطة .. إذا بغيت تعرف الفرق طالع الملحق الاقتصادي ل ……… ( جريدة عربية ) و ……….. جريدة محلية ( انجليزية ) طبعا اليوم و قبل لا اكتب اللي صار طالعت مثل ما قال لي …. صراحة اللي قاعدين يكتبونه في ملاحقهم الاقتصادية غير و لي عندنا غير رغم إننا في نفس الدولة.
السبب الثالث : إن الثقافة الاقتصادية غير مؤصل لديها في فكر الشارع الإماراتي و لكن أبشرك بأنه في مبادرات غير طبيعية في سبيل زرع هذه الثقافة قلت له كيف فرد : انه مؤسسات دعم مشاريع الشباب و على راسها مؤسسة محمد بن راشد لدعم مشاريع الشباب غير ها و المؤتمرات الاقتصادية و التخصصات الجامعية و المشاريع العملاقة و نشوء جيل كامل على التضخم العالمي و مشاريع البنى التحتية و …. و ….. و عدد لي مالا يقل عن عشر أشياء .
انتهى لقانا و شرب دكتورنا الشاي السليماني ماله و توكل على الله , هني أقول نحن متى راح يكون عندنا توجه أقوى من الموجود نحو التعليم العملي ولا النظري رغم إن مبادرة الشيخ محمد بن زايد في معاهد التكنولوجيا التطبيقية و اللي مركزه على الجانب العملي التقني و خصوصا انه لي تجربة معاهم , و غير ها إلى متى راح يظل الإعلام المقروء عبارة عن إعلانات و صفقات و أخبار مغبره , أما فيما يخص السبب الثالث فنحن جميعا كاماراتين لا زم نشتغل على تعميق المعرفة الثقافية خصوصا ان اسم دولتنا صار علامة اقتصادية في المنطقة .
بقلم عبدالله العطر من اتحاد المدونين ..
انا عن نفسي مقردن الحلاق من خمس سنوات احلق عنده .. فنااان بس مشكلته اصلع .. في الفتره الأخيره علمته يرمس عن الأسهم
كل شي و لا حلاق الجمبري .. مصادره موثوقه .. ما أدري أي شخصيه كبيره من المسؤولين يحلق عنده
حلوه هذي عشانك .. و فرق بين درهمين و 25 درهم ..
بس أبى أعرف ليش المواطن يدفع أكثر عندما يذهب للحلاق. و هل اللائحه التي وضعت في محلات الحلاقه للمواطن و العربي فقط أم للكل بما فيها الجاليه الهنديه و الباكستانيه
الصراحه، أنا استغربت من شيء رأيته في الخارج .. الباكستانيين في بريطانيا يذهبون الى الحلاق و يدفعون قرابة ال 35 درهم لحلق لحيتهم؟! و في الامارات تجد الواحد منهم على باب الله و اذا تغدى وجبه وحده في اليوم يعني هذا الشخص مقتدر ..
ما الذي يدفعهم لدفع مبلغ 35 درهم لحلق اللحية (مع انك تستطيع حلقها بنفسك) في بريطانيا و لا يدفعون قيمة سندويتش في الامارات!
هل نحن مخدوعون!؟
تدري اخوي .. من فتره ربيعي كان داخل محل .. البياع هندي .. ساله ربيعي بكم هالشيء؟
رد عليه الهندي .. عشانك انته ارباب انا يعطي 25 درهم .. طبعا الهندي ما يعرف ربيعي واول مره يشوفه .. ماادري ليش يقوله عشانك …
المهم التفت ربيعي عداله وشاف هندي زبون .. في يده نفس اللي بيد ربيعي
ساله البياع بكم فرد عليه بدرهمين .. طبعا رد عليه بلغته … وربيعي فهم
موضوعك حلو اخوي يوسف … اول شي التثقيف .. للاسف ما عندنا وعي اقتصادي .. ماعندنا ثقافه اقتصاديه .. وتعال شوف بالمدارس شو يدرسونا ..
ثاني شي الاستغلال اللي نتعرض له فقط عشان السبعين بالميه مع ان في ناس ما جاتهم هالسبعين بالميه
نقل موفق اخوي يوسف
كلام الدكتور لللأسف صحيح وخاصة بالنسبه للإعلام .. تقدر تقارن بين اي مجله اقتصاديه او ملحق اقتصادي عربيه بأي جريدة او ملحق او مجلة اقتصادية اجبنيه وبتكتشف الفرق بكل سهوله .. المطبوعات الأجنبيه الاقتصاديه تعتمد على دراسات ومقارنات وتحليلات وتوقعات مستقبلية وليش ما علمنا بهالطريقة ولكيف بنتفداى هالخطأ في المستقبل .. اما المطبوعات العربيه (ماعدا القليل جدا) فكل اللي تقراه فيها هو ما حصل وعرض للمشاكل بشكل سطحي للأسف
تسلم اخوي يوسف على النقل والله يعطيك العافيه