السلام عليكم
الحين انا عندي مخالفات سالك أكثر من 13 مخالفة
انا من بوظبي ومب مركب سالك على الموتر 
الحين طلعت المخالفات لسالك
سويت اعتراض على بعض منهن تم الرفض
وقبل شويه سويت على الباقي
ان تم الرفض بعد على الإعتراض شو الحل ؟؟؟
المشكله ما تقدر تكتب ليش إعتراضك اللهم بس تختار من اختياراتهم ولا وحده مناسبة لحالة موترنا
فاللي يعرف يخبرنا يسوي فينا خير
واللي يعرف كيف نجدد المواتر من دون ما ندفع مخالفات سالك بعد يخبرنا 
دمتم بود
هلا اخواني أشكركم على مشاركتكم الطيبه
ونظام سالك أشوفه شيء طيب وخصوصا لإختلاف الجنسيات في دبي
ولكن أتمنى ما يتحول محور الحديث الأصلي عن دفع المخالفات إلى محاور أخر ثانويه آخرى
دمتم لنا بود
هلا اخوي الغالي بو خالد ..
وجهة نظرك احترمها واقدرها ..
وعلى راسي من فوق …
بس مش كل شي في هالمدينه لازم يتطبق عالمدينه الثانيه .. .لكل مدينه احتياجاتها من وسائل النقل والتنظيم …
في العين عندنا دواوير .. والحركه المروريه مب متأزمه … في دبي تقريبا شلّوا معظم الدواوير وحولوها لتقاطعات لان الدواوير كانت تسبب اختناقات مروريه …
في دبي حطوا مترو .. عشان يقلل الزحمه … مب شرط احط في البحرين قطار عشان يحل لي ازمه نفسها..
كل مدينه ولها احتياجاتها المروريه والتنظيميه ..
اخوي بوخالد .. انا ما ادافع عن سالك ولا اني اصفه بالناجح 100% ..( مع ان عندي تحفظات ومشاكل صارت لي مع المخالفات ..فيه منها اللي كمّل سنه ويا دوب انحل من فتره بسيطه= يعني انا لازم اكون ساخط على سالك ومااخلي عليهم شي مب زين مااقوله ) … بس انا اتكلم عن موضوع انه امر منتهين منه ومفروض علينا من 2007 .. ونحن وصلنا 2010 وبعدنا نستغرب من مخالفات سالك ونتشاور هل نركب سالك ولا ما نركب .. هل بيخالفونا ولا بيكنسلونها !!؟
هاي نظرتي للموضوع … وارد واقول لك ان نظام سالك خفف بشكل نسبي الزحمه … يمكن انت ما مريت باللي مرينا عليه قبل سالك يوم كنا نعلق في زحمة شارع الشيخ زايد بشكل يومي ساعه وساعتين ومرات تكون اكثر .. في درب ممكن توصله في ربع او نص ساعه في خارج اوقات الذروه ….
الزحمه خفت وبشكل نسبي .. مب 100% ..( وجهة نظر خاصه من تجربه.. وما احاول افرضها )
وسالك تراه جزء من منظومه شبكه نقل ومواصلات .. من باصات ومترو وشوارع وعبره وباص مائي وتكاسي وسيارات خاصه وبنيه تحتيه وجسور وانفاق تقاطعات .وخطوط خارجيه ….
وبالتوفيق لك وللجميع … واتمنى السموحه منك يا بوخالد و من صاحب الموضوع لانا طلعنا برع الموضوع وقمنا نناقش سالك وهل لازم يكون موجود ان انه بدون فايده …
ترى ربي مابلاهم من شوي والورطه الي هم فيها الا من دعاوي الناس المظلومه من هالقوانيين رادارات تصور على سرعه 60؟؟؟؟
وسالك وبطيخ وناس ماتقدر تجدد سيايرهم وتتراكم عليهم المخالفات من كل صوب واخر شي مايقدر يدفع ويعممون عليه وحبس وخراب بيوت على سبة ا شيا تافهه
لاحولا ولاقوة الا بالله العلي العظيم
صدق قهر هالتطور الاعمى الي صدق عماهم عن معاناة الناس اليوميه
اكيد اخوي من الضروره ان نتبع الدول الاوربيه والاسيويه (( في اللي ينفعنا وفي اللي سبقونا فيه من تطور ونظام )) واللي يقول غير عن جيه … لازم مايدخل النت لانه اختراع وتطوير الغرب .. ولازم ما يركب السياره لانها اختراع وتصنيع الغرب .. ولازم ما يلبس كنادير لان معظم الاقمشه مستورده من بلدان غربيه واسيويه .. ولازم ما يسافر للعلاج ان دعت الحاجه ..لان احسن العلاج في الغرب ..ولازم ولازم ..ولازم …
بس ليس من الضروره ..بل يصل في احيان كثيره الى درجه التحريم ..اتباعهم في كل ماهو خاطئ ك عاداتهم وتقاليد ومعتقداتهم و اكلهم وشربهم و لبسهم وغيره ..
اخي الملتزم .. ضربت مثال في الغرب ..ليس للتبعيه العمياء .. بل ضربتها لتبيين متى تقبلنا نحن العرب والمسلمين لانظمة الدول الغربيه واشادتنا فيها … بينما نستنكر كل ما له صله بالتطور والنظام في بلداننا … لا اكثر ولا اقل …
واحترم وجهة نظرك كامله .. بس حبيت ابين لك لماذا ضربت المثل في الغرب في هذا الموضوع … واتمنى وجهة نظري وصلت ولاقت الاحترام اذا لم تنل القبول
اخوك
اوكيه .. ليش هالسالك بس ف دبي ..
ليش ماشي ف بوظبي ولا العين ….
ليش ماشي ف باقي دول الخليج — قطر بحرين عمان كويت سعوديه
؟
ولا كل هذيلا مب مطورين او مب نضامين ..
أحس انه مووضوع سالك …
ماعرف شو اقول بس مب شي من الاخر …
وبعدين ياخويه انتا تقول دول الغرب .. الغرب هذيلا ماعندهم الخير ف من جي ..
والحمدالله نحن ف دار بو خليفه الله يرحمه ويغمد روحه الجنه ماخلى علينا قاصر ..
احس انه ((شغلت سالك مالها داعي))
مجرد رأي