مشروع نسائي لا يحتاج لرأس مال و الدخل منافس للكثير من المشاريع الصغيرة!!!

السلام عليكم

خواتي انا عندي فكرة لمشروع نسائي بصراحة ممتاز و دخله ممكن يكون في كثير من الاحيان اكثر من المشاريع الصغيرة الموجودة و الاهم من هذا انه ما يحتاج الى رأس مال ..

الفكرة تدور حول الشنط الماركات الي وايد من المواطنات يشترونهن .. يعني وايد بنات عندهم شنط ماركات و مع الوقت يشترن شنط يديدة و الشنط الجديمة تكون طايحة ما يعرفون شو يسوون فيها.

كتبت موضوع من كم يوم عن وحدة تشتري هذه الشنط و تبيعهن في الصين و هونغ كونغ لكنه انحذف لانه كان مخالف لقوانين الموقع.

المهم .. الفكرة هي كالتالي:

انتي وحدة عندج معارفج من الاهل و الربع .. تروحين عندهم و تقولين لهم ان بإمكانج (تصرفين) الشنط المستعملة الي ما يبونها و كمقابل تاخذين نسبة من المبلغ! يعني تشتغلين مثل وسيطة!

مثال:

تاخذين 5 شنط و بنت خالتج و 5 شنط من بنت عمج و 5 شنط من ربيعتج. تسجلين في ورقة تفاصيل الشنط الي خذتيها من كل وحدة عشان ما تضيع الحقوق طبعاً.

تتواصلين ويا هذه الي تشتري الشنط و تتفقين على موعد وياها عشان اتي و تشوف الشنط و تشتري الي تباهن منها ..

لنفرض انها اشترت مثلاً 6 شنط بس من ال15 شنطة … و المبلغ الي حصلتيه مثلاً يساوي 3000 درهم على اساس ان كمعدل كل شنطة ب500 درهم بس … هنيه انتي ترجعين الشنط الباقية لاصحابها و تعطين كل وحدة فلوسها بعد ما تاخذين نسبتج ..مثلاً 20% يعني .. يعني بتحصلين 600 درهم و تردين ال2400 لاصحابها ..!

600 درهم ربح صافي من الشغل .. لا راس مال ولا هم يحزنون! و هذه مجموعة وحدة بس… باجر تشتهرين بين ربعج و اهلج و بتحصلين شنط بكميات كبيرة و ان شاء الله تقدرين تبيعينهن … ممكن باجر تحصلين حد ثاني يشتري الشنط غير هذه الحرمة و تبيعين على بنات و حريم يدورون شنط مستعملة من ماركات عالمية و اصلية.

في مشاريع صغيرة وايد نقرا عنها و اغلبها لبيع اشيا بسيطة سعرها 20 او 30 .. يعني الوحدة لازم تبيع كمية كبيرة بس عشان تحصل ربح صافي مناسب و مشجع .. و هذا المشروع مافيه كل هذا التعب!

عموماً.. بس عشان ما اخالف قوانين المنتدى, الي تبا تفاصيل عملية الشراء تراسلني على الخاص