السلام عليكم ورحمه الله
اخواتي اخواني شحالكم ان شالله طيبين
بالبدايه اتمنى قراءة الموضوع للنهايه بتركيز وتدقيق لانه مهم جدا للجميع
الله يسلمكم صار موضوع انا تكلمت عنه سابقا في موضوع (( اذا كنت تبي مساهمين لمشروعك ))
وكان في الفقره رقم 13 والفقره كانت تتكلم عن المشككين ..
اللي يدورون عليك الزله والخطا عشان ان هم يثبتون انك على خطا ويغضون النظر عن كل نجاحتك او عن كل شي سويته ويتمون ماسكين شي واحد عشان يثبتون انك على خطا ويحبون ان يشككونك في نفسك ويشككون اللي حواليك
13- في ناس بيكلمونك وبيكونون مشككين لاقصى درجه وبيكونون ينطرون عليك الخطا والزله عشان يبنون لك انك مش فاهم او ماتعرف شيصير او انك تكذب عليهم في هالحاله خله يتكلم وحاول ان تطول مناقشتك معاه وخله يصيد غلطاتك وحتى لوكان واضح لك انه مابيساهم
السبب: انت بتستفيد وبتعرف انت وين غلطت لان الانسان مايصير ان يكون فاهم كل شي والشخص المشكك غالب الظن مابيكون مساهم لكن بتستفيد منه وايد ان بتصحح اخطائك فانا شخصيا احب اتكلم مع المشككين حتى لو ماكان في موضوع اكتتاب او تغطيه راس مال لان دوم بيحاولون يدورون الاخطاء وكل مايكشفون خطا فيني يمكن انا مادري عنه فبهالحاله بنتبه له وبحاول اصححه مباشره ((فلازم ترحب بالمشككين والمكذبين لان ترى فايدتهم كبيره جدا ))
المهم اخواني هذه هي النقطه وللعلم هؤلاء النوع من الناس ماراح يسكتون الا اذا حسوا ان هم وقفوا مسيرة نجاحك ولو تشوفون اني قلت في الموضوع الي صار فيه الاشكال اني بوقف طلبات ومابدخل المنتدى فبسحان الله مره وحده سكتوا !!
لان استانسوا ان وقفوا نجاح شخص ما واستانسوا اكثر لما شافوا ان لقوا رد واهتمام وعلى بالهم ان وجهة نظرهم هي الغالبه واني احاول ابرر لهم
ولو تشوفون لما قررت اييب لهم الموضوع لعندهم واعرضه عليهم يتمون يتكلمون بطريقه التعليق ولما خليتهم في الامر الواقع وشرحت كل النواحي وعرضت عليهم بعد سكتوا !!!
وماراح يشترون اصلا وانا ادري ان هم ماراحوا يشترون بس حبيت اواصل معاهم واييب كل شي لعندهم عشان اثبت للجميع عن رؤيتهم المعتمه للامور وبيحز بخاطرهم نجاح اي شخص حولهم وانا ادري ان هم بيتمون يحاولون سواء بمواضيع منفصله او جديده بس ارجع واقول لهم
تراني اخر شخص في الدنيا تقدرون ان توقفون مسيرة نجاحه
واخر شخص في الدنيا تقدرون ان توقفون مسيره مساعدته للناس
وبتم نشاطاتي ومشاركاتي ومشاريعي قائمه للكل سواء اي احد يبي يشارك او يبي استشاره مثل ماتعودتوا مني
ولايي في بالكم اخواني اني عصبت او استلسمت كل اللي حصل اني قلت بواصل معاهم عشان اراويكم المثال الحي ..
تعليق خاص عشان يكون في فرق بين المشاركين واللي يسالون كثير ويحبون ان يفيدون ويستفيدون:
الاخ Secure عضو ماشالله عليه من النوع اللي يحب يسال عشان يفيد ويستفيد ومناقشاته باسلوب راقي فاحيي فيك هالتوجه اخي الكريم
الاخ anas بعد عضو ماشالله عليه ومن النوع اللي يحب يسال ويتكلم ونظريته الراي والراي الاخر وانا احترم هالنظريات وهالتوجهات واسلوبه في الطرح كان مفيد جدا للجميع واحيي فيك هالتوجه اخي الكريم
الاخ ALAIN1001 طبعا شهادتي فيه مجروحه ماشالله على نقاشاته الهادفه دايما وبكل النظريات واسئلته الكثيره اللي تخلي الواحد يحب ان يناقش اكثر واحيي فيه نظرياته وتوجه للنقاش التجاري المفيد
الاخ alprofessor اخوي الكريم انا يعجبني النوع من النقاش مثل اللي صار معاك انه فيه شد وكلام والكل يبي يثبت وجهة نظره وفي النهايه الاختلاف في الراي لايفسد للود قضيه
لكن لي عتب عليك لما انحرف مسار حديثك في النهايه وكان بتعليقك لما عرضت العمارات للبيع وتكلمت بهيئه الاستخفاف ان كم يكون الدخل السنوي ل 5% وفتحت المجال للتعليق الغير مستحب وبهالاسلوب ترى بس يبدا يدخل الشخص مع المشككين ويطلع من مجموعه الراي والراي الاخر والنقاش
عموما اخواني حبيت ابين هالنقط ولاي مناقشه انا حاضر وان شالله كل الاعضاء والزوار يستفيدون من المناقشه اللي بتصير عشان يعرفون كيف يتكلمون ويتعاملون مع المشككين ويعرفون الفرق بينهم وبين محبي المناقشه عشان لايلتبس عليهم الموضوع
ورجاء من الاخوه المشككين ان يردون بهالموضوع ومايروحون يردون بمواضيع ثانيه مثل موضوع الاليه او غيره او ان يفتحون موضوع جديد
عشان يشتتون القاريء ويحاولون يثبتون وجهه نظرهم فياليت نشوف مشاركه من الكل بعد
وبالتوفيق ان شالله اخواني وان شالله يكون درس من الدروس اللي اقدمها دائما ويكون مفيد جدا للكل
تحياتي 
مرحبا اخوي شحالك وشخبارك ان شالله طيب
شوف الله يسلمك اول شي مشاريعي مش مبالغ فيها ابدا لو تقرا كل مواضيعي بتعرف هالشي الله يسلمك الا يمكن مشروع العقارات لانه كان يمكن من نوع يديد على السوق..
ثاني شي اخوي بقول لك شي من حقهم الناس بالحذر وانا بطبعي احذر ودوم اقول في خيط رفيع بين اللي يحذر ويسال وايد وبين المشكك وارحب باللي يسالون وايد وفي ناس يتكلمون معاي بالجوال بالساعات ويقعدون معاي بالساعات بعد فدوم اخليهم على اطلاع سواء المشاركين معاي اولا
الحمدالله انا من النوع اللي يحب يساعد الناس عشان في النهايه ترجع الفايده علي وعليهم ..
باسلوبك معاي بالحديث حاليا اعتبرك حذر بس في اساليب ثانيه تخلي الواحد يعتبر ان اللي معاه مشكك
بس شوف الله يسلمك لو تلاحظ في مشاريعي فيها امان للمستثمر خصوصا ان يكون متملك في نفس الشركه يعني مش نفس نظام المساهمات اللي نسمع عنه في السعوديه اللي تكثر فيه مثل هالحالات واحنا عندنا عموما في البحرين ممنوعه مثل هالشغلات واللي هي المساهمات العقاريه والقانون اصلا يمنع العمل فيها
وثالث شي بخصوص شركاتي انا من كم يوم خليت اعلان ان بتفق مع مصممين مواقع عشان اخلي مواقع شركاتي كلها وقوائمها الماليه ..
اخوي البرفسور ترى اي شي بتفكر فيه يفيد مصالحي ومصالح المستثمرين تاكد اني بفكر فيه مسبقا واخلي الخطوات في العمل عليه لاني كرجل اعمال شي طبيعي بحافظ على سمعتي واهدافي وشركاتي
عموما اخي الكريم تسلم مره ثانيه على متابعتك معاي وعلى رايك ومناقشتك بس تاكد اني بحاسب على كل خطوه اسويها لان مثل ماقلت لك القانون عندنا هني مش نفس القوانين الاخرى خصوصا ان احنا حاليا العاصمه الماليه في الشرق الاوسط فالدوله مستحيل تسمج باي تلاعب لكن شي طبيعي بتقدم التسهيلات اللي يحتاجونها المستثمرين في اعمالهم
وبالتوفيق ان شالله اخوي وارحب باي اقتراحات اواستفسارات
اخوي بارك الله فيك احنا نفضل الرد على كل موضوع في صفحته حتى تتوافر للقراء كل التساؤلات حول الموضوع ، وبعدين ارجو اخوي انك ما تفهم بطريق الخطأ ان حد يبا يوقف مسيرتك بالعكس الكل يتمنى لك التوفيق ، ولكن اخي الكثير من اللي تصفهم بالمشككين انا اسميهم بالمحذرين والمنبهين ، وهؤلاء قلوبهم على اخوانهم قليلي الخبرة ، واللي ما يعرفون كثير عن السوق ، لانه حسن النيه مفترض عند الجميع لكن وكما تعلم الدنيا تحصل فيها حالات استغلال وتغرير ، لذا فالتوضيح في كثير من الامور واجب ، والحذر واجب لانه بعدين لا ينفع الندم ، اخوي نايف بقولك ليش تكثر التعليقات حول مشاريعك لانها مبالغ فيها من وجهة نظر الناس او ارباحها خياليه ولهذا انا انصحك خوي تسوي لك شركه للاستثمارات وتكون رسميه وتسوي لها موقع وتعرف عن نفسك بصوره واضحه وتضع كافة التفاصيل ، بحيث يكون كل شيء من التعامل مع شركه ويكون اضمن لان التعامل بصفه شخصيه خصوصا لما يكون المبلغ بالملايين يكون شوي صعب ويخوف وكل يوم نسمع اخبار ، شوف اليوم شو قارئ في هالموضوع في المنتدى.
ويوجد رابط الخبر في جريدة الرياض ، يعني اخوي الحذر واجب واجب .