مرت على الهجرة والجوازات مرور الكرام

السلام عليكم ورحمة الله وبركاته

(( كل يوم عندي قصه امر فيها )) واطلب استشارتكم

من شهر تقيبا طلبت من مكتب (( قرطبة للعمالة والخدامات )) شغاله

المهم اخترت الصورة يعني اخترت وحد معقولة في السن والشكل لانها بتقضي يومها مع الاطفال في الفترة اللي بكون فيها في الشغل (( مابا حد يقولي ضرر الخدامات لانه مب هذا موضوعنا ))

المهم بعد ثلاث اسابيع او تقريبا اربع وصلت

وكانت الصدمة الكبرى

الصورة اللي طلبتها غير عن الشغالة اللي وصلت
طبعا نهائيا غير الصورة والشكل الواقعي…
المهم سالت راعية المكتب اقولها هاي غير عن اللي طلبتها قالتلي لا لا ها كانت متينة وضعفت

همممممممممم من كثر اعيلتي قلت يمكن بعد انا توني يايه من الدوام وتعبانه واشلقيت
المهم كل ما اراوي حد الصورة ايقولي غير

بتسألوني انزين عادي تراهن كلهن ايساعن وشو تبين في الشكل
بعد اقولكم مب موضوعي هذا لانها تماما غير في الشكل يعني الاطفال ما بيتقبلوها وما بوصف لانها خلقة الله وحرام والحمد الله

رديت البيت وسالتها نفس السؤال وقالتلي انها كانت متينه واضعفت

همممممم

قلت مب معقولة اطالع الصوره اللي في الفيزا غير … واللي في الجواز غير

المهم قلت حرام خل تترزق وما بردهامدامها فقيرة بس كيف غشني المكتب

ضغطت شوي على الشغاله (( استويت المحقق كونان ))
واعترفت انه المكتب اللي في الفلبين قالها قولي انج انتي اللي في الصورة

بس عندي سؤال هي دخلت عن طريق مطار دبي كيف مرت عليهم ان الصورتين مختلفتين من الفيزا والجواز
وكيف المكتب غشني (( انا لاحظت من ويها انها جذابه راعية المكتب )) وبعد اكتشفت انها خادعة ناس ثانين بها الموضوع

عندي اسأله ابا ابلغ على المكتب
ابا اسأل كيف مرة على هجرة دبي
مابا ارد الشغاله لانها فقيرة ومالها ذنب بس شو اسوي ويا راعيية المكتب

محتارة والله شو اسوي

واذا بلغت الشرطه هل بتكون شغالتي داشة الدولة بحكم القانون
والا بيسفرنها وها الشىء حرام ؟؟؟

وبس هاي قصتي