مخالطة الناس نعمه وين لي يغتنمها….

يعني عصفورين بحجر..

ولكن اكتشفت اني اكتسبت فايده ثالثه ما كانت بالحسبان يعني طلعت مجانا واللي هيه الشعور بالسعاده والونسه نتيجة الاختلاط بالناس تحس بالراحه يوم تمر عليك وجوه جديده وابتسامات مختلفه وعيون حلوه وعيون خجوله تشوف صغير يلعب بكل عفويه ودك لو ترد صغير تلعب وياه
وتشوف شيبه عايش الوضع باستغراب وتقول رب اعف عنه وعافه في بدنه ويمرون عليك ريال وحرمته في قمة السعاده والانسجام وتقول اللهم ارزقهم الذرية الصالحه وناس وناس تمر عليك ولولا مرورهم وتجدد اختلافهم في نفس المكان لصار هالمكان زواياه ميته والدخول اليه ممل..

اكثر ما حز في خاطري ودخل على نفسي البهجه والسرور واحس فيها لين هاللحظه اللي اكتب فيها الموضوع

يوم كنت طالع عند آخر بابين من المول وهالبابين ينفتحون يدوي كان جدامي شيبه وعيوزه من الجنسيه الهنديه وفي ايديهم اغراض
العيوز تمشي جدام والشيبه ورا وكانوا يمشون بصمت ومنزلين روسهم تحت

في الباب الاول فتحت العيوز الباب ولكن حسيت انها فتحته بصعوبه
بين البابين تجاوزتهم وفتحتلهم الباب مع ابتسامه عريضه وتحية الاسلام

رفعوا الشواب روسهم وابتسموا وردوا السلام وقالولي شكراااا

حسيت انها نظراتهم وهم يطالعوني كلها عرفان ودعوات طيبه من القلب نظراتهم كانت حلوه وغريبه حسيت منها بسعاده غامره ما فارقتني ليل الحين شو السر ما ادري ولكن اكيد انه اكبر سر هوه مخالطة الناس والتعايش وياهم من زوايا الاحترام والطيب والتقدير للصغير والكبير اتمنى انكم تعيشون التجربه …