السلام عليكم ورحمة الله وبركاته

البونص ..

قرار يديد ينظم مع لستة القرارات في النظام اليديد لدوائر حكومة دبي للموارد البشرية ..

والبونص يعتمد على التقييم السنوي للموظفين .. وتم تطبيقه على اساس تقييم سنة 2007

5% = امتياز > تمنح لموظف يحقق أكثر مما تتطلب منه الوظيفة بشكل جذري وملموس جداً
15% = جيد جداً > تمنح لموظف يحقق أكثر مما تتطلب منه الوظيفة
40% = جيد > تمنح لموظف يحقق ما هو مطلوب منه فقط
15% = مقبول > تمنح لموظف يحقق ما دون المطلوب منه
5% = ضعيف > تمنح لموظف بالكاد يحقق شيئاً

والكل يعرف السلبيات اللي طلعت على قانون التقييم .. وأنا ما بتكلم عن سلبياتها .. لأن تكلمنا بما فيها الكفاية ..

موضوعي بعد ما قدمت الاستقالة تقريبا صارلي الحين 3 أسابيع على الاستقالة ..

يالله يا عشق القصيد روحي خلصي الاجراءات ..

اتصلو علي علشان اروح آخذ الشيك .. ومن حقي أعرف الشيك شو يتضمن ..

فالشخص المسؤول ما قصر وشرح لي ..

جان اقوله في شي ناقص .. “البونص” وينه؟

قالي .. عشق القصيد انتي قدمتي الاستقالة شهر 5 .. واللي يقدم الاستقالة من بعد تاريخ 2/7 هو اللي يستحق البونص !!!

قلت له بس هذا يخص 2007 ونحن الحين 2008

قال أدري بس شو اسوي المجلس التنفيذي

قلت له البونص المفروض ينزل نهاية شهر 5 بس الدايرة تأخرت ونزلت مع رواتب شهر 6

قالي أدري وانتي يحق لج تاخذين البونص بس شو أسوي الأمر ياي من المجلس التنفيذي ..

قلت له لو اتييب ياهل وتخبره بهالكلام بيستغرب .. شي ما يدش العقل ..

ليش يا ناس هالظلم ..

انظلمنا في التسكين ..

وانظلمنا في التقييم ..

وانظلمنا في الخصصة ..

والحين الدور على البونص !!

وشو بعد البونص ؟؟

قولولي هل لي حق ولا أنا غلطانه ..

والله أنا ما أفكر في المبلغ .. أنا بس أفكر في القرارات اللي تظلع وتظلمنا ..

12 thoughts on “لين متى القرارات بتظلمنا > البونص”

  1. نبض حر .. الله يوفق الجميع إن شاء الله

    كلمة غصه شويه يا طلطميس على اللي قاعد يصير .. جنه العين صابت الامارات .. “الله يرحمك يا زايد” ..

    بو محمد اللي تكلم من الاشخاص المظلومين .. ويزاه الله خير لأنه تكلم نيابة عن كل اخوانه وخواته وتجرأ وقال الحق .. والحمد لله ربي عوضه خير بوظيفه أفضل عن قبل ..

    شكرا طلطميس لردك ..

    الله المستعان ..

  2. لاحول ولاقوة الا بالله

    عيل انا شو اقول

    وفرت للدولة اكثر من مليار درهم

    رتبت امور الادارة اللي كنت فيها ترتيب ولله الحمد تمام

    ساهمت في الخصخصة وكان لي دور فعال فيها وتقليص العمالة والاعتماد على الشركات

    كنت مدير ادارة تضم اكثرمن 9 الاف موظفق

    وبوم استوى التسكين نزلوني من وظيفتي ومن درجتي من مدير ادارة الى رئيس قسم

    كل اللي سويته لا حمدا ولا شكورا بس انا فخور اني سيةت هذا لوجه الله ثم لبلدي

    الحمدالله استقلت وحصلت وظيفة على الاقل في بيئة احسن

    وان شالله اتوفق فيها

    والسموحة

  3. مســـاج الله بالخيــر أختــي ..
    فعلآ من خلال أسلوبج و طريقة كلامج مبينه الغصه اللي فيج ,
    و قبل شهر تكلم شخص ” بو محمد ” بالبث المباشر , اذاعة نور دبي مع الاخ ثاني بالرقاد عن التقييم في الدواير الحكومية , والبونص والحالة النفسية للموظفين بعد ظهور نتايج التقييم , و تفضيل فلان على فلان و علانه على علتانه . و تفاعل كل الناس معاه .
    كان عندي صديق موضوعه مشابه لموضوعج , و قالوا له أكتب تظلم , و تأخروا عليه بالرد , بحجة إن لجنة التظلمات بعدها ما إجتمعت , فإشتكى للمجلس التنفيذي , قالوا له راجع دائرتك

    عزت عليه نفسه و طنش الموضوع فقير ,, رغم إنه موب محتاج والحمدلله للمبلغ , بس يقول حس إنه ما يستاهل اللي حصل له و إنظلم وايد .
    الله يعينج و يكتب لج اللي فيه الخير و الصلاح شاء الله ..

  5. علياء القمر بالفعل لا حول و لا قوة إلا بالله

    eLeGaNZa .. وفي حد ما قدم استقالته ..

    الدرمكي 77 .. يسعدني تواجدك في موضوعي ..

    بس أخوي مثل ما قلت لك ما يهمني المبلغ كرهت كل شي في هالمكان حتى في آخر الاجراءات كرهوني في المكان أكثر ..

    وغير هذا هذه حقوقنا ليش نشحت .. إذا سكتنا على كل قرار مش في صالحنا بنزيد من هالقرارات وهم ما بيهمهم شي لأن نحن ساكتين ..

    الحمد لله على النعمة اللي عندي ومب محتاجه لمبالغهم بس في ناس ظروفهم صعبه يفرحون بالمبالغ البسيطة وخاصة بعد الزيادات اللي ما أعرف وين بتوصل في الأسعار ..

Comments are closed.