السلام عليكم ورحمة الله
اخواني حبيت اطرح هذا الموضوع واشوف رأيكم فيه
اولا نحنا الحمدلله كل مانريد نشتري شي نتوجه الي المنتدي ونشوف الاشياء الي تنباع هنيه ونعرف ان في محلات برع تبيع ولكن نقول نريد نفيد الناس الي في النت الي هم التجار بعتبارهم ماعندهم محلات او شركات ويريدون يستفيدون بدال جلستهم في البيت..
الموضوع ان حصل واشتريت جهاز نوع GUCCI وقلت هذا الجهاز تمام اول ماشغلته طبعا انا ماريد اذكر عيوبه في الاستخدام او اصوات التشغيل المزعجه جنه سيارة مطافي جدامك ( انتقاد ) اريد اقول او ادخل في صلب الموضوع الا وهو
بصراحه ماتسوي علينا ها البيعه بعد ماتشتري التلفون من احد التجار يا يلبسك يا يعطلك يا تنحرج لمن تشتريله التلفون يا يرتفع ضغطك من كثر مايخترب وتصلح في هذا التلفون ويطلع عليك كله اغلى من بيع السوق …
والي يبط الجبد ان في المحلات برع او الاسواق السودا الي تبيع ها النوعيه من التلفونات تلاقيهم يبيعونه اب 800 وهنيه البعض يزود المبلغ الي الكيف الي يعجبه وطبعا هذا سعر تقريبي مش بالضبط
فسؤالي هنا ؟ كيف نبيع الشي بدون ضمان وكيف نبيع الشي بدون حتى ان يدلونا على محل معين لقطع الغيار او التصليح؟
انا ادري في واحد يمكن يدخل ويتبرع من نفسه بالتصليح ولكن تذكر يا اخى ان التلفونات مب بس هذا الطراز الي ينباع تجاري بعد في النوكيا 8800 السفير اعتقد .
انا اترك لكم الان المجال للرد والتعليق والتفكير قبل شراء اي جهاز او شئ غير مضمون او اصلي .
وانا اشكر بصراحه ادارة المنتدي على وضع قوانين تمنع البيع للادوات او الاجهزة المقلده ونعجز صراحة عن شكركم لتوجيهاتكم
وانا فعلا رأيت الادارة او المشرفين يقومون بقفل المواضيع الي فيها بيع اجهزة مقلدة او غير اصليه
ولكن لي رجاء ان يتم المنع على الكل وليس البعض والله يوفقكم في عملكم وفقكم الله
واترك الموضوع الان للأعضاء للتعليق على الموضوع
ولكن نرجوا من التجار عدم الانزعاج من هذا الموضوع فأنتم تريدون الربح ونحن نريد ان نحصل على الضمان لما نشتريه وتذكر اخى ان ما اشتريه ليس من فراغ بل من نقود انا كدحت حتى احصل عليها
هذا والسلام عليكم ورحمة الله
الصراحه لازم يكون في تدخل من الاداره ويا الي قاعد يحصل فالمنتدى وبالتحديد في هالقسم
اتمنى اتخاذ اجراءات صارمه بحق التجار الي يغشون الخلق
سواء كانت بضاعتهم تقليد او زياده فالاسعار
او مشاكل اخرى مب شرط يكون غلق الموضوع لازم يكون له انذار واذا تكرر هالشي تتم ايقاف عضويته
نحن نعرف ان التقليد مافيه فايده ومستحيل يكون نفس الاصلي
لاكن بعد في نص التجار يبيعون بضاعه ماتكون مقلده وتكون من شغلهم (الدخون ) ويطلع غش ؟!!
او تشتري عنه بضاعه مضمونه وتساله وين الضمان يقولك اذا استوابها شي اتصلبي وبعد فتره تتصلبه مايرد او مغلق ّ!!
او تاخير في وصول البضاعه او .. او .. او ..
صدقوني مشاكل مالها اول ولا تالي
واتمنى ان الاداراه تلاقي حل لهاي المشاكل الي تحصل
وتزيد عدد مشرفين هالقسم وهذا مب معناته ان مشرفين القسم مقصرين بالعكس والله بس كم بيلحقوون كل ثانيه موضوع يديد !!
أنا عن نفسي …. تقريباً عضو صامت
وما أشارك في المواضيع كثير …. باين من عدد المشاركات
اتعامل بالرسائل الخاصة مع صاحب البضاعة
اشترين وايد من المنتدى …… الله يسامحكم بضايعكم اتطير الراتب
وبشكل عام …. أقدر أقول ولله الحمد والمنة
إن اللي اتعاملت وياهم ناس راقين
في اسلوبهم وتعاملهم
والمعلومات اللي كانوا يحطونها عن البضائع شبه دقيقة
اللهم مرة وحدة بس اشترين شنطة
واتفقت على السعر ويا البائعة وخلاص
بس للأسف يوم ياني المندوب (هندي/سائق) طالبني بمبلغ أكبر من اللي تم الإتفاق عليه !!!!!!!
أنا من دبي … والبضاعة كانت ياية من العين (حسب قول البائعة اللي قالت لي بأنها بترسل المندوب من العين)
عموماً أنا شفت الأسعار مكتوبة على الشنط
وخفت أعطي المندوب السعر اللي تم الإتفاق عليه
والبائعة (التاجرة) اتفكر إن المندوب (لطم) سرق الباقي …
وفي نفس الوقت قلت حرام أرفض استلام الطلبية ….
كوني طلبتها والبضاعة ياية من العين (مساااااااااااااااااااااااافة)
فدفعت له … وأرسلت رسالة شكر للبائعة تفيد بوصول البضاعة لي دون التطرق لموضوع إختلاف السعر
بس حطيت X عليها
يعني ما اتعاملت وياها من عقبها
__________________________________________________ ____________________
بس ارد وأكرر
إن الأغلبية “عسل في التعامل”
شكراً لطرح الموضوع
السلام عليكم
وامبارك عليكم العيد ..
ياجماعة الخير ..
حد يشتري تقليد ؟؟ وهل معقولة الحينة بيصير التقليد مثل الأصلي ؟؟!؟!!!!!!
اللي يشتري التقليد يتحمل المسؤولية .. والإدارة مش مسؤولة ..
وصح ان الادارة تحذف المواضيع اللي فيها اجهزة مقلدة لكن هذي مش حجة لأن البايع والمشتري عارف انه يمنع التداول في هاي المواضيع .. ومادامه اشترى المنتدى يخلي مسئوليته . لكن نحاول في بعض الاحيان بحل القضايا وديا ..
وعشاااان جي .. اللي يلاحظ اي موضوع أو عنده شكوى أو اي شي مخالف يبلغ المشرفين .. ونحن اصلا محتاجين مساعدتكم لحل مثل هاي القضايا ..
وموفقين دوووووووم
السلام عليكم و رحمه الله
و كل عام و انتوا بخير …
بالنسبه للهواتف المقلده خصوصا نحن مشددين عليها من فتره
و كنا نكتفي باغلاق الموضوع
بس بما انه جميع الاعضاء خاصه في قسم البيع و الشراء صار عندهم علم بهالقانون
فاي موضوع عن الهواتف المقلده راح يتم ااغلاقه في حاله انه كانت اول مخالفه للعضو
اما اذا كانت المخالفه متكرره و من عضو قديم و عارف بهالقانون راح يتم حذف الموضوع ثاني مره
و اذا اصر على المخالفه راح ناخذه بحقه اجرائتنا
في النهايه لا تنسوا انه قرار الشراء قراركم الشخصي
يعني المفروض يكون عندكم المعلومات الكامله عن كل التفاصيل قبل لا تشتروا
بالنسبه للاسعار بصراحه شئ راجع للتاجر نفسه .. يعني البيع عرض و طلب حالها حال اي شي ثاني
الله يوفقكم جميعا …
تحياتي لكم
السلام عليكم
طويل العمر حاول تتواصل معاه اكيد انشغل او عنده ظرف وماقدر يتواصل معاك ولاتنسى انه بني ادم خطاء
الله يستر عليه وعليك اكيد في سوء تفاهم والله المستعان