مسلسل شحاتة الرصيد لازال مستمراً

15 thoughts on “مسلسل شحاتة الرصيد لازال مستمراً”

1. اللي يوصله من هالشي يبلغ الشرطه و مع كثر البلاغات بيمسكونهم ..

   ما يحتاي تعورون راسكم بهالاشيا التافهه ..

   المشكلة ياخوي إن من يقرأ الرسالة من الوهلة الأولى بيقولك : “الرسالة وصلت لك بالغلط”

2. سوف اشارككم بقصة حصلت لي لكي لا يقع بها غيري

   اتصل علي واحد قبل حوالي 3 اشهر تقريبا، وقال لي انه البارحة حول على موبايلي 50 درهم بالغلط

   وانه حاول يتصل بي ، لكن موبايلي كان مغلق وقتها

   قلت له : يا ابن الحلال ما وصلني شيء منك ، و اذا وصلني اي مبلغ منك ابشر برده لك في نفس الوقت.

   المهم الريال قال لي اوكيه وجزاك الله خير

   اليوم الثاني اتصل علي نفس الشخص وقال لي وين الرصيد ؟

   قلت له يا اخوي ما وصلني شيء منك انت ما تفهم

   يقول لي انا متأكد اني حولت لك المبلغ بالغلط

   قلت له شو أسوي برصيدك انا ، تتحراني حرامي

   قال لي انا ما اقصد ، بس انا متأكد اني حولت لك الرصيد

   قلت له اذا انت متأكد انك حولت لي ، راجع اتصالات وخبرهم السالفة

   وسكرت الخط

   و في اليوم الثالث اتصل علي ربيعه ويقول لي بسالفة الريال وانه حول الى موبايلي الرصيد بالغلط

   قلت له انتوا ما تفهمون ، ما وصلني اي شيء منكم

   بعد ما انهيت المكالمة منه

   شكيت بنفسي ، و قلت خلني أتأكد بنفسي من اتصالات

   واذا كلامهم صحيح ، فسوف اعتذر منهم وأطرش له الرصيد اللي يقولي عنه

   المهم

   اتصلت على اتصالات

   وشرحت لهم السالفة بالكامل

   وراجعوا حسابي وحساب الشخص اللي كان يطالبني من خلال الرقم اللي كان يتصل بي منه ، حيث انه أخبرني انه حول لي الرصيد من رقم موبايله اللي يتصل منه حاليا

   و بعد مراجعة وتدقيق أكدوا لي اتصالات : اني لم استلم منه أو من غيره خلال هذاك الاسبوع اي تحويل بأي رصيد الى موبايلي

   و قالوا لي لا ترسل للشخص اللي يقول انه محول لك بالغلط ولا درهم

   واذا له أي حق ، قوله يراجع اي مكتب للاتصالات

   قلت لهم الريال دومه يزعجني ويطالبني بالرصيد

   قالوا لي اذا كرر اتصالاته وضايقك ، تقدر تشتكي عليه عندنا ونحن بنتعامل وياه

   المهم

   الريال اتصل بي مرة رابعة

   و قلت له اني راجعت اتصالات ، وأكدوا لي اني لم استلم منك اي مبلغ ، واذا لك اي حق ارجو منك ان تراجع اي مكتب للاتصالات وسوف يعطوك حقك

   وارجو منك عدم الاتصال بي نهائيا

   وبعد هذاك اليوم ما اتصل بي

3. الحمدلله ماصار لي شي من هالمواقف

   يمكن لان رقمي مصفع

4. عيل انا مرة يتني وحدة تبغي تتصل حق أهلها قالت لي ما عندي رصيد وأبغي اتصل لأهلي قلت لها اندوج هذا موبايلي واتصلي منه شو سوت الحقيرة سارت بعيد عني ويلست تتصل اونها وسرقت من رصيدي 30 درهم وطرشته لموبايلها وانا كيف عرفت ترى انا نفس اليوم كنت حاطه رصيد 100 درهم في تيلفوني ويوم شيكت في البيت شفته ناقص وانا هاليوم أصلا لا اتصلت ولا رمست حد وين سار الرصيد ؟!

5. انا قصتي تختلف شوية عنكم

   الاسبوع لي طاف لقيت مسج على تلفوني ان في واحد محول على رقمي 25 درهم قلت في خاطري

   مسكين خلني اتصلة ولا واحد يقولي مغلط قلتلة افا عليك من اسكر الخط على طول بطرشلك

   وانا على نياتي طرشتلة 25 درهم بعد ساعتين من السالفة

   تذكرت ان المسج يوم اييك بتحويل من الاتصالات مانتبهت ان التحويل من بو شباب تميت اتصلة مايرد علي

   طرشتلة مسجات يقولي انته فهمت بالغلط قلتلة اوكية بالغلط رد الرصيد ماطاع

   انا يا اخوان ماهمني الرصيد انا لي همني ان الريال يمكن مسونها عادة ويطرش حق الناس وياكل فلوسهم

   الفقارى ,,,,يتة بالادب مافاد وياة الى ان وصلت حدي وياه جان اهددة بفتح بلاغ في الشرطة اذا مارد الرصيد

   هذيج الساعة رد اتصل قلتله بترد الرصيد مابفتح بلاغ جان يردهم الحمدلله

   وخذت درس اني اكون واعي ويا هذي الاشكال وماخليها تستنفع من وراية .

Comments are closed.